Cadi gudiiluʼ lugar quítecabe lii

MIGUEL DE CERVANTES nga ti hombre de España ni nabé runibiáʼ binni. Ra bizulú siglu XVII, guleebe ti novela ni láʼ: El ingenioso hidalgo don Quijote de La Mancha. Novela riʼ nabé runibiáʼ binni ni lu guidubi naca Guidxilayú. Hombre ni cuzeetebe lu novela ca nabé guyuulaʼdxiʼ guʼndaʼ historia ra cayeeteʼ de caadxi hombre nadxibalú. Ca hombre que nácucaʼ traje de guiibaʼ ni ruzaaniʼ casi racu soldadu ne zecaʼ para gulacaʼ caadxi baʼdudxaapaʼ sicarú ni cadíʼdicaʼ lu guendanagana. Cumu nabé guyuulaʼdxiʼ don Quijote ca historia que la? dede guníʼ ique laa nga tobi de ca hombre nadxibalú que. Lu tobi de ca ndaa ni jma runibiáʼ binni de historia ca rieeteʼ biree don Quijote zitindené caadxi «gigante» malu, ne bíʼnibe ni purtiʼ rábibe ngue nga ni na Dios gúnibe. Peru despué bidiibe cuenta cadi dxandíʼ diʼ ca gigante que, sínuque caadxi molinu de bi cani.

Neca ti cuentu si nga historia stiʼ don Quijote ne dede rusixidxi ni binni la? rusiidini laanu ti cosa nabé risaca: triste nga guni cré binni ti cosa ni cadi dxandíʼ. Nuu binni riguite laca laa purtiʼ riníʼ ique zanda gueʼ xhaataʼ nisa dxuʼniʼ sin gaca huará ne sin guniná ca binnilidxi. Ne binni ni napa guendahuará ni láʼ anorexia, riníʼ ique nuu nazaaca ne ró galán, peru qué ganna pa chaahuidugá cayuuti laca laa purtiʼ qué ró.

Yanna, ñee zanda guiníʼ tuuxa qué ziuu dxi gusiguiicabe o quítecabe laa la? Coʼ, qué zanda diʼ. Guiranu nga zanda chuʼ tu gusiguii laanu, dede né lu ca cosa ni jma risaca casi cani runi crenu de lu Biblia. Pa gueeda guizaacanu nga la? zándaca gueeda gápanu stale guendanagana. Xiñee yaʼ. Para guiénenu ni jma la? guidúʼyanu pabiáʼ naxoo nga ra riuu binni ora runi cré ti cosa ni cadi dxandíʼ ne xi zanda gúninu para cadi guizaacanu nga.

Nabé naxoo nga gusiguiicabe tuuxa

Sicaríʼ rusiene caadxi diccionariu de diidxaʼ guendarusiguii: «gucaacabe tuuxa guni cré ti  cosa ni cadi dxandíʼ o ni cadi jneza», ne laaca riénecabe ni casi «quítecabe tuuxa», «gábicabe binni xiixa ni cadi dxandíʼ para ucuudxicabe laa guni ti cosa» ne «guchécabe lú tuuxa ne xiixa ni ruluíʼ dxandíʼ». Nga runi, pa guininu bisiguii ti binni tuuxa la? caninu biyúbibe modo para gudxítebe binni ca ne bicaabe laa guni cré xiixa ni cadi dxandíʼ. Yanna, pa caguítecabe tuuxa, cusiguiicabe laa o cuchécabe lú ne cadi cudii cuenta la? maʼ naxoo nga ra nuu.

Triste nga guininu ni, peru stale biaje qué riná diʼ binni guni cré pa dxandíʼ caguítecabe laa neca nuu tu cudii razón laa para guni cré ni dxandíʼ. Xiñee yaʼ. Zándaca purtiʼ maʼ xadxí de runi cré xiixa ne raca nagana para laa cueeni de ndaaniʼ ladxidóʼ. Qué riná binni ca gucaadiaga xiixa ni gusihuinni cadi jneza ni runi cré.

Ñee dxandíʼ nga zanda gusiguiicabe guiranu la?

Peru zándaca chuʼ tuuxa guinabadiidxaʼ: «Ñee guiranu nga zanda gueeda guni crenu xiixa ni cadi jneza ni rusiidiʼ ti religión la?» Guiranu pue. Xiñee yaʼ. Purtiʼ Biblia ruzeeteʼ racalaʼdxiʼ Binidxabaʼ quite cada tobi de laanu, ne Jesús guníʼ laabe nga «bixhoze gola enda rusiguii» (Juan 8:44). Stiidxaʼ Dios na laabe nga dios stiʼ guidxilayú malu riʼ. Ne biaʼ tiempu huabani binni maʼ «[bi]sicahui binidxaba xquenda biaani» millón de laacaʼ (2 Corintios 4:4). Ne dede ca dxi stinu riʼ «rusiguii[be] irá binni» (Apocalipsis 12:9).

Cadi guiaandaʼ ndiʼ laanu: dede dxi bizulú guyuu binni lu Guidxilayú riʼ caguite Binidxabaʼ laacaʼ. Bicaabe Eva guiníʼ ique cadi naquiiñeʼ guzuubaʼ stiidxaʼ Dios ni bizáʼ laa ne zanda gueeda gaca casi Dios ra ganna «xii nga jneza ne ni cadi jneza». Né ca diidxaʼ riʼ bicaabe laa guni cré napa derechu de quixheʼ xii nga ni jneza ne xii nga ni cadi jneza sin guinabadiidxaʼ guirutiʼ (Génesis 3:1-5). Ndiʼ nga primé guendarusiguii ni guca ndaaniʼ Guidxilayú riʼ. Ximodo nga yaʼ. Nécapeʼ bidii Dios lugar binni para cuí xi guni la? qué nuzáʼdibe laacaʼ para quíxhecaʼ xii nga ni jneza ne ni cadi jneza ne qué nudiibe derechu laacaʼ de gúnicaʼ ni. Tobi lucha Dios si nga zanda gúnini, purtiʼ laa nga bizáʼ laanu ne laasi nga napa derechu de guni mandar guibáʼ ne Guidxilayú (Jeremías 10:23; Apocalipsis 4:11). Nga runi naquiiñeʼ gánnanu ti cosa: nécapeʼ zanda cuí binni guni ni jneza o ni cadi jneza la? cadi ngueca diʼ ni ne gapa binni derechu para quixheʼ xii nga ni jneza ne ni cadi jneza. Triste nga guininu ni, peru stale binni riníʼ ique zacá ne nga rusihuinni maʼ gudxite Binidxabaʼ laacaʼ.

Xiñee naquiiñeʼ gatananu

Zándaca maʼ stale siglu nga de gutastí religión ra rieluʼ. Ne zándaca nuuluʼ ndaaniʼ religión ca purtiʼ laani nga bisiidiʼ bixhózeluʼ ne jñaaluʼ lii ne zacá huayácani ndaaniʼ familia stiluʼ dede maʼ xadxí. Peru lii nánnaluʼ ti cosa: cadi purtiʼ si maʼ xadxí de runi cré binni xiixa ni rusiidiʼ ti religión nagueendaca guiníʼ dxandíʼ ni. Cadi guiaandaʼ laanu xi caníʼ Biblia bizaaca ndaaniʼ neza binni ridagulisaa guti si ca apóstol que, guyuu caadxi hombre malu ni bisiidicaʼ stale cosa ni cadi dxandíʼ. Ne bíʼnicaʼ ni para «usiguii ca xcaadxi para chi nanda laacaʼ» (Hechos 20:29, 30). Ne para quítecaʼ binni la? biquiiñecaʼ «diidxa sicarú» maca para guni cré binni laacaʼ, laaca bisiidicaʼ «ni biree de xquenda biaani binni» ne ni «gudixhe» binni guidxilayú (Colosenses 2:4, 8).

Ne zacaca nga runi binni yanna. Apóstol Pablu guníʼ jma nagana zácani «ora mayaca izaa xhi guidxilayú», ne yanna nga nabáninu tiempu bizeetebe ca. Laaca guniʼbe ca diidxaʼ riʼ: «Cani canauchee ne canausiguii la? ze dxi jma rusi zinitilú caʼ. Caguite ca binni ne caguite binidxaba laacaʼ» o casi na Biblia de Navarra, «caguítecaʼ xcaadxi ne caguítecaʼ laca laacaʼ» (2 Timoteo 3:1, 13).

Cumu zacá cayuni stale binni yanna la? ni jma jneza gúninu nga chinándanu ni na ca diidxaʼ riʼ: «Pa nuu tu na ma zuhuaa chaahui la? guuya gá qué guiaba» (1 Corintios 10:12). Lu textu riʼ caníʼ apóstol ca naquiiñeʼ chuʼ binni cuidadu laa ti cadi guixeleʼ de Dios. Nga runi, pa tuuxa riníʼ ique qué zanda quite Binidxabaʼ laa la? mápeca gudxítebe laa ne maʼ biaba lu trampa stibe. Xiñee yaʼ. Purtiʼ «zanda usaba binidxaba» tutiica binni «ne enda nexhená stiʼ» (Efesios 6:11). Ngue runi gudxi Pablu ca xpinni  Cristu: «Cadxibe chuʼ tu usiguii laatu casi bisiguii beenda que Eva, quite ique tu ne ma cadi chi nanda tu Cristu de idubi ladxidóʼ to» (2 Corintios 11:3).

Xi naquiiñeʼ gúninu para cadi quítecabe laanu

Yanna, xi naquiiñeʼ gúninu para cadi quite Binidxabaʼ laanu yaʼ. Xi zanda gúninu para gánnanu pa dxandíʼ cayuni adorarnu Dios «jneza» ne cayúninu ni «de idubi ladxidóʼ[no]» yaʼ (Juan 4:24). Jiobá Dios maʼ bidii laanu guiráʼ ni caquiiñenu para gápanu laanu ti cadi quite Binidxabaʼ laanu. Primé la? maʼ bidiibe laanu guendabiaaniʼ para gánnanu xii nga ni dxandíʼ ne xii nga ni cadi dxandíʼ (1 Juan 5:20). Ne laaca maʼ gúdxibe laanu xi guiráʼ riquiiñeʼ Binidxabaʼ para quite binni (2 Corintios 2:11). Zanda gacané Dios laanu para gucáʼlunu guiráʼ ni gulaa Binidxabaʼ luguianu (Proverbios 3:1-6; Efesios 6:10-18).

Ne naquiiñeʼ gánnanu ndiʼ: Jiobá maʼ bidii laanu ti cosa nabé risaca ni zanda iquiiñenu para cadi chuʼ tu quite laanu. Xi laani yaʼ. Laani nga Stiidxabe. Pablu peʼ gudxi Timoteu iquiiñeʼ Stiidxaʼ Dios para gusihuinni dxandíʼ guiráʼ ni maʼ biziidiʼ de Cristu. Pablu maca gudxi Timoteu ziuu caadxi hombre ni «canauchee ne canausiguii», ne laacaʼ zacaláʼdxicaʼ guchéndacaʼ ni rusiidiʼ Biblia. Ngue runi gudxi apóstol que laabe de lu «Xquiʼchi Dios» si, o Biblia nga naquiiñeʼ cueebe guiráʼ ni gusiidibe (2 Timoteo 3:15).

Peru zándaca chuʼ tu guiníʼ: ca binni ni runi cré Dios ne ni runi cré ni cá lu Biblia nga cani zanda guininu maʼ gudxítecabe laacaʼ. Peru, nécapeʼ nuu caadxi binni ni qué runi cré pa nuu ti Dios ni bizáʼ laanu ne laabe nga guniʼbe xi guicá lu Biblia la? nápanu stale razón para guininu zacá nga laani (Romanos 1:18-25; 2 Timoteo 3:16, 17; 2 Pedro 1:19-21). a

Nga runi, para cadi chuʼ tu quite laanu né «ni na cabe enda biaani peru cadi dxandíʼ» la? naquiiñeʼ guidúʼyanu xiná Stiidxaʼ Dios (1 Timoteo 6:20, 21). Nga nga ni biʼniʼ ca binni de Berea —ti guidxi ra bicheeche Pablu diidxaʼ—, laacaʼ «bicaa diaga ca stiidxa Dios ne stale gana». Lugar de casi zeʼ ca binni que ñuni crecaʼ ni caníʼ  apóstol que la? «irá dxi ma cuyubi ca lu Xquiʼchi Dios» para gúʼyacaʼ pa dxandíʼ guiráʼ ni cusiidibe (Hechos 17:11).

Yanna laanu yaʼ. Jneza nga cueenu tiempu para guyúbinu lu Biblia ne gúʼyanu pa dxandíʼ guiráʼ ni runi crenu. Xiñee yaʼ. Purtiʼ laaca Biblia nga cudii conseju riʼ laanu: «Lauyubi uná nga ni jneza» (1 Tesalonicenses 5:21). Dxi mayaca guiluxe primé siglu que, bicaa apóstol Juan ca diidxaʼ riʼ: «Cadi tutiica na cusiníʼ Dios laa maca ziguni cre tu, sínuque laguuya chaahui pa dxandí napa be Espíritu sti Dios» (1 Juan 4:1). Zacá nga laani, neca ruluíʼ de Dios zeeda xiixa cosa ni runi cré binni la? ante guni crenu ni, galán guyúbinu ni lu Stiidxaʼ Dios para guidúʼyanu pa dxandíʼ ni (Juan 8:31, 32).

Xi naquiiñeʼ gúninu

Yanna, xi naquiiñeʼ gúninu despué de guidúʼyanu xi caníʼ Biblia yaʼ. Discípulo Santiagu guníʼ: «Naquiiñe guni tu ni na ca diidxa ca, ne cadi ucaa diaga si tu cani. Pa zacá cayuni tu la? caguite si tu laca laatu» (Santiago 1:22). Nga runi, ora maʼ nánnanu xipeʼ nga cusiidiʼ Biblia la? cadi ngasi nga ni naquiiñeʼ gúninu, casi ora niguidxinásinu; sínuque naquiiñeʼ guzúʼbanu stiidxaʼ Dios ne cadi guchéʼnenu ca ley stibe.

Ca dxi stinu riʼ zeʼ dxi jma stale binni cayuni cosa dxabaʼ. Racá ridúʼyanu modo riguite Binidxabaʼ ique stale binni, purtiʼ rucaabe laacaʼ guni crecaʼ qué zápacaʼ guendanagana pa gucheenecaʼ ca ley stiʼ Dios. Peru ¡caguite ca binni ca laca laacaʼ! Nga runi, qué ridxagayaadinu ora gánnanu bicaa apóstol Pablu conseju riʼ ra nuu ca xpinni Cristu: «Cadi quite tu laca laatu, zácaxa tu zanda quite tu Dios. Iruti qué zanda quite laabe, purti irá ni udxiiba binni, ngue ca cuee» (Gálatas 6:7).

Ca binni ni runibiáʼ guiráʼ ni bisiidiʼ Cristu, peru qué rúnini lu xquendanabani la? zeeda gaca casi xa «hombre huati» ni bizeeteʼ Jesús lu ti ejemplu biquiiñeʼ. Hombre que gudxite laca laa, purtiʼ guníʼ ique zanda gucuí ti yoo naguidxi lu yuxi. Cásica bizaaca don Quijote que, hombre riʼ laaca bidii lugar quite xquendabiaaniʼ laa. Nga runi, naquiiñeʼ gácanu casi «hombre ni nuu xpiaaniʼ» que, laa «bicuí lidxi lu guie». Ximodo zanda gúninu ni yaʼ. Ra guizíʼdinu ni cá lu Biblia, peru cadi ngasi, laaca naquiiñeʼ gúninu cani lu xquendanabáninu (Mateo 7:24-27).

[Cani cá ñee yaza]

[Cuadro ne dibuju/foto ni zeeda lu yaza 28,29]

Riuu biaje riguite lú binni laa

Lu ca iza stiʼ 1930, guyuu ti hombre de Suecia ni láʼ Oscar Reutersvärd. Laabe bíʼnibe caadxi dibuju ni runibiáʼ binni casi figuras imposibles. Casi dibuju ni cá ladu bigaʼ riʼ nga cani bíʼnibe que. Primé ca guʼyaʼ binni ca dibuju que la? ruluíʼ dxandíʼ modo rihuínnicani. Peru ora guuyaʼ chaahuiʼ binni cani la? rudii cuenta cadi zaqué diʼ cani. Xiñee yaʼ. Hombre que biyubi ximodo quixheʼ chaahuiʼ ca dibuju que para guchécani lú binni ne quítecani xquendabiaaniʼ, purtiʼ qué zanda diʼ gácacani zaqué.

Peru ca dibuju ca rusihuínnicani nuuruʼ stale ni zanda guché lú binni. Raca chupa mil iza gudixhená Biblia binni né ca diidxaʼ riʼ: «Laguuya gá laatu né cani canayuíʼ ni biree de xquenda biaani binni. Cadi dxandí ni, sínuque binni guidxilayú gudixhe ni casi na ca naca guidxilayú, ne cadi de Cristu zeeda ni» (Colosenses 2:8).

Hombre ni bicaa versículo ca nanna xidé caníʼ, purtiʼ laaca guyuu tu gudxite laabe ante. Ne guendaridxagayaa ni purtiʼ cadi ti binni diʼ ni zanda quítecabe casi zécabe laabe. Xiñee yaʼ. Purtiʼ guyuu ti maestru ni nabé risaca ni bisiidiʼ laabe de religión ne laaca bidxaagabe puru binni risaca (Hechos 22:3).

Peru, hombre riʼ —Saulo de Tarso— beeda guni cré naquiiñeʼ gaca castigar ca binni ni cadi zinanda ni runi crebe ne ca costumbre stibe. Cumu guníʼ íquebe jneza ngue cani runi crebe la? bizulú gunaazebe ne biseeguyoobe guiráʼ ca xpinni Cristu ni qué naʼ gusaana ni runi cré. Ne bíʼnibe ni purtiʼ bidii ca xaíque stiʼ ca religión stiʼ ca judíu que laabe permisu ne para laabe ngue nga ni na Dios naquiiñeʼ gúnibe. Dede guyuu Saulo lade ca binni ni guníʼ naquiiñeʼ gati ti judíu purtiʼ nacaʼ guníʼ hombre que mal de Dios (Hechos 22:4, 5, 20).

Galán nga bidxiña dxi guyuu tu gucané laabe para biénebe xi riuulaʼdxiʼ Dios ne xi qué riuulaʼdxiʼ. Ora bidii Saulo cuenta cadi jneza canazá la? bichaa modo riníʼ ique ne modo laa. Ne despué beeda gunibiáʼcabe laabe casi Pablu, apóstol stiʼ Jesucristu. Ora biiyabe caguítecabe laabe ra nuube que la? bireebe de raqué ne guyuube ndaaniʼ religión ni dxandíʼ (Hechos 22:6-16; Romanos 1:1).

Cásica Pablu que, yanna riʼ nuu stale binni ni nayá ladxidóʼ ni maʼ gudxítecabe laa ne maʼ bicaacabe laa guni cré caadxi cosa ni cadi dxandíʼ, ni zeeda gaca casi ca figuras imposibles biʼniʼ xa hombre que. Ca cosa ni runi cré ca binni ca ruluíʼ jneza cani, peru cadi zeedacani lu Stiidxaʼ Dios (Proverbios 14:12; Romanos 10:2, 3). Galán nga nuu tu cayacané ca binni ca para gúʼyacaʼ pa jneza guiráʼ ni runi crecaʼ ne gudiicaʼ cuenta ximodo nuu religión sticaʼ pur ni runi ca binni ni rié ndaaniʼ ni (Mateo 7:15-20). Ora maʼ ziziidiʼ ca binni ca xipeʼ nga rusiidiʼ Biblia la? ruchaacaʼ modo riníʼ íquecaʼ ne modo laacaʼ ti ganda gúnicaʼ ni riuulaʼdxiʼ Dios.

Yanna lii yaʼ. Ñee zinándaluʼ ejemplu stiʼ apóstol Pablu ra gudiiluʼ lugar gacané Stiidxaʼ Dios lii para gúʼyaluʼ pa jneza nga cani runi creluʼ la? Pa nga nga ni riuulaʼdxuʼ la? ca testigu stiʼ Jiobá zanda gacanecaʼ lii gúniluʼ ni.

[Paraa gucuaacabe dibuju o foto ni zeeda lu yaza 26]

Ni biʼniʼ Doré