Ni gusiiditu ca xiiñitu

Qué nusaana Jesús de nuzuubaʼ diidxaʼ

ÑEE raca nagana para lii guzuubaluʼ diidxaʼ la? a... Pa zacá ni la? cadi guizaalaʼdxuʼ, guiranu huazaacanu zacá. Guyuu biaje dede Jesús laaca guca nagana para laa guzuubaʼ diidxaʼ, nannuʼ nga la?...

Tuu nga ca binni ni naquiiñeʼ guzuubaluʼ stiidxaʼ... Naquiiñeʼ guzuubaluʼ stiidxaʼ bixhózeluʼ ne jñaaluʼ. Biblia na: «Baʼdu caʼ, lauzuuba stiidxa bixhoze tu ne jñaa tu, purti nga nga jneza guni ca xpinni Cristu» (Efesios 6:1). Jesús bizuubaʼ stiidxaʼ Bixhoze. Tuu nga Bixhózebe yaʼ... Bixhózepebe nga Jiobá Dios, ne laaca laa nga Bixhózenu (Mateo 6:9, 10). Peru, pa guníʼ íqueluʼ José nga bixhózebe ne María nga jñaabe la? laaca jneza ni. Yanna, ñee nannuʼ ximodo beeda gaca José bixhózebe ne beeda gaca María jñaabe la?...

Ti ángel láʼ Gabriel gudxi María zapa ti xiiñiʼ. Peru, ximodo gaca xiiñibe pa qué huayatanebe nin ti hombre yaʼ. Jiobá chiguni ti milagru ni qué huayuu dxi guihuinni. Ángel que bisiene laabe: «Zeeda Espíritu Santu luguiá luʼ, nga runi zaree chu badu huiini ca para Dios, ne zabi cabe laa Xiiñi Dios» (Lucas 1:30-35).

Jiobá guluu guendanabani stiʼ Jesús, Xiiñibe ni nuu guibáʼ que ndaaniʼ María. Zaqué nga bizulú biniisi Jesús ndaanibe, cásica riniisi guiráʼ baʼduhuiiniʼ ndaaniʼ jñaa. Despué maʼ bichaganáʼ José María. Ne gudiʼdiʼ si biaʼ gaʼ beeu gule Jesús. Stale binni riníʼ ique José nga bixhózepebe, peru José nga gucuaa laabe casi xiiñiʼ. Nga runi, zanda guininu gupa Jesús chupa bixhoze.

Dxi gupa Jesús 12 iza biʼniʼ xiixa ni bisihuinni riuulaʼdxiʼ guni ni na Jiobá, Bixhózebe ni nuu guibáʼ. Guidúʼyanu xi laani. Familia stiʼ Jesús gupa costumbre cheʼ Jerusalén para gúnicaʼ saa stiʼ Pascua, ne zitu rizácabe para chindácabe raqué. Peru ti biaje, dxi zedabíʼcabe Nazaret, bidii José ne María cuenta cadi zeeda diʼ Jesús ne laacabe. Ñuuláʼdxiluʼ ñánnaluʼ ximodo biníticabe laabe la?...

Cadi guiaandaʼ lii, para ca dxi que maʼ napa José ne María xcaadxi xiiñiʼ (Mateo 13:55, 56). Ne laaca zinebe xcaadxi binnilídxibe, casi Jacobo (Santiagu) ne Juan, bixhózebe ne jñaabe, Zebedeu ne Salomé, ne zándaca benda María nga Salomé. Ngue runi guníʼ ique José ne María zeeda Jesús ládecabe (Mateo 27:56; Marcos 15:40; Juan 19:25).

Cumu qué nidxela José ne María Jesús la? nagueendaca bibiguétacaʼ Jerusalén ne bizulú biyubi lúgucaʼ laabe guidubi raqué. Bidxélacabe laabe dede lu guionna gubidxa ndaaniʼ yuʼduʼ. Óraque gunabadiidxaʼ María laabe: «Xiñee ndi canayuʼnu laadu sicaríʼ. Naa ne bixhoʼzo lugu canazá du canayubi du lii». Peru bicabi Jesús laacabe: «Xiñee ndi canayubi tu naa. Ñee qué ganna tu pa naquiiñe gune xhiiña Bixhoze la?» (Lucas 2:45-50).

 Ñee raʼbuʼ cadi jneza ngue bicabi Jesús laacabe zaqué la?... Zándaca maca nanna José ne María nabé riuulaʼdxiʼ Jesús cheʼ ra lidxi Dios (Salmo 122:1). Ne zándaca guníʼ ique Jesús primeca ndaaniʼ yuʼduʼ que nga nuyubi bixhoze ne jñaa laa, cadi dxandíʼ la?... Nabé xadxí guníʼ ique María ca diidxaʼ guníʼ Jesús que.

Ñee bizuubaruʼ Jesús stiidxaʼ bixhoze ne jñaa despué de ni bizaaca riʼ la?... Biblia na: «Bigueta né be laaca Nazaret ne bizuuba be stiidxa caʼ» (Lucas 2:51, 52). Xi rusiidiʼ ejemplu stibe lii... Cadi dxandíʼ rusiidini lii naquiiñeʼ guzuubaluʼ stiidxaʼ bixhózeluʼ ne jñaaluʼ la?

Maʼ biiyuʼ la? bizuubaʼ Jesús diidxaʼ. Neca guyuu biaje guca nagana para laabe gúnibe ni guníʼ Bixhózebe ni nuu guibáʼ la? bizuubabe diidxaʼ.

Jiobá biseendaʼ laabe ndaaniʼ Guidxilayú riʼ para gátibe pur binni. Gueelaʼ ante gati Jesús que, gucaláʼdxibe pa ñanda si nuchaa Dios ni maʼ gudixhe ique guni (Lucas 22:42). Neca zaqué, bizuubabe stiidxaʼ Bixhózebe. Biblia na «udiʼdi [Jesús] irá enda naná que para biziidi be uzuuba be diidxaʼ» (Hebreos 5:8). Ñee zanda gúninu cásica biʼniʼ Jesús ca la? Ñee zuzúʼbanu diidxaʼ neca gácani nagana para laanu la?...

[Cani cá ñee yaza]

GUENDARINABADIIDXAʼ:

▪ Ximodo beeda gaca María jñaa Jesús, ne ximodo beeda gapa Jesús chupa bixhoze.

▪ Xiñee qué nudii José ne María cuenta pa qué guinni Jesús ládecaʼ.

▪ Paraa guníʼ ique Jesús nuyubi bixhoze ne jñaa laa.

▪ Xi riziidiluʼ de ejemplu stiʼ Jesús.

[Dibuju/foto ni zeeda lu yaza ||31]

Xiñee raʼbuʼ naquiiñeʼ ñe José ne María ndaaniʼ yuʼduʼ que primeru ora canayúbicaʼ Jesús.