1, 2. 1) Xiñee gunnaxhii Jesús Marta. 2) Xii nga ni cadi jneza biʼniʼ Marta.

XI RINÍʼ íqueluʼ ora runadiágaluʼ de Marta, bizaʼnaʼ Lázaro. Biblia na biiyaʼ Jesús laabe casi tobi de ca binni ni jma xhamiga ne nabé gunnaxhii laabe. Peru laaca gunnaxhii Jesús ne biʼniʼ respetar xcaadxi gunaa. Casi María, sti bizaʼnaʼ Lázaro. Ne laaca nabé gunnaxhiibe jñaabe, María (Juan 11:5; 19:25-27). Peru, xiñee gunnaxhii Jesús Marta yaʼ.

² Nabé gunnaxhii Jesús Marta, purtiʼ guca ti gunaa ni riuulaʼdxiʼ gudii ni napa ne guizáʼ runi dxiiñaʼ, peru jma gunnaxhii Jesús laabe, purtiʼ gúpabe stale fe. Nánnabe Jesús nga Mesías ni cabeza binni ne runi crebe guiráʼ ni rusiidiʼ (Juan 11:21-27). Neca zaqué, laaca guyuu ora bicheebe, purtiʼ binni gulené donda laabe. Guzéʼtenu ti ejemplu. Ti dxi guyé Jesús ra lidxi Marta ne María, peru bidxiichiné Marta benda. Óraque gúdxibe Jesús: «Señor, ñee nouʼ jneza cayuni bendaʼ, cudii lugar cayune irá ndi stube la? Gudxi laabe gueda acané be naa» (biindaʼ Lucas 10:38-42). Xiñee  bidxiichi Marta yaʼ. Ne xi rizíʼdinu de ni bicabi Jesús laabe.

3, 4. 1) Xiñee guníʼ Jesús galán ni biʼniʼ María. 2) Xi biʼniʼ Marta óraque. (Biiyaʼ dibuju ni zeeda ra ruzulú tema riʼ.)

³ Nabé nayecheʼ nuu Jesús purtiʼ biʼniʼ invitar Marta ne María laa ra lídxicaʼ, ngue runi bizulú bisiidiʼ laacabe stale cosa risaca. Rapa María gana guiziidiʼ biaʼ gándatiʼ de Maestru ni jma nanna gusiidiʼ, ngue runi nagueendaca gurí para gucaadiaga. Peru, xi biʼniʼ Marta yaʼ. Laa laaca ñanda nusaana ni cayuni para nucaadiaga Jesús. Ne dede niníʼ Jesús galán ñúnibe zaqué.

⁴ Peru bicaa ique Marta sti cosa, lugar de nucaadiaga. Cayúnibe guendaró ne xcaadxi cosa para guni tenderbe Jesús ti chuʼ nayecheʼ. Ora bíʼyabe cadi cayacané béndabe laabe la? bidxiichibe ne gúdxibe ni Jesús. Nanna Jesús cayuni Marta stale cosa. Ngue runi, né guendarannaxhii gudxi Jesús laabe: «Ah Marta, Marta [...]. Aque stale ni naguu xaíque luʼ, ne nuu lu xizaa pur laa» xa. Ne gudxi Jesús laabe ñanda ñúnibe ti guendaróhuiiniʼ si. De raqué maʼ gudxi Jesús María galán ni biʼniʼ ora bicaadiaga. Guníʼ Jesús gulí María ni jma risaca ne guirutiʼ zaxhaʼ ni laa. Gudiʼdiʼ si tiempu, zándaca bisiaandaʼ María xi gudó dxi que, peru qué ñuu dxi ñaandaʼ laa guiráʼ ni guníʼ Jesús. Jma de 60 iza despué, guníʼ apóstol Juan: «Nadxii Jesús [...] Marta ne María» (Juan 11:5). Racá ridúʼyanu gucuaa Marta conseju bidii Jesús laa ne bíʼnibe ni na Jiobá biaʼ dxi bibánibe.

5. 1) Xiñee nagana gúninu ni na Jiobá tiempu riʼ sin guchiiñaʼ xiixa laanu. 2) Xi guendarinabadiidxaʼ zacábinu lu tema riʼ.

⁵ Maca dede dxiqué nga nuu stale cosa ni rucueeza ca xpinni Jiobá de guni adorarcaʼ laabe. Peru yanna riʼ jmaruʼ si maʼ stale cosa nga ni zanda gucueeza laanu de gúninu xhiiñaʼ Jiobá. Revista La Atalaya 1 stiʼ abril iza 1959 guníʼ naquiiñeʼ chuʼ ca xpinni Cristu cuidadu ti cadi guxheleʼ ca cosa nacubi nuu lu Guidxilayú riʼ laacaʼ de Dios. Maca dede dxiqué nga ruluíʼ guiráʼ dxi caree ti cosa nacubi. Ca ndiʼ nga cani nuu de moda dxiqué: revista, radiu, cine ne televisión. Guníʼ revista que zándaca zahuinni xcaadxi cosa ni zucueeza laanu de gúninu xhiiñaʼ Dios ora mayaca guiluxe guidxilayú riʼ. Ne ngapeʼ nga ni cayaca. Yanna riʼ nuu stale cosa ni zuxheleʼ laanu de Dios pa qué chuʼnu cuidadu. Xi zanda gúninu para chinándanu ejemplu stiʼ María ne gúninu ni na Dios sin guchiiñaʼ xiixa laanu yaʼ.

6. Ximodo riquiiñenu ca cosa ni cayaca inventar tiempu riʼ.

⁶ Laanu, ca xpinni Jiobá, riquiiñenu ca cosa ni cayaca inventar tiempu riʼ para gucheechenu diidxaʼ. Guzéʼtenu ti ejemplu. Ante guzulú Primera Guerra Mundial ne dxi maʼ cayaca guerra que, bicheechenu diidxaʼ né ti programa ra rihuinni dibuju de color, sonidu ne videu. Biree lani «Foto-Drama de la Creación». Gucané programa riʼ para gunda biziidiʼ millón binni de stale guidxi roʼ maʼ cadi candaa diʼ zedané Jesús guendariuudxi lu Guidxilayú. De raqué maʼ biquiiñenu radiu para bisíʼdinu millón binni de Reinu stiʼ Dios lu guidubi Guidxilayú. Yanna riʼ maʼ riquiiñenu Internet para gucheechenu diidxaʼ ra nuu guiráʼ binni, dede ra nuu ca binni nabeza jma zitu.

7. 1) Xiñee cadi naquiiñeʼ guibáninu para si iquiiñenu «ni nuu ndaaniʼ guidxilayú». 2) Xidé naquiiñeʼ chuʼnu cuidadu. (Biiyaʼ nota stini.)

 ⁷ Apóstol Pablu guníʼ cadi guibáninu para si iquiiñenu «ni nuu ndaaniʼ guidxilayú» (biindaʼ 1 Corintios 7:29-31). Nga runi, naquiiñeʼ chuʼnu cuidadu ti cadi gunítinu stale tiempu lu ca cosa ni nuu lu Guidxilayú riʼ. Dxandíʼ cadi malu diʼ guiráʼ ni. Peru, pa qué gúninu ni na conseju bidii Pablu la? zunítinu stale tiempu lu ca cosa stiʼ guidxilayú riʼ. Ne guni laacani zusaana de guni adorarnu Jiobá, nga ndaʼ nga ni jma risaca (biindaʼ Efesios 5:15-17). Paraa nga zándaca gunítinu tiempu yaʼ. Lu caadxi cosa ni qué ruluíʼ pa malu laacaʼ, casi gúʼndanu libru ne revista, guidúʼyanu televisión, chizanu ca lugar ra riuulaʼdxiʼ binni cheʼ, chisinu, guséʼndanu mensaje, guidúʼyanu noticia o tu biʼniʼ ganar lu ti deporte, o guyúbinu xi aparatu nacubi biree o xcaadxi luju. Para chupa chonna binni la? reeda gaca ca cosa riʼ casi ti viciu (Eclesiastés 3:1, 6). *

8. Xiñee jma risaca gannaxhiinu Jiobá ne cadi gannaxhiinu ca cosa nuu lu Guidxilayú.

⁸ Binidxabaʼ racalaʼdxiʼ gucáʼ íquenu ca cosa nuu lu Guidxilayú riʼ ne gusaana de gúninu xhiiñaʼ Jiobá. Gucaláʼdxibe ñúnibe ni né ca primé xpinni Cristu, ne ngaca nga racaláʼdxibe gúnibe né laanu (2 Timoteo 4:10). Peru Biblia cayabi laanu cadi gannaxhiinu ca cosa nuu lu Guidxilayú, sínuque gannaxhiinu Jiobá. Xiñee yaʼ. Purtiʼ zacatiʼ nga zuzúʼbanu stiidxabe ne zaca xhamígunu laabe (1 Juan 2:15-17). Nga runi naquiiñeʼ gatananu para gúʼyanu pa cabeechú ca cosa nuu lu Guidxilayú riʼ laanu. Pa ruluíʼ zacá ni la? naquiiñeʼ guchaʼnu modo laanu.

9. 1) Xii nga ni jma naquiiñeʼ gucaa ique ca discípulo stiʼ Jesús. 2) Xi ejemplu bidii Jesús laacabe.

⁹ Maʼ bidúʼyanu bisiidiʼ Jesús Marta cadi gucaa ique ca cosa ni huaxiéʼ risaca. Ne ngaca nga ni bisiidibe ca discípulo stibe. Guluube gana laacaʼ gúnicaʼ xhiiñaʼ Reinu ne gúnicaʼ ni na Jiobá (biindaʼ Mateo 6:22, 33). Ne bisaanabe ti ejemplu galán para laacaʼ, purtiʼ qué lica ñápabe stale cosa risaca, nin ti yoo o ti layú (Lucas 9:58; 19:33-35).

10. Xi ejemplu galán bisaana Jesús para laanu.

 ¹⁰ Qué nudii Jesús lugar ñuu xiixa ni nucueeza laa de nucheeche diidxaʼ. Guzéʼtenu xi guca ti biaje, dxi cucheechebe diidxaʼ ndaaniʼ guidxi Capernaum. Bilúxesibe, gucalaʼdxiʼ stale binni nucuudxi laabe para ñaanabe xquídxicaʼ xhupa xhonna gubidxa. Peru, xi biʼniʼ Jesús yaʼ. Qué ñúnibe ni gunabaʼ ca binni que, sínuque bisiénebe laacaʼ naquiiñeʼ chebe xcaadxi guidxi para gucheechebe stiidxaʼ Reinu (Lucas 4:42-44). Ne zaqué bíʼnibe ni. Guzabe zitu para bisiidibe stale binni de Dios. Neca gúcabe binni sin donda, laaca guleebe tiempu para guiziiláʼdxibe ora maʼ bidxágabe (Lucas 8:23; Juan 4:6).

11. 1) Xi biʼniʼ Jesús ora gudxi ti hombre laabe gacanebe laa gaca chaahuiʼ ti guendanagana stiʼ. 2) Xi bisiidiʼ Jesús ca discípulo stiʼ.

¹¹ Ti dxi cusiidiʼ Jesús ti cosa nabé risaca ca discípulo stiʼ. Málasi bidxiña ti hombre ra nuube ne gunabaʼ laabe gacanebe laa gaca chaahuiʼ ti guendanagana stiʼ. Gúdxibe Jesús: «Maistru, gudxi biche icaa nia laa biaʼca ni bisaana né bixhoze laadu». Peru qué ñacané diʼ Jesús hombre riʼ. Xiñee yaʼ. Purtiʼ cusiidibe ca discípulo stibe ne qué racaláʼdxibe chuʼ tu guchiiñaʼ laabe. Ni bíʼnibe óraque nga bisiidibe laacaʼ cadi naquiiñeʼ chuʼcaʼ xizaa pur ca cosa nuu lu Guidxilayú, purtiʼ zabeechúcani laacaʼ ne zusaana de gúnicaʼ ni na Dios (Lucas 12:13-15).

12, 13. 1) Xi biʼniʼ Jesús ndaaniʼ yuʼduʼ stiʼ Jerusalén. 2) Xi biʼniʼ Jesús ora gudxi Felipe laa nuu caadxi binni gunibiáʼ laa.

¹² Nabé nagana modo bibani Jesús ca últimu dxi guyuu lu Guidxilayú (Mateo 26:38; Juan 12:27). Nánnabe zacanabe stale ne zuuticabe laabe. Peru laaca nánnabe naquiiñeʼ gúnibe stale cosa ante gátibe. Guzéʼtenu ti ejemplu. Gaayuʼ gubidxa ante gátibe, guyuube Jerusalén dxíʼbabe ti burruhuiiniʼ. Bidxaagalú stale binni laabe casi rey sticaʼ (Lucas 19:38). Sti dxi que, guca Jesús nadxibalú para guladxi ca binni cutoo ndaaniʼ yuʼduʼ que, purtiʼ ribáʼnacaʼ stiʼ binni para gápacaʼ jma bidxichi (Lucas 19:45, 46).

¹³ Guyé caadxi griegu Jerusalén para gúnicaʼ Pascua né ca judíu. Ora bíʼyacabe ni biʼniʼ Jesús ndaaniʼ yuʼduʼ que la? guizáʼ bidxagayaacabe. Ngue runi gunabadiidxacabe apóstol Felipe pa zanda gúʼyacabe Jesús ne guiniʼnécabe laa. Peru qué niná diʼ Jesús. Qué racaláʼdxibe gánnabe tuu nga ca binni ni nuu pur laabe o ni gacané laabe. Ni jma risaca para laabe nga gúnibe ni biʼniʼ mandar Jiobá laabe, gátibe pur laanu. Óraque bisietenaláʼdxibe ca discípulo stibe mayaca gátibe ne laaca naquiiñeʼ chuʼcaʼ listu para gúnicaʼ zaqueca. Ne gúdxibe laacaʼ zusisaca Jiobá laacaʼ ne zacaacaʼ guendanabani ni qué zaluxe pa gúnicaʼ ni na Dios dede ora gáticaʼ. Nanna dxíchinu gudxi Felipe ca diidxaʼ riʼ ca griegu que (Juan 12:20-26).

14. Xiruʼ biʼniʼ Jesús dxi bibani, aparte de bicheeche diidxaʼ.

¹⁴ Nabé bicaa ique Jesús gucheeche diidxaʼ dxi guyuu lu Guidxilayú. Peru laaca guleebe tiempu para gúnibe xcaadxi cosa. Guzéʼtenu ti ejemplu. Nánnanu guyebe ti guendaxheelaʼ, ne raqué bíʼnibe nisa vinu chaʼhuiʼ (Juan 2:2, 6-10). Laaca gudónebe ca xhamígube ra lídxicaʼ ora biʼniʼ invitarcaʼ laabe ne ra lidxi xcaadxi binni ni riuulaʼdxiʼ ganna xi cusiidibe (Lucas 5:29; Juan 12:2). Peru ni jma risaca bíʼnibe nga guleebe tiempu para guni orarbe, para guni meditarbe ne para guiziiláʼdxibe (Mateo 14:23; Marcos 1:35; 6:31, 32).

15. 1) Xi guníʼ apóstol Pablu naquiiñeʼ guni ca xpinni Cristu. 2) Xi ejemplu galán bisaana Pablu para laanu.

¹⁵ Apóstol Pablu na zeeda gácanu casi binni ni rié lu ti carrera. Pa racaláʼdxinu chindanu ra riluxe carrera stinu la? naquiiñeʼ gusaananu guiráʼ ni rucueeza laanu o ni ruchiiñaʼ laanu (biindaʼ Hebreos 12:1). Ne galán ejemplu bisaana Pablu para laanu. Ñanda ñácabe ti xaíque yuʼduʼ nabé ricu ne ñunibiáʼ binni laabe. Peru bisaanabe ni ne bicaa íquebe ca cosa «ni dxandí risaca». Biquiiñebe tiempu stibe para gucheechebe diidxaʼ ne guyebe stale lugar, casi Siria, Asia Menor, Macedonia ne Judea. Gudixhe íquebe guicaabe premiu stibe guibáʼ: guendanabani ni qué zaluxe. Ngue runi guniʼbe: «Rusiaanda irá ni ma udiʼdiʼ, ne rudxiee luaʼ ni cabeza naa neza ziaaʼ, ti ganda chindaya icaa premiu» (Filipenses 1:10; 3:8, 13, 14). Ne cumu solteru laabe la? gúpabe stale tiempu para bíʼnibe xhiiñaʼ Dios purtiʼ gastiʼ ni nuchiiñaʼ laabe (1 Corintios 7:32-35).

16, 17. 1) Pa maʼ bichagananu o pa coʼ, ximodo zanda chinándanu ejemplu stiʼ Pablu. 2) Ximodo yenanda ti guendaxheelaʼ de Gales ejemplu stiʼ Pablu.

¹⁶ Yanna riʼ nuu stale xpinni Dios ni maʼ gudixhe ique cadi guichaganáʼ ti ganda guni jma lu xhiiñaʼ Jiobá (Mateo 19:11, 12). Stale biaje la? jma napa ca solteru tiempu que cani maʼ bichaganáʼ. Peru pa maʼ bichagananu o pa coʼ, naquiiñeʼ chuʼnu cuidadu ti cadi chuʼ xiixa ni gucueeza laanu de gúninu ni na Jiobá. Pa gudiʼnu cuenta runítinu stale tiempu lu xiixa ni huaxiéʼ risaca la? galán gusaananu ni ti ganda gúninu jma lu xhiiñaʼ Jiobá.

¹⁷ Guidúʼyanu ejemplu stiʼ Mark ne Claire, ti guendaxheelaʼ de guidxi Gales (Reino Unido). Gúcacabe precursor dxi binduuxecabe scuela, dxi solteru laacabe. Despué bichaganácabe, ne qué nusaana de ñácacabe precursor. Peru rápacabe gana gúnicabe jma lu xhiiñaʼ Jiobá, ngue runi gudixhe íquecabe guchaacabe modo nabánicabe. Hermanu Mark na bisaanacaʼ lídxicaʼ ni napa chonna cuartu ne xhiiñacaʼ. Gucané ndiʼ laacabe para chigúnicabe dxiiñaʼ lu ti grupu de construcción internacional. Lu gande iza ni maʼ gudiʼdiʼ riʼ, maʼ gucanécabe ra gurí stale Yoo stiʼ Reinu ndaaniʼ caadxi guidxi roʼ nuu África. Nuu biaje rirá xpuéltucabe, peru qué rusaana de gapa Jiobá laacabe. Claire na gástiruʼ sti cosa ni jma rusiecheʼ laacabe que gúnicabe ni na Jiobá guiráʼ dxi. Maʼ nápacabe stale xhamígucabe yanna riʼ ne qué huayuu dxi guiaadxaʼ laacabe ni caquiiñecabe. Laaca guniʼbe pabiáʼ nayecheʼ nuucabe ne qué zanda diʼ guchaagacabe ni né guiráʼ ni bisaanacabe para gúnicabe xhiiñaʼ Jiobá. Xcaadxi hermanu ni runi xhiiñaʼ Jiobá casi guendaxheelaʼ riʼ la? laaca nuucaʼ nayecheʼ. *

18. Xi naquiiñeʼ guinabadiidxanu laca laanu.

¹⁸ Guiranu naquiiñeʼ guinabadiidxanu laca laanu: «Ñee caquiiñeʼ guneʼ xhiiñaʼ Jiobá né stale gana cásica bineʼ ni dxiqué la? Ñee jma cucaaʼ iqueʼ ca cosa ni huaxiéʼ risaca nuu lu Guidxilayú riʼ la? Pa gudieeʼ cuenta zacá ni, xi caquiiñeʼ guneʼ yaʼ». Zándaca caquiiñeʼ cueenu tiempu para guidúʼndanu ne guiénenu ni rusiidiʼ Biblia. Lu sti tema ca, zadúʼyanu ximodo zanda gúninu ni.