1. Xiñee na Biblia bidxá ladxidóʼ Jesús «de enda nayecheʼ». (Biiyaʼ dibuju ni zeeda ra ruzulú tema riʼ.)

BISEENDAʼ Jesús 70 discípulo stiʼ chigucheechecaʼ stiidxaʼ Reinu. Peru ca discípulo que napa xidé guidxaagalucaʼ stale enemigu nadipaʼ. Casi ca xaíque stiʼ ca religión stiʼ ca judíu, cani nabé guyuu xpiaanicaʼ ne guzacaʼ scuela roʼ. Laacaʼ gucaláʼdxicaʼ ñuuyaʼ binni Jesús casi ti carpinteru (Marcos 6:3). Ne gucaláʼdxicaʼ ñuuyaʼ binni ca discípulo stibe casi tutiica binni ni qué nizá scuela (Hechos 4:13). Ngue runi, Jesús gupa stale gana guuyaʼ ca discípulo stiʼ ora guibiguetacaʼ para gánnabe ximodo guyé ni laacaʼ. Ora bibiguétacabe biiyaʼ Jesús guizáʼ nayecheʼ nuucabe. Dede ca demonio bicaalú laacabe, neca zacá bíʼnicabe ni biʼniʼ mandar Jesús laacabe. Nga runi Biblia na ora biiyaʼ Jesús laacabe bidxá ladxidóʼ «de enda nayecheʼ». Nanna dxíchinu dede cuxidxi huiinibe ne de ruzaaniʼ bezalube de tantu cayéchebe. Peru, xi biʼniʼ ca discípulo que para gúcacaʼ nadxibalú ne qué nusaana de  ñuucaʼ nayecheʼ yaʼ (biindaʼ Lucas 10:1, 17-21).

2. 1) Xiñee guníʼ Jesús zeeda gaca ca discípulo stiʼ casi baʼduʼ. 2) Xi gucané ca discípulo stiʼ Jesús para gunda biénecaʼ ca cosa ni jma nagana zeeda lu Biblia.

² Jesús gudxi Jiobá ca diidxaʼ riʼ: «Bixhozeʼ, lii nga runi mandar lu ibáʼ ne guidxilayú. Rudiee diuxquixe lii purti cucaachi lu ni cayuni lu riʼ para cadi guiene cani nuu xpiaani ne cani na riene, peru culuíʼ lu ni cani zeda gaca casi baʼduʼ». Óraque guniʼbe riuulaʼdxiʼ Dios gusiidiʼ zacá (Mateo 11:25, 26). Xiñee guníʼ Jesús zeeda gaca ca discípulo stiʼ «casi baʼduʼ» yaʼ. Purtiʼ ca discípulo stibe qué rudxiibacaʼ laca laacaʼ. Ca xaíque stiʼ ca religión stiʼ ca judíu nabé biʼniʼ crecaʼ guizáʼ nánnacaʼ ne biindacaʼ scuela roʼ, peru ca discípulo stiʼ Jesús bidiicaʼ lugar chuʼ tu gusiidiʼ laacaʼ, cásica runi ca xcuidihuiiniʼ (Mateo 18:1-4). Cumu qué nudxiibacabe laca laacabe la? biquiiñeʼ Jiobá espíritu santu stiʼ para gucané laacabe guiénecabe ca cosa ni jma nagana ni zeeda lu Biblia. Peru ca xaíque stiʼ ca judíu ni rudxiibaʼ laca laa que bidiicaʼ lugar gudxite Binidxabaʼ laacaʼ ngue runi qué ñanda ñénecaʼ guiráʼ cani rusiidiʼ Dios.

3. Xi zadúʼyanu lu tema riʼ.

³ Nabé biecheʼ Jesús ora biiyaʼ racané Jiobá ca binni ni qué rudxiibaʼ laca laa guiénecaʼ ca cosa nagana ni zeeda lu Biblia. Ca dxi stinu riʼ yaʼ, ñee riuulaʼdxiʼ Jiobá gusiidiʼ ca binni ni qué rudxiibaʼ laca laa guiénecaʼ guiráʼ ni rusiidibe la? Riuuláʼdxibe, purtiʼ qué huachaabe modo laabe. Xiñee nánnanu ni yaʼ. Zadúʼyanu ni lu tema riʼ. Guidúʼyanu ximodo racané Dios binni ni qué rudxiibaʼ laca laa guiene ca cosa nagana ni zeeda lu Biblia.

4. Xiñee zanda guininu galán revista Torre stiʼ ni rapa ni cadi nagana para guiene binni.

⁴ Lu ca últimu iza riʼ, cayuuyacabe jma risaca nga gusiidicabe modo jma nagueenda guiene binni. Ximodo yaʼ. Guidúʼyanu chonna ejemplu. Primé, xquidxi Jiobá maʼ gulee Torre stiʼ ni rapa ni jma nagueenda guiene binni. * Nabé galán revista riʼ purtiʼ cayacané ni stale binni, casi cani raca nagana para laa guundaʼ o para guiene xiixa diidxaʼ. Ne stale binni maʼ biiyaʼ racané ni ca xiiñiʼ guiene chaahuicaʼ ni zeeda luni. Ne stale familia maʼ biseendaʼ carta para gudii xquíxepeʼ pur revista riʼ. Ti hermana guníʼ né sti revista que ridxibi para guindisaʼ náʼ ne guicabi, peru né revista ni cadi nagana para guiénecabe ca maʼ qué ridxíbibe. Yanna maʼ ricábibe stale biaje cada guiuundaʼ Torre stiʼ ni rapa.

5. Xi cosa galán zeeda lu versión nacubi stiʼ Traducción del Nuevo Mundo lu diidxaʼ inglés.

⁵ Guiropa, 5 stiʼ octubre de iza 2013, xquidxi Jiobá gulee ti versión nacubi stiʼ Traducción del Nuevo Mundo lu diidxaʼ inglés. * Lu versión riʼ, jma huaxiéʼ diidxaʼ napa stale versículo, peru ngueca ni na cani. Ne cadi nagana para guiene binni cani. Casi Job 10:1 dxiqué gúpani 27 diidxaʼ, yanna maʼ nápani 19 si. Ne Proverbios 8:6 dxiqué gúpani 20 diidxaʼ, yanna maʼ nápani 13 si. Yanna jma jneza modo riene binni cani. Ti xpinni Cristu ni bibí ni maʼ ziné stale iza de cayuni ni na Jiobá, biindaʼ libru stiʼ Job lu versión nacubi  ne guníʼ biʼniʼ sentir casi ora ngue nga primé biaje biénebe libru riʼ. Zacaca huaníʼ stale hermanu.

6. Xi riníʼ íqueluʼ de modo riénenu yanna ni zeeda lu Mateo 24: 45-47.

⁶ Guionna, lu ca últimu iza riʼ, xquidxi Jiobá maʼ bichaa modo riénenu chupa chonna versículo stiʼ Biblia. Casi Torre stiʼ ni rapa 15 stiʼ julio 2013, jma nayá modo bisiéneni Mateo 24:45-47. Raqué bieeteʼ «mozo ni nuu xpiaani ne ni runi jneza» ca nga Grupu ni Zaniruʼ stiʼ ca testigu stiʼ Jiobá. Laaca bieeteʼ ca domésticu ca nga cani bibí né espíritu santu ne ca «xcaadxi dendxu», purtiʼ guirácabe ricaacabe ni rudii mozo ni nuu xpiaaniʼ ne ni runi jneza (Juan 10:16). Cadi dxandíʼ riuuláʼdxinu guizíʼdinu ca cosa riʼ ne gusíʼdinu ni xcaadxi binni la? Guidúʼyanu xcaadxi modo rusihuinni Jiobá cadi nagana modo riuulaʼdxiʼ gusiidiʼ.

7, 8. Bizeeteʼ chupa chonna ejemplu de ca historia stiʼ Biblia ni zeeda gaca tuuxa o xiixa jma risaca.

⁷ Ra zidiʼdiʼ iza, xquidxi Jiobá ziguchaa modo rusiene chupa chonna historia ni zeeda lu Biblia. Dxiqué bisiene xquidxi Dios stale de ca historia ni zeeda lu Biblia zeeda gácacani profecía ni riníʼ xiixa jma risaca ni zazaaca despué. Ñee nuu razón para gusiénecabe zacá chupa chonna de ca historia zeeda lu Biblia la? Nuu razón. Purtiʼ Jesús peʼ bisiene zacá chupa chonna historia. Guzéʼtenu ti ejemplu. Laabe guniʼbe tiempu guyuu Jonás ndaaniʼ benda que riníʼ ni tiempu ziuu Cristu ndaaniʼ baʼ (biindaʼ Mateo 12:39, 40).

⁸ Peru nuuruʼ xcaadxi historia stiʼ Biblia ra caníʼ ni de tuuxa o xiixa jma risaca. Guzéʼtenu ti ejemplu. Apóstol Pablu bisiene modo biʼniʼ tratar Abrahán Agar ne Sara, zeeda gácani casi modo biʼniʼ tratar Jiobá guidxi Israel ne parte de organización stiʼ Dios ni nuu guibáʼ (Gálatas 4:22-26). Pablu laaca bisiene lu Ley ni bidii Jiobá Israel zeeda stale cosa ni zeeda gaca casi tuuxa o xiixa ni zazaaca despué. Caadxi de ca cosa que nga tabernáculo, yuʼduʼ, Dxi Rixá Stonda Binni ne xaíque stiʼ cani ruzaaquiʼ guʼxhuʼ (Hebreos 9:23-25; 10:1). Ora ridúʼndanu ca historia riʼ ne riénenu xi riníʼcani, jma riguidxi fe stinu. Ñee riníʼ ndiʼ guiráʼ binni o guiráʼ cosa ni rieeteʼ lu Biblia zeeda gácani tuuxa o xiixa cosa la?

9. Ximodo bisiénecabe historia stiʼ Nabot dxiqué.

⁹ Dxiqué, ca libru ne ca revista stinu gatigá bisiene cani binni o xiixa ni rieeteʼ lu chupa chonna historia stiʼ Biblia zeeda gácacani tuuxa o xiixa ni zazaaca despué. Guiníʼ íquenu historia ni zeeda lu 1 Reyes 21:1-16, ra rieeteʼ de rey Acab ne reina Jezabel. Biyubi reina ca modo guuticabe ti israelita láʼ Nabot para guiaanané Acab layú stibe ra rudii uva. Lu iza 1932, bisiene revista riʼ zeeda gaca Acab ne Jezabel Binidxabaʼ ne ca xpinni. Laaca bisiéneni zeeda gaca Nabot Jesús ne ora biiticabe Nabot zeeda gácani guendaguti stiʼ Jesús. Peru lu iza 1961, libru «Santificado sea tu nombre» ni biree lu diidxaʼ inglés bisiene ni Nabot zeeda gaca cani bibí né espíritu santu ne Jezabel zeeda gaca ca religión ni rusiidiʼ ni cadi dxandíʼ. (Libru riʼ bireeni diidxastiá lu iza 1964.) Laaca bisiéneni ora guzanándacabe Nabot zeeda gácani ora sanándacabe cani bibí né espíritu santu lu ca últimu dxi. Stale iza gucané xquidxi Jiobá laanu para iguidxi fe stinu ra  bisiénecabe ca historia riʼ zacá. Peru yanna maʼ gadxé modo cusiénecabe cani. Xiñee yaʼ.

10. 1) Ximodo rusihuinni mozo riʼ jma nuu xpiaaniʼ yanna ora rusiene ca historia stiʼ Biblia. 2) Xii nga ni jma rusiidiʼ ca libru ne ca revista stinu yanna.

¹⁰ Chupa chonna de ca historia stiʼ Biblia ni bisiénecabe dxiqué nagana para guiene binni cani, guietenalaʼdxiʼ cani ne gúnicaʼ ni nani lu xquendanabánicaʼ. Ne cumu jma nga gucuá íquecabe gusiénecabe ca historia riʼ la? maʼ qué nusiénecabe ximodo zanda guni binni ni na cani lu xquendanabani. Nga runi, maʼ stale iza nga cayacané Jiobá «mozo ni nuu xpiaani ne ni runi jneza». Ximodo rusihuinni mozo riʼ nuu xpiaaniʼ yaʼ. Yanna maʼ rusiénecabe xiixa ora Biblia peʼ cusiene chaahuiʼ zeeda gaca tuuxa binni o xiixa ni rieeteʼ lu ti historia tuuxa o xiixa cosa jma risaca. Ne yanna ca libru ne ca revista stinu cadi naganapeʼ modo rusiidicaʼ ne racanécani laanu para iguidxi fe stinu, guni huantarnu, gannaxhiinu Dios ne gápanu ca guenda ni gupa ca binni ni rieeteʼ lu cada historia stiʼ Biblia. *

11. 1) Ximodo rusiénenu yanna historia stiʼ Nabot. 2) Xi rizíʼdinu de historia stiʼ Nabot. 3) Lu ca últimu iza gudiʼdiʼ ca, xiñee maʼ qué rusiene ca libru ne ca revista stinu xi zeeda gaca ca historia ni zeeda lu Biblia. (Biiyaʼ tema ni láʼ «Ni rinabadiidxaʼ cani ruundaʼ» ni zeeda lu revista riʼ.)

¹¹ Guzéʼtenu sti biaje historia stiʼ Nabot. Ximodo rusiénenu ni yanna yaʼ. Ti modo jma nayá ne cadi nagana. Maʼ qué rininu guti Nabot purtiʼ zeeda gácabe Jesús o ca xpinni Cristu ni bibí né espíritu santu. Guti Nabot purtiʼ qué niná nucheené Jiobá. Neca bicaalú ti xaíque guidxi laabe, yenándabe ni na ca ley stiʼ Dios (Números 36:7; 1 Reyes 21:3). Xi rusiidiʼ historia ca laanu yaʼ. Pa gucaalúcabe laanu cásica bíʼnicabe Nabot, cadi naquiiñeʼ guchéʼnenu Dios (biindaʼ 2 Timoteo 3:12). Guiráʼ ca xpinni Cristu zanda guiénecaʼ historia riʼ, guietenaláʼdxicaʼ ni ne gúnicaʼ ni lu xquendanabánicaʼ. Rihuinni dxíchica, nabé ruquidxi historia stiʼ Nabot fe stinu.

12. 1) Xi cadi naquiiñeʼ guiníʼ íquenu de ca historia ni zeeda lu Biblia. 2) Xi racané ca xpinni Cristu para guiénecaʼ dede ca cosa jma nagana.

 ¹² Peru cadi naquiiñeʼ guiníʼ íquenu rusiidiʼ si ca historia ca laanu xiixa. Nuu de ca historia stiʼ Biblia zeeda gácacani xiixa jma risaca. Neca zacá, ca libru ne ca revista stinu maʼ qué rusiénepeʼ cani xi zeeda gaca cada historia. Jma nga rusiénecani ximodo ridxaaga ti historia né sti historia ne rusiénecani xi rizíʼdinu de laacani. Casi ora ridúʼndanu qué nucheené Nabot Jiobá dede dxi guti, rusietenalaʼdxiʼ ni laanu qué nucheené Cristu Dios dede dxi guti ne ngaca nga ni runi cani bibí né espíritu santu. Peru laaca rusietenalaʼdxiʼ ni laanu nuu stale de cani naca de «xcaadxi dendxu» neca gúticaʼ qué nucheenecaʼ Jiobá. Ndiʼ rusihuinni cadi nagana modo rusiidiʼ Jiobá laanu. *

13. Xi ca ejemplu stiʼ Jesús cadi nagana modo rusiénenu yanna.

¹³ Ca ejemplu ca racanécani laanu para gusiénenu ca cosa nagana. Ne laaca racanécani laanu guiníʼ íquenu ne rindácani ndaaniʼ ladxidoʼno. Jesús nga maestru ni jma nanna gusiidiʼ, nabé guyuuláʼdxibe gusiidibe né ejemplu (Mateo 13:34). Lu ca últimu iza ca, cadi nagana modo rusiene ca libru ne ca revista stinu ca ejemplu ni biquiiñeʼ Jesús. Casi lu Torre stiʼ ni rapa 15 stiʼ julio 2008 gucané ni laanu para guiene chaahuinu xi riníʼ levadura, biidxiʼ mostaza ne tarraya ni rinaaze benda. Yanna maʼ biene chaahuinu xi riníʼ ca ejemplu riʼ. Riníʼ cani maʼ gucané Reinu stiʼ Dios stale binni para gaca xpinni Jiobá.

14. 1) Ximodo bisiénenu dxiqué historia stiʼ samaritanu. 2) Ximodo rusiénenu historia riʼ yanna.

¹⁴ Nuu biaje, nabé stale cosa zeeda lu ca historia ni guníʼ Jesús. Chupa chonna de ca historia riʼ nácacani profecía, ne xcaadxi de laacani biquiiñebe cani para gusiidibe xiixa. Ximodo zanda gánnanu gunáʼ nga ca historia ni naca profecía ne gunáʼ nga coʼ yaʼ. Ra zidiʼdiʼ iza ridúʼyanu gunáʼ nga laacani. Guiníʼ íquenu ximodo bisiénenu dxiqué historia stiʼ samaritanu que (Lucas 10:30-37). Lu iza 1924, revista riʼ guníʼ zeeda gaca samaritanu que Jesús. Ne cumu neza zécabe de Jerusalén para Jericó que nandagaa ni la? bisiénecabe zeeda gácani binni guidxilayú, purtiʼ dede dxi bicheené Adán ne Eva Dios jma malu ziyaca binni. Ne laaca guníʼ ni zeeda gaca ca gubaanaʼ que ca empresa naroʼbaʼ ca ne ca binni ni runi negocio, ne sacerdote ne levita que zeeda gácacaʼ ca religión ni qué rusiidiʼ ni dxandíʼ. Peru, ximodo rusiénenu ni tiempu riʼ yaʼ. Ca libru ne ca revista stinu riquiiñeʼ ca historia riʼ para gusiene cani cadi naquiiñeʼ guni juzgarnu binni de sti guidxi, de sti raza o de sti cultura, ne naquiiñeʼ gacanenu laacaʼ gunibiaʼcaʼ Jiobá. Riéchenu stale purtiʼ zeʼ dxi jma nayaʼniʼ modo rusiidiʼ Jiobá laanu.

15. Xi zazíʼdinu lu sti tema ca.

¹⁵ Lu sti tema ca zaninu de historia stiʼ chii binnidxaapaʼ (Mateo 25:1-13). Ximodo racalaʼdxiʼ Jesús guiénenu historia riʼ lu ca últimu dxi riʼ yaʼ. Ñee guiráʼ ni rieeteʼ lu historia riʼ zeeda gaca xiixa cosa la? O nácani ti historia si ni rusiidiʼ laanu ximodo guibáninu ca dxi riʼ. Guidúʼyanu.