Ni cayuni binni para guirá guendapobre

CA BINNI ricu nacaʼ maʼ birá guendapobre purtiʼ laacaʼ nabánicaʼ galán. Neca huayúnicabe stale cosa para cueecabe binni lu guendapobre peru qué huayanda gúnicabe ni. Stale de ca binni ni napa bueltu qué racaláʼdxicaʼ chuʼ xiixa o tuuxa binni gaxhaʼ laacaʼ bueltu sticaʼ ne pur laani gusaana de gácacaʼ ricu. Rey Salomón guníʼ: «¡Biiyaʼ!, guiráʼ nisa cayete lu ca binni ni cuquiichinácabe que, peru qué gápacabe tu quixhedxí ladxidóʼcabe; guizáʼ nadipaʼ ca binni ni cuquiichináʼ laacabe» (Eclesiastés 4:1).

Ñee zanda gacané ca ricu para guchaa binni modo riníʼ ique ne guiree guendapobre lu Guidxilayú la? Dios gudxi Salomón gucaa ca diidxaʼ riʼ: «¡Biiyaʼ!, qué risaca guiráʼ ni ne casi ñaca ñuneʼ stipa pur ninaazeʼ bi. Xiixa ni gúnicabe napandu la? maʼ qué zanda gaca derechu» (Eclesiastés 1:14, 15). Rihuinni dxandíʼ ni na ca diidxaʼ ca ora guidúʼyanu xi guiráʼ huayacalaʼdxiʼ binni guni para cuee guendapobre.

Nácabe zabani guiráʼ binni galán né cani gudíxhecabe gúnicabe

Lu siglu XIX, laga ziyaca caadxi guidxi ricu pur guiráʼ ni rutoocaʼ ne pur guiráʼ ca fábrica sticaʼ la? guyuu xcaadxi binni risaca ni nabé gucuá íquecaʼ guirá guendapobre. Ñee ñanda ñaaziʼ guiráʼ ni rudii Guidxilayú riʼ para nicaa binni biaʼca biaʼca la?

Guyuu tu laa guníʼ ique ñapa guiráʼ binni biaʼca biaʼca pa ñuni mandar ti gobiernu socialista o comunista. Ca binni ricu qué ñuuláʼdxicaʼ ni guníʼ íquecabe que, peru stale binni yenanda laacabe purtiʼ guyuuláʼdxicaʼ ca diidxaʼ ni guníʼcabe riʼ: «Cada binni guicaa biaʼ laa ne biaʼ caquiiñeʼ». Stale tu guníʼ ique ziuulaʼdxiʼ guiráʼ guidxi gápacaʼ ti gobiernu socialista ti guibani binni galán. Guyuu chupa chonna guidxi roʼ ni napa stale bidxichi yenándacaʼ caadxi de ca cosa ni runi gobiernu socialista ne gudíxhecabe ley para guibani binni galán «dede ora gale hasta ora gati». Ne dede yanna riníʼcabe maʼ qué runiná guendapobre ca binni xquídxicabe.

 Peru ni nánnanu nga qué ñanda ñuni gobiernu socialista ni gucalaʼdxiʼ, ne laani nga nizaaláʼdxisaa guiráʼ binni. Qué niree ni gudixhe íquecabe que modo nácabe, purtiʼ guníʼ íquecabe ñuni cada tobi de ca binni que dxiiñaʼ para ñuu guidxi que galán lugar de nuyúbicaʼ para laasicaʼ. Chupa chonna de ca binni ni bidiicaʼ ni nápacaʼ ca binni pobre que bizulú gudicheruaacaʼ, purtiʼ nacaʼ pur ngue maʼ qué ricá ique ca binni que gúnicaʼ dxiiñaʼ. Rihuínnica cayaca ni na ca diidxaʼ riʼ: «Nin ti hombre qué randa runi puru si ni jneza sin guchee ndaaniʼ guidxilayú. [...] Dios ni dxandíʼ ca bíʼnibe binni guidxilayú sin donda, peru laapecaʼ maʼ biyúbicaʼ gúnicaʼ stale cosa» (Eclesiastés 7:20, 29).

Sti cosa ni gucaláʼdxicabe ñúnicabe nga nibánicabe casi nabani ca binni de Estados Unidos, ti lugar ra guiráʼ binni guni dxiiñaʼ zabani galán. Stale guidxi roʼ bizulú cayuni caadxi cosa ni nácabe biquiiñeʼ Estados Unidos para guca ricu. Xi laacani yaʼ. Cuí binni tu laa gaca xaíque stiʼ (democracia), tutiica binni zanda gapa empresa stiʼ ne tutiica zanda guni negocio. Peru cadi guiráʼ ca guidxi ca gúcacaʼ ricu cásica Estados Unidos, purtiʼ guidxi riʼ cadi beeda gácani ricu pur tipu si de gobiernu ni nápani, sínuque gúcani ricu pur guiráʼ ca cosa ni nápani ne qué ñaca nagana para laacaʼ ñúnicaʼ negocio né xcaadxi guidxi. Guiráʼ guidxi ruyubi modo gapa jma bueltu que xcaadxi guidxi, ngue runi cani runi ganar la? rácacaʼ jma ricu, peru cani runiti jma naná rácani para laacaʼ. Ñee zanda gacané ca guidxi jma ricu ca guidxi pobre la?

Ñee birá guendapobre né Plan Marshall la?

Guiropa guendaridinde ni guca lu guidubi naca Guidxilayú binduuxeni Europa ne bizulú gutizíʼ millón de ca binni ni nabeza raqué. Peru gobiernu stiʼ Estados Unidos guyuu xizaa purtiʼ ca guidxi ni nuu Europa bizulú gúpacaʼ gobiernu comunista. Ngue runi tapa iza biseendaʼ Estados Unidos stale bueltu ndaaniʼ ca guidxi ca. Biʼniʼ gobiernu ca zacá para ganda guiasa ca fábrica stícabe ne guibiguetaʼ gúnicabe dxiiñaʼ layú ndaaniʼ ca guidxi roʼ ni naʼ chinanda modo runi mandar gobiernu ca. Para gunda biasa Europa biquiiñecabe Plan Marshall ne biiyacabe dxandíʼ gucaneni ca guidxi ca. Cumu gucané Estados Unidos ca guidxi ni nuu Europa occidental la? ngue runi bilá nirá guendapobre ndaaniʼ ca guidxi que. Ñee ñanda ñacané Plan Marshall ca guidxi ni nuu lu guidubi naca Guidxilayú la?

Cumu biiyaʼ Estados Unidos gucané Plan Marshall Europa la? ngue runi gucanecaʼ xcaadxi guidxi pobre. Biyúbicaʼ modo gaca dxiiñaʼ lu layú stiʼ ca binni que, chuʼ doctor guʼyaʼ laacaʼ, chuʼ scuela ne chuʼ carru. Peru biʼniʼ Estados Unidos zaqué para si gápacaʼ jma bueltu ne cadi para gacanecaʼ binni, ne laapecaʼ riniʼcaʼ zacá ni. Xcaadxi guidxi ricu laaca gucanecaʼ ca guidxi pobre, ne bíʼnicaʼ zacá para si gunibiáʼ ca guidxi riʼ laacaʼ casi ti guidxi ni napa stale bidxichi. Gudiʼdiʼ si sesenta iza, despué de caguucabe bueltu lu Plan Marshall para gacanécabe ca guidxi pobre, bihuinni qué nibeendúcabe gastiʼ. Dxandíʼ, chupa chonna de ca guidxi pobre que bizulú gúcacaʼ ricu, jmaruʼ si ca guidxi casi China ne xcaadxi guidxi nuu gaxha de laani. Peru stáleruʼ guidxi qué nusaana de ñaca pobre neca gucané xcaadxi guidxi laa para maʼ cadi ñátipeʼ baʼduhuiiniʼ ne niziidicaʼ jma ra ñecaʼ scuela.

Qué ñanda ñacané xcaadxi guidxi laacabe

Jma nagana guca para laacabe gacanécabe ca guidxi pobre que guireecaʼ lu guendapobre que gacanécabe ca guidxi ricu gudiʼdiʼ si guerra que. Para tiempu riʼ maʼ napa Europa stale fábrica, negocio ne maʼ napa stale modo para ganda cheʼ binni stiʼ lugar. Caquiiñeʼ si gacanécabe ca guidxi stini para gapa bueltu. Peru gadxé nga ni caquiiñeʼ gúnicabe pur ca guidxi pobre que. Dxandíʼ, gucanécabe gaca carretera, scuela ne hospital, peru ngasi nga ni gunda  bíʼnicabe purtiʼ gastiʼ empresa ra guni binni dxiiñaʼ, qué rudii stale cosa ndaaniʼ ca guidxi ca ne gastiʼ modo para ganda gúnicabe negocio né sti guidxi.

Nabé nagana para guiree ca cosa ni runi ca guidxi ca pobre. Ca guendahuará ca rúnicani binni jma pobre, ne guendapobre ca redaneni guendahuará. Ca baʼduhuiiniʼ ni cayatizíʼ qué rápacaʼ stipa ora maʼ ziniisicaʼ ne huaxiéʼ rala xquendabiaanicaʼ, nga runi ora gápacaʼ xiiñicaʼ qué randa rusiniisicaʼ laacabe. Ca guidxi ricu ca nacaʼ racanecaʼ ca guidxi pobre purtiʼ ruseendacaʼ stale cosa ni gó binni, peru lugar de ñacaneni ca binni de raqué laga jmaruʼ si rácacaʼ pobre purtiʼ ca binni ni runi dxiiñaʼ layú maʼ qué rápacaʼ dxiiñaʼ ne zacaca rizaacaʼ né ca binni ni runi negocio. Bueltu ni ruseendacabe ra nuu ca gobiernu stiʼ ca guidxi jma pobre ca laaca zanda gucaani laacaʼ gúnicaʼ xcaadxi cosa: casi cuánacaʼ, guxhiicaʼ binni, ne ora rúnicaʼ zacá jmaruʼ si pobre riaana xquídxicaʼ. Qué randa diʼ ribeendúcabe gastiʼ né guiráʼ ni rúnicabe para gacanécabe binni pobre purtiʼ qué ribeecabe nipeʼ rusaanaʼ binni lu guendapobre.

Ni rusaana binni lu guendapobre

Nabé pobre binni purtiʼ ca guidxi roʼ, ca gobiernu ne binni nisi ruyúbicaʼ para laasicaʼ ne modo guidale bidxichi sticaʼ. Ndaaniʼ ca guidxi ricu ra ribícabe tu gaca xaíque, cani runi mandar ndaaniʼ cani qué ricá íquecaʼ cueecaʼ guendapobre ni nuu lu guidubi naca guidxilayú, sínuque ni jma risaca para laacaʼ nga chuʼ ca binni ni biʼniʼ votar pur laacaʼ nayecheʼ. Nga runi, qué rinacaʼ guseendaʼ ca guidxi pobre ni rudii layú sticaʼ xquídxicabe, ti ganda guisaca cani rudii layú stícabe. Ne rudiicabe stale bueltu ca binni ni runi dxiiñaʼ xquídxicabe, para ganda gucueezacabe xcaadxi guidxi de gutoocaʼ ndaaniʼ xquídxicabe.

Casi maʼ bidúʼyanu ca, cumu ruyubi binni ne ca gobiernu ca puru si para laacaʼ la? nga runi nuu guendapobre. Racá rihuinni laaca binni nga napa donda pur nuu guendapobre. Sicaríʼ bisiene rey Salomón ni: «Binni runi mandar binni para gacanacaʼ» (Eclesiastés 8:9).

Yanna, ñee ziuu dxi guiree guendapobre la? Ñee nuu tuuxa gobiernu ni ganda guchaa xpiaʼ binni la?

[Cuadru ni zeeda lu yaza 6]

Ti ley ni qué nudii lugar ñuu binni pobre

Jiobá bidii ti ley guidxi Israel ne laani qué nudiini lugar ñaana binni lu guendapobre. Ley ni bidii Dios Moisés que na guiráʼ familia naquiiñeʼ guicaa ti ndaa layú de herencia, peru cani ruzaaquiʼ guʼxhuʼ de tribu stiʼ Leví que la? laasicaʼ qué zacaacaʼ. Qué ziuu dxi guníticabe herencia que, purtiʼ neca gutoocabe ni zándaruʼ guibiguétani lu nácabe. Cada guizaa cincuenta iza naquiiñeʼ gudxiguétacabe guiráʼ layú ni nápacabe lu náʼ xpixuaanaʼ ni o lu náʼ ca binnilidxi (Levítico 25:10, 23). Pa chuʼ tu gutoo layú stiʼ pur xiixa guendahuará, pur bizaaca xiixa desgracia o purtiʼ nachaabaʼ la? rudxiguétacabe ni laabe sin quíxebe dxi gaca ni rábicabe Jubileu. Bíʼnicabe zacá para cadi guiaana nin ti familia stale iza lu guendapobre.

Ley ni bidii Dios que gucaneni binni purtiʼ ora cadiʼdiʼ tuuxa lu xiixa guendanagana zanda gutoo laa casi esclavu ne zanda guicaa bueltu dede ante para quixe ra nuzaabiʼ. Peru pa qué ganda quíxebe para guiaanabe libre la? ra guizaa gadxe iza ziaanabe libre ne zudii xpixuaanabe laabe biidxiʼ ne yuze para gápabe ni guzulúnebe. Ne pa ti israelita pobre quiʼñeʼ bueltu ti binni xquidxi la? Ley que na cadi naquiiñeʼ guquíxecabe laabe saca bitiiñecabe ni laabe. Ne laaca na ley que ora guindísacabe cosecha stícabe, naquiiñeʼ gusaanacabe guriá layú stícabe para chindagu ca binni pobre. Pur nga nin ti israelita qué nizá ninabaʼ guna (Deuteronomio 15:1-14; Levítico 23:22).

Neca zacá, historia ni zeeda lu Biblia ruzeeteʼ guyuu chupa chonna de ca israelita que gúcacaʼ pobre, gúcani zacá purtiʼ qué ninanda guidubi guidxi Israel ni na Ley stiʼ Jiobá. Pur ngue guyuu tu laa beeda gapa stale layú ne xcaadxi gastiʼ ñaananecaʼ, cásica rizaaca ndaaniʼ stale guidxi yanna. Pur cani bizéʼtenu ca zanda guininu guyuu de ca israelita que bininá guendapobre laacaʼ purtiʼ chupa chonna de laacaʼ qué ninándacaʼ ley stiʼ Dios ne jma gucuá íquecaʼ puru para laasicaʼ que gacanecaʼ xcaadxi binni (Mateo 22:37-40).