Ni gusiiditu ca xiiñitu

Qué ñuu dxi nusaana Marcos de ñuni xhiiñaʼ Dios

G UIDAPAʼ libru zeeda lu Biblia ni caníʼ guiráʼ ni biʼniʼ Jesús la? Marcos bicaa tobi de ca libru ca, ne ni bicaabe ca nga ni jma nachucu ne ni jma nagueenda riene binni. Peru tu guca Marcos yaʼ. Ñee raʼbuʼ binibiaʼbe Jesús la? *... Chiguidúʼyanu xi guiráʼ guendanagana gudíʼdibe ne xiñee qué ñuu dxi nusaanabe de ñúnibe xhiiñaʼ Dios.

Primé biaje rieeteʼ lá Marcos lu Biblia nga despué de biʼniʼ mandar rey Herodes Agripa guideguyoo apóstol Pedru. Ti gueela guyé ti ángel yendee Pedru ndaaniʼ lidxi guiibaʼ, ne casi bireebe nagueendaca guyebe ra lidxi María, jñaa Marcos, laacaʼ nabézacaʼ Jerusalén. Bizaaca ndiʼ gudiʼdiʼ si chii iza de guti Jesús lu Pascua stiʼ iza 33 que (Hechos 12:1-5, 11-17).

Ñee nannuʼ xiñee guyé Pedru ra lidxi María la?... Zándaca guyebe raqué purtiʼ runibiaʼbe binnilidxi María ne nánnabe ridagulisaa ca discípulo stiʼ Jesús raqué. Bernabé, xprimu Marcos, maʼ napa tiempu de naca discípulo stiʼ Jesús, zándaca bizulube dede lu saa stiʼ Pentecostés stiʼ iza 33. Lu Biblia rieeteʼ nabé nachaʼhuiʼ gúcabe ne cani nacubi guca discípulo stiʼ Jesús. Ngue runi, zándaca binibiáʼ Jesús María, ne xiiñibe, Marcos, ne sobrínube Bernabé (Hechos 4:36, 37; Colosenses 4:10).

Lu libru ni bicaa Marcos, bizeetebe ni bizaaca gueelaʼ gunaazeʼ ca xhenemigu Jesús laa. Laaca ruzeetebe de ti hombrehuiiniʼ ni nacu ti lari sisi si ni bixooñeʼ ora gunaazecabe Jesús. Ñee nannuʼ tu hombrehuiiniʼ que la?... Zándaca laca Marcos ngue. Zándaca ora bíʼyabe maʼ huaxhinni biree Jesús ne ca discípulo stiʼ la? nagueendaca gúcube xhábabe ne yenándabe laacaʼ (Marcos 14:51, 52).

Marcos biniisi lade binni ni biʼniʼ ni na Dios. Zándaca nuube lade ca binni ni biaba espíritu santu luguiáʼ lu Pentecostés stiʼ iza 33. Ne laaca guca xhamígube stale xpinni Dios, casi apóstol Pedru, ne laaca guzanebe xprímube Bernabé ra yegucheeche diidxaʼ. Chonna iza despué de guniʼné Jesús Saulo lu ti visión la? Bernabé gucané Saulo ti ganda gunibiáʼ Pedru. Gudiʼdiʼ si caadxi iza, guyé Bernabé Tarso yeyubi Saulo (Hechos 9:1-15, 27; 11:22-26; 12:25; Gálatas 1:18, 19).

Lu iza 47 gulícabe Bernabé ne Saulo para gácacaʼ misioneru. Ne yenécabe Marcos, peru qué nindaa de ngue bisaana Marcos laacabe ne bibiguetaʼ Jerusalén,  qué rieeteʼ diʼ xiñee bíʼnibe ni. Saulo, ni rábicabe Pablu guidxi Roma que, nabé bidxiichi pur ni biʼniʼ Marcos, ne qué nutiidiláʼdxibe donda stiʼ purtiʼ nabe cadi jneza diʼ ni biʼniʼ Marcos laacabe (Hechos 13:1-3, 9, 13).

Bibiguetaʼ si Pablu ne Bernabé guniʼcaʼ pabiáʼ galán guyeni laacaʼ lu biaje que (Hechos 14:24-28). Gudiʼdiʼ si caadxi beeu, gudixhe íquecabe chigánnacabe ca xpinni Cristu sti biaje ca lugar ra maca yegucheechecabe diidxaʼ que. Bernabé na chiné Marcos, peru ximodo raʼbuʼ biiyaʼ Pablu ngue yaʼ... Laabe qué ñuuláʼdxidibe ni guníʼ Bernabé que, purtiʼ bisaana Marcos laacabe dxi yenécabe laa ti biaje ne bibiguetaʼ ra lidxi. Ne dxi que bizaaca xiixa ni nabé guluu triste Marcos.

Pablu ne Bernabé nabé bidxiichicaʼ dede gudinde diidxacaʼ, ne cada tóbicaʼ guyecaʼ gadxé gadxé ladu. Bernabé yené Marcos para gucheechecaʼ diidxaʼ Chipre, ne Pablu yené Silas yegánnacaʼ cani nacubi guca xpinni Cristu, casi maca biaananebe Bernabé gúnicabe. Zándaca nabé feu biʼniʼ sentir Marcos purtiʼ pur laabe gudinde Pablu ne Bernabé (Hechos 15:36-41).

Qué gánnadinu xiñee bibiguetaʼ Marcos ra lidxi, peru zándaca bíʼnibe ni purtiʼ para laabe jma jneza gúnibe ni. Modo tiica gúcani, peru Bernabé bidii cuenta maʼ qué zúnirube ni. Ne zaqué gúcani, maʼ qué ñúniruʼ Marcos zaqué. Despué de ngue yené Pedru laabe yegánnacabe ca xpinni Cristu nuu Babilonia. Ne de raqué Pedru biseendaʼ ti carta ra guníʼ laa ne Marcos cuseendacaʼ diuxi ne luni gúdxibe laa «xiiñe» (1 Pedro 5:13).

 Rihuinni dxíchica Pedru ne Marcos nabé guca xhamígucaʼ ne bíʼnicabe xhiiñaʼ Jiobá tobi si. Ne zacá ni purtiʼ lu libru ni bicaa Marcos bicaa stale cosa, guiráʼ xixé ni gudxi Pedru laabe bizaaca dxi guzané Jesús. Ne tobi de laacani nga ni bicaabe ne ni bicaa xcaadxi discípulo stiʼ Jesús dxi zecaʼ ne ca discípulo stiʼ lu nisadóʼ láʼ Galilea dxi biaba ti bi yooxhoʼ. Lu libru bicaa Marcos zeeda stale cosa ni xcaadxi qué nucaadicaʼ, casi: racá rieeteʼ xi lugar de ndaaniʼ barcu que nisiaasiʼ Jesús ne xi lú naguixhe íquebe, laabe gunda bicaabe ca nga purtiʼ ti binni ni rinaazeʼ benda casi Pedru biiyaʼ cani. Yanna guidúʼyanu zacá ni ra guidúʼndanu ne guchaaganu ni zeeda lu Mateo 8:24, Marcos 4:37, 38 ne Lucas 8:23.

Yanna, dxi biteguyoocabe apóstol Pablu Roma la? guluube gana Marcos pur qué nusaana de ñacané laacabe (Colosenses 4:10, 11). Ne sti biaje dxi biteguyoocabe laabe Roma la? Pablu bicaa ti carta ra nuu Timoteu ne gúdxibe laa chiné Marcos ra nuube purtiʼ nabe «zanda acané» laabe (2 Timoteo 4:11). Rihuinni dxíchica gucuaa Marcos stale ndaayaʼ pur qué nusaanaʼ de ñuni xhiiñaʼ Dios.

[Cani cá ñee yaza]

[Ni caníʼ yaza 24]

GUENDARINABADIIDXAʼ:

❍ Paraa guleza Marcos, ne xiñee zándaca binibiaʼbe Jesús

❍ Tuu nga jma gucané Marcos

❍ Xi ñándaca nucaa Marcos nusaana de ñuni xhiiñaʼ Dios

❍ Ximodo nánnanu gunnaxhii Pablu Marcos despué de biiyaʼ chaahuibe ximodo laa

[Dibuju/foto ni zeeda lu yaza 23]

Ñee nannuʼ tu láʼ hombrehuiiniʼ ni cá raríʼ la? Xi cayúnicabe laabe, ne xiñee

[Dibuju/foto ni zeeda lu yaza 24]

Xi guiráʼ ndaayaʼ gucuaa Marcos pur qué nusaana de ñuni xhiiñaʼ Dios