Cani bisiidiʼ Jesucristu zanda gacanécani lii

«Naa benda para gapa cabe enda nabani ne idxá tipa xpida cabe de enda nayecheʼ.» (JUAN 10:10)

JESUCRISTU beeda ndaaniʼ Guidxilayú riʼ para gacané, cadi para gacanécabe laa. Ni bisiidibe dxi bicheechebe diidxaʼ ca nga ti cosa risaca bisigáʼdebe binni, purtiʼ bisiidibe tuu nga Dios ni dxandíʼ ne xi racalaʼdxiʼ Dios guni binni. Pur guiráʼ ni bisiidibe, millón de binni ni dxandíʼ zinanda Cristu maʼ nabánicaʼ jma galán. a Cani bisiidiʼ Jesús ca laaca racanécani laanu gánnanu xii nga ni jma galán bisigáʼdebe laanu: guendanabani sin donda stibe. Ne zabeendunu stale cosa galán yanna ne despué pa gusisácanu ni bíʼnibe pur laanu.

Ni bisigaʼdeʼ Dios ne Cristu laanu Jesús maca nanna zuniná ca xhenemigu laa ne dede zuuticaʼ laabe (Mateo 20:17-19). Neca zacá, beedabe ndaaniʼ Guidxilayú. Zacá rihuínnini lu ca diidxaʼ ni guniʼbe lu Juan 3:16 ra na: «Purti nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe». Ne despué Jesús peʼ guníʼ beeda «para [gudii] xpida para ilá stale binni» (Mateo 20:28). Yanna, xiñee guniʼbe bidiibe guendanabani stibe ne cadi gúxhacabe ni laabe yaʼ.

Cumu nadxii Dios binni la? gudíxhebe ti modo ganda guilacaʼ de pecadu, ne ni biaananecaʼ pur laani: donda ne guendaguti. Nga runi biseendabe tobi lucha Xiiñibe ni qué gapa donda ndaaniʼ Guidxilayú, para gati pur guiranu. Ne guná Jesús gudii guendanabani stiʼ. Modo gudixe Dios pur ca pecadu stinu riʼ nga ni jma risaca bisigáʼdebe laanu, purtiʼ pur laani zanda guibáninu sin gátinu, nin ti binni guidxilayú qué huayuu dxi guni ti cosa zacá. b

Xi naquiiñeʼ guʼnuʼ Yanna, maʼ ni caquiiñeʼ si nga gusihuínniluʼ pa zusisácaluʼ ni bisigaʼdeʼ Dios laanu. Guníʼ ique ni chiguzéʼtenu riʼ: xi ñuʼnuʼ pa ñuu tuu nudii lii ti caja ni renda guiʼchiʼ regalu. Cadi dxandíʼ nusigaanaluʼ para nicaaluʼ ni ne nudiiluʼ xquíxepeʼ laabe la? Ngaca nga naquiiñeʼ guʼnuʼ ne ni bidii Dios binni guidxilayú. Guiráʼ binni ni racalaʼdxiʼ guicaa ndaayaʼ stini la? naquiiñeʼ gusihuinni dxandíʼ rapa gana guicaani. Ximodo yaʼ.

Maʼ bidúʼyanu guníʼ Jesús, cani gapa si fe laabe nga zacaa guendanabani ni qué zaluxe. Ne rihuinni napa binni fe pur modo nabani (Santiago 2:26). Nga runi, para guihuinni napa ti binni fe la? naquiiñeʼ guni guiráʼ ni bisiidibe ne ni bíʼnibe. Ne para nga naquiiñeʼ gunibiáʼ chaahuiʼ binni laabe ne Bixhózebe. Jesús guníʼ: «Ne zacaa cabe enda nabani ca ra gunibiáʼ cabe lii ne ra gunibiáʼ cabe Jesucristu ni biseenda luʼ. Lii nga tobi lucha Dios ni dxandíʼ» (Juan 17:3).

Cani bisiidiʼ Jesús dxi bicheeche diidxaʼ raca chupa mil iza, bichaacani xquendanabani millón de binni ni nabani lu guidubi Guidxilayú. Ñuuláʼdxiluʼ niziidiluʼ jma de cani guníʼ Jesús la? Ni bisiidiʼ Jesús ca zanda gacaneni lii ne binnilídxiluʼ para cueendutu stale cosa galán yanna ne despué, ñuuláʼdxiluʼ ñánnaluʼ ximodo la? Guniʼné ca testigu stiʼ Jiobá, laacabe zacanécabe lii gánnaluʼ ximodo.

Lu revista riʼ zeeda xcaadxi tema ni cusiidiʼ jma de Jesucristu, hombre ni zanda guchaa xquendanabániluʼ pur guiráʼ ni bisiidiʼ.

[Cani cá ñee yaza]