1. Xi tiempu ndiʼ nabáninu.

NABÁNINU ti tiempu nabé nagana. Lu iza 1914 bizulú ca últimu dxi stiʼ guidxilayú riʼ. Dede dxiqué, ca cosa riʼ zeʼ dxi jma malu ziyaca cani (2 Timoteo 3:1-5). Ne nánnanu jma nagana zabani binni, purtiʼ Biblia maca guníʼ jma malu zaca binni ca dxi riʼ (2 Timoteo 3:13).

2. Xi nabé riuulaʼdxiʼ stale binni guni yanna. (Biiyaʼ foto ni zeeda ra ruzulú tema riʼ.)

² Ca dxi stinu riʼ, stale binni riuuláʼdxicaʼ gúnicaʼ ca cosa ni nanalaʼdxiʼ Jiobá casi tíndecaʼ, chúʼnecaʼ ni cadi xheelacaʼ, gúnicaʼ magia, ne guninecaʼ demonio dxiiñaʼ. Lu Internet, televisón, cine, lu libru ne revista rihuinni ca cosa riʼ casi xiixa ni cadi malu. Ndaaniʼ caadxi guidxi, maʼ bichaa ca ley ca ne yanna maʼ rudiicani lugar binni guni xiixa ni biiyacabe malu dxiqué. Peru Jiobá qué huachaa diʼ ca ley stiʼ ne de yanna nanaláʼdxibe ca cosa malu riʼ (biindaʼ Romanos 1:28-32).

3. Xi riníʼ ique stale binni de ca xpinni Cristu ni zinanda ca ley stiʼ Dios.

³ Ca dxi bibani ca primé xpinni Cristu, laaca nabé guyuulaʼdxiʼ  binni tinde ne chuʼné ni cadi xheelaʼ. Peru ca xpinni Cristu qué ñúnicaʼ zaqué, purtiʼ laacaʼ yenándacaʼ ca ley stiʼ Dios. Ngue runi stale binni guníʼ ique maʼ gadxé laacabe, biʼniʼ búrlacaʼ laacabe ne guzanándacaʼ laacabe (1 Pedro 4:4). Ca dxi stinu riʼ, laanu laaca zinándanu ca ley stiʼ Dios. Ngue runi stale binni riníʼ ique gadxé laanu. Biblia maca guníʼ zazanándacabe guiráʼ cani chinanda ejemplu stiʼ Cristu (2 Timoteo 3:12).

4. Pa racaláʼdxinu guzúʼbanu stiidxaʼ Dios, xi cadi naquiiñeʼ gúninu.

⁴ Pa racaláʼdxinu guzúʼbanu stiidxaʼ Dios la? qué zanda gannaxhiinu «guidxilayú nin ni nuu ndaaniʼ» (biindaʼ 1 Juan 2:15, 16). Biblia na Binidxabaʼ nga naaze guidxilayú riʼ. Riquiiñebe religión, gobiernu, negocio, anunciu rúnicabe lu televisión ne lu radiu para quítebe binni (2 Corintios 4:4; 1 Juan 5:19). Pa qué racaláʼdxinu quite guidxilayú riʼ laanu naquiiñeʼ gápanu cuidadu né cani guidxaaganu. Nga runi, Biblia caguixhená laanu ti cadi chuʼ tu gusiguii laanu, na ni: «Pa idxaagu ni nadxaba la? zacá ni lii» (1 Corintios 15:33).

5, 6. 1) Tuu nga ca binni ni cadi naquiiñeʼ gaca xhamígunu. 2) Xiñee cadi naquiiñeʼ gaca xhamígunu tuuxa ni runi cosa malu.

⁵ Pa qué racaláʼdxinu gusaana de gaca xhamígunu Dios, cadi naquiiñeʼ gaca xhamígunu ca binni ni runi cosa malu. Laaca cadi naquiiñeʼ gaca xhamígunu cani riníʼ rúnicaʼ ni na Dios, peru qué ruzuubacaʼ stiidxabe. Nga runi, pa tobi de laacabe gucheené Dios ne qué gaca arrepentir, zusaana de guinínenu laa ne de guidxaaganu laa (Romanos 16:17, 18).

⁶ Pa gaca xhamígunu tuuxa ni runi cosa malu, zándaca laaca zúninu ni rúnibe. Xiñee yaʼ. Purtiʼ jma nga stale binni racalaʼdxiʼ gaca casi ca xhamigu ne gusiecheʼ laacabe. Casi pa gaca xhamígunu tuuxa ni riuuné ni cadi xheelaʼ, zándaca laaca gúninu zaqueca. Ne zacá nga huazaaca chupa chonna testigu stiʼ Jiobá. Nuu de laacaʼ raca arrepentircaʼ, peru xcaadxi qué rúnini ne raca expulsarcaʼ de lade ca binni ridagulisaa (1 Corintios 5:11-13). Pa qué gaca arrepentírcabe, zazaacacabe ni na 2 Pedro 2:20-22 (biindaʼ ni).

7. Tuu nga naquiiñeʼ gaca xhamígunu.

⁷ Dxandíʼ nga naquiiñeʼ gácanu nachaahuiʼ né guiráʼ binni. Peru cadi naquiiñeʼ gaca xhamígunu ca binni ni qué ruzuubaʼ stiidxaʼ Dios. Laaca cadi galán diʼ gaca xnovio ti Testigu tuuxa ni caʼruʼ chúʼnisa. Jma risaca nga gaca xhamígunu Dios que gaca xhamígunu tuuxa ni cadi nadxii Jiobá. Naquiiñeʼ gaca xhamígunu ca binni si ni nabani modo racalaʼdxiʼ Dios. Jesús guníʼ: «Purti irá tu guni ni na Dios la? ca ngue nga biche» (Marcos 3:35).

8. Xi bizaaca ca israelita pur bidxaagacaʼ binni malu.

⁸ Cani ridxaaga binni ni runi cosa malu rápacaʼ stale guendanagana. Dxi mayaca chuʼ ca israelita lu layú bizabiruaa Dios gudii laacaʼ, gudxi Jiobá laacabe cadi guidxaagacabe ca binni ni nabeza raqué. Laabe guniʼbe: «Cadi naquiiñeʼ guzuxíbiluʼ xañee ca dios stícabe ne cadi gúniluʼ ni  na cani, ne cadi naquiiñeʼ gúniluʼ xiixa casi rúnicabe, sínuque naquiiñeʼ gunitiluluʼ cani ne zaqueca ca pilar ra runi adorárcabe. Ne laatu naquiiñeʼ gúnitu ni na Jiobá, Dios stitu» (Éxodo 23:24, 25). Peru stale de ca israelita qué nulábicaʼ ni guníʼ Jiobá ne guizáʼ feu modo bicheenecaʼ laabe (Salmo 106:35-39). Xi bizaaca despué yaʼ. Bidxiidéchebe guidxi Israel ne gulibe ca xpinni Cristu casi xquídxibe (Mateo 23:38; Hechos 2:1-4).

9. Xiñee nabé malu stale película, libru ne revista, saa ne ni ruuyaʼ binni lu Internet.

⁹ Stale película, libru ne revista, cani ridiʼdiʼ lu televisión, ca saa ne cani ruuyaʼ binni lu Internet nabé malu cani, purtiʼ zanda guxheleʼ cani laanu de Dios. Zeeda gácacani casi ora nidxaaganu binni malu ni zanda gucaa laanu gápanu confianza guidxilayú stiʼ Binidxabaʼ lugar de guni cofiarnu Jiobá ne cani naguixhe ique guni. Nga runi naquiiñeʼ gápanu stale cuidadu. Qué chuʼ dxi guidúʼyanu, guidúʼndanu nin gucaadiáganu gastiʼ ni gucaa laanu chuuláʼdxinu ca cosa malu stiʼ guidxilayú riʼ (Tito 2:12).

10. Xi zazaaca né ca película, libru ne revista, saa ne Internet ra ridiʼdiʼ cosa dxabaʼ.

¹⁰ Maʼ cadi candaa zanitilú guidxilayú stiʼ Binidxabaʼ ne maʼ qué ziuuruʼ película, libru ne revista ne cani ruuyaʼ binni lu Internet ra ridiʼdiʼ cosa dxabaʼ. Biblia na zanitilú guidxilayú riʼ, peru cani runi ni riuuulaʼdxiʼ Dios zápacaʼ ti guendanabani ni qué zaluxe (1 Juan 2:17). Lu libru stiʼ Salmos laaca rieeteʼ zanitilú binni malu, peru ca binni nachaahuiʼ zabánicaʼ nayecheʼ, guirutiʼ zuchiiñaʼ laacaʼ ne zápacaʼ ti guendanabani ni qué zaluxe lu Guidxilayú riʼ (Salmo 37:9, 11, 29).

11. Ximodo racané Jiobá laanu para cadi guchéʼnenu laa.

¹¹ Lu ti oración, guníʼ Jesús pa racaláʼdxinu gápanu ti guendanabani ni qué zaluxe, naquiiñeʼ gunibiáʼ chaahuinu Jiobá ne Xiiñiʼ (Juan 17:3). Laaca Dios zacané laanu gunibiaʼnu laa ne cadi guchéʼnenu laa. Ximodo rúnibe ni yaʼ. Riquiiñebe xquídxibe. Gadxé de ni runi guidxilayú stiʼ Binidxabaʼ de ni runi xquidxi Dios, purtiʼ xquidxi Dios runi libru ne revista, videu ne nuu ti página lu Internet ra rihuinni cosa ni rusiidiʼ laanu xi naquiiñeʼ gúninu para gápanu guendanabani ni qué zaluxe. Xquidxi Dios laaca rusiidiʼ laanu de Biblia lu ca guendaridagulisaa ni raca ndaaniʼ jma de 110,000 neza binni ridagulisaa ni nuu lu guidubi Guidxilayú. Ni rizíʼdinu lu ca guendaridagulisaa ne lu ca guendaridagulisaa roʼ racané cani laanu gápanu jma confianza Jiobá ne guni crenu cani naguixhe íquebe gúnibe (Hebreos 10:24, 25).

12. Xi riníʼ guichagananu «ti xpinni Señor» yaʼ.

¹² Pa racaláʼdxinu guichagananu, naquiiñeʼ gápanu stale cuidadu. Biblia cayabi laanu cadi naquiiñeʼ guzulú gunibiaʼnu ti binni ni qué runi ni  na Jiobá, purtiʼ maʼ gadxé laanu cásica biaaniʼ ne guelacahui (2 Corintios 6:14). Biblia laaca riníʼ naquiiñeʼ guichagananu «ti xpinni Señor» (1 Corintios 7:39). Ndiʼ riníʼ naquiiñeʼ guichagananu ti testigu si stiʼ Jiobá ni maʼ guyuunisa ne zinanda ca ley stiʼ Dios. Pa guichagananu ti binni ni nadxii Jiobá, zacanebe laanu guzúʼbanu stiidxaʼ Dios.

13. Xi biʼniʼ mandar Jiobá ca israelita.

¹³ Nanna Jiobá xii nga jma galán para laanu. Ne qué rusaanabe de gábibe ca xpínnibe guichaganacaʼ né ti binni si ni runi ni nabe. Jiobá biʼniʼ mandar ca israelita cadi guichaganacaʼ ca binni ni runi adorar xcaadxi dios. Xiñee yaʼ. Purtiʼ ca binni riʼ zucaacabe ca israelita gúnicaʼ ni na xcaadxi dios. Ne laaca gudxi Jiobá laacabe pa qué gulábicabe laa, guizáʼ zadxiichiné laacabe ne zunitilú laacabe (Deuteronomio 7:3, 4).

14, 15. Xi bizaaca Salomón pur qué nuzuubaʼ stiidxaʼ Jiobá.

¹⁴ Dxi beeda gaca Salomón rey stiʼ guidxi Israel, gunábabe Jiobá gacané laabe gácabe ti binni nuu xpiaaniʼ. Bicabi Jiobá oración stibe, ne nabé binibiáʼ binni Salomón purtiʼ guca ti rey guizáʼ nuu xpiaaniʼ ne pur gupa ti guidxi nabé ricu. Biblia na dede ti reina de sti guidxi yeganna laabe purtiʼ gúdxicabe laa nabé nuu xpiaanibe ne nabé ricu laa. Ne ora binibiaʼbe Salomón, nabé bidxagayaabe (1 Reyes 10:7). Neca zacá, despué biʼniʼ Salomón xiixa ni rusiidiʼ laanu xi zanda guizaacanu pa qué guzúʼbanu stiidxaʼ Jiobá ne guichagananu tuuxa ni qué runi ni nabe (Eclesiastés 4:13).

¹⁵ Neca bidii Jiobá Salomón stale cosa galán la? qué nuzuubabe diidxaʼ ne gúpabe «stale xheelabe de sti guidxi». ¡Beeda gápabe 1,000 gunaa! Xi bizaaca Salomón pur qué nuzuubaʼ stiidxaʼ Jiobá yaʼ. Dxi maʼ nagólabe, maʼ qué ñúnibe ni na Jiobá ne bíʼnibe jma pur ca gunaa que (1 Reyes 11:1-6). Pa Salomón neca guca ti hombre nuu xpiaaniʼ bizaaca ndiʼ, xi zándaca guizaacanu yaʼ. Nga runi cadi lica naquiiñeʼ guiníʼ íquenu guichagananu tuuxa ni cadi nadxii Jiobá.

16. Pa ti Testigu maʼ bichaganáʼ ti binni ni cadi cayuni ni na Jiobá, xi naquiiñeʼ guni.

¹⁶ Yanna, pa tuuxa gueeda gaca Testigu peru xheelabe qué runi ni na Jiobá yaʼ. Biblia rabi ca gunaa ni maʼ bichaganáʼ ca diidxaʼ riʼ: «Hermana caʼ, lauzuuba stiidxa xheela tu, purti pa nuu de laaca qué runi cre stiidxa Cristu la? zándaca iguudxi» (1 Pedro 3:1). Xi riníʼ ca diidxaʼ riʼ yaʼ. Pa gunaa ca guni stipa pur gaca nachaʼhuiʼ né xheelaʼ ne chinanda ca conseju stiʼ Biblia, zándaca guuyaʼ xheelabe zeʼ dxi jma nacháʼhuibe ne quixhe ique gaca testigu stiʼ Jiobá. Sicaríʼ maʼ bizaaca stale guendaxheelaʼ. Ca hermanu ni maʼ bichaganáʼ ti gunaa ni cadi naca Testigu laaca naquiiñeʼ chinándacaʼ conseju ni zeeda lu 1 Pedro 3:1.

17, 18. 1) Xi gucané Noé para bilá dxi biaba nisaguié naroʼbaʼ que. 2) Xi gucané ca primé xpinni Cristu para bilacaʼ dxi binitilú Jerusalén.

¹⁷ Pa guidxaaganu binni malu zanda gucaacaʼ laanu guchéʼnenu Jiobá. Peru  pa guidxaaganu binni nachaʼhuiʼ zanda gacanecaʼ laanu guzúʼbanu stiidxaʼ Jiobá. Guiníʼ íquenu ejemplu stiʼ Noé. Ca dxi bibánibe, bidxá Guidxilayú riʼ de binni ni riníʼ ique puru si cosa malu (Génesis 6:5). Nabé malu ca binni que, ngue runi gudixhe ique Jiobá gunitilú laacabe. Peru lu Biblia rieeteʼ guca Noé ti hombre nachaʼhuiʼ ne qué nusaana de nuzuubaʼ stiidxaʼ Jiobá (Génesis 6:7-9). Xi gucané laabe guzuubabe diidxaʼ yaʼ.

¹⁸ Qué ñuu dxi nidxaaga Noé ca binni ni cadi nadxii Jiobá, sínuque guyuube gaxha de xheelabe, ca xiiñibe ne xheelaʼ ca xiiñibe, ne guirácabe gudixhe íquecabe guzáʼcabe arca que ne gucheechecabe diidxaʼ (2 Pedro 2:5). Ndiʼ gucané laacabe para bilácabe ora biaba nisaguié naroʼbaʼ que. Ca dxi stinu riʼ, guiranu zanu de Noé ne familia stiʼ. Nga runi, riéchenu purtiʼ bizuubacabe diidxaʼ ne qué nidxaagacabe binni malu. Zaqueca ca primé xpinni Cristu bizuubacaʼ diidxaʼ ne qué nidxaagacaʼ ca binni ni cadi nadxii Jiobá. Ndiʼ gucané laacabe para bilácabe dxi binitilú Jerusalén lu iza 70 (Lucas 21:20-22).

19. Pa racaláʼdxinu guzúʼbanu stiidxaʼ Jiobá, xi naquiiñeʼ gúninu.

¹⁹ Pa racaláʼdxinu guzúʼbanu stiidxaʼ Jiobá lu ca últimu dxi riʼ, xi naquiiñeʼ gúninu yaʼ (1 Corintios 16:13; Proverbios 13:20). Naquiiñeʼ chinándanu ejemplu stiʼ Noé, binnilidxi ne ca primé xpinni Cristu. Qué chuʼ dxi gaca xhamígunu ca binni ni cadi nadxii Jiobá. Cadi guiaandaʼ laanu nuu millón de xpinni Cristu ni zanda gaca xhamígunu. Laacaʼ zanda gacanecaʼ laanu guzúʼbanu diidxaʼ ne guilanu dxi gueeda fin stiʼ guidxilayú riʼ ne guibáninu ndaaniʼ Paraísu. Nga runi, cuí chaahuinu ca xhamígunu lu ca últimu dxi riʼ.