CADI dxandíʼ galán nga gatananu ra scuela la? Stale tu laa rasi ora maʼ caziidiʼ ra scuela, peru pa racaláʼdxiluʼ guiziidiluʼ xiixa la? naquiiñeʼ gatanaluʼ. Ngaca nga naquiiñeʼ gúniluʼ pa rieluʼ ca guendaridagulisaa ra riuundaʼ Biblia.

Xi zanda gacané lii para gatanaluʼ yaʼ *... Zándaca caquiiñeʼ gásiluʼ jma tempranu, o gásiluʼ ti ratu huiiniʼ ridxíʼ. Lu Biblia rieeteʼ de ti hombrehuiiniʼ ni gusiʼ ti gueelaʼ laga cucaadiaga apóstol Pablu. Guidúʼyanu xi zanda guizíʼdinu de historia riʼ. Biyubi lu libru stiʼ Hechos capítulo 20 ne biindaʼ versículo 7 dede 12 stini.

Pablu yeganna ti neza binni ridagulisaa ni nuu Troas, guidxi riʼ riaana ni guriá nisadóʼ. Biblia na «gunda galaa gueela caníʼ ru Pablu, purti sti dxi que ma cheʼ» lu barcu. Historia riʼ laaca cuzeeteni: «Nuu ti hombre huiini raqué lá Eutico, zuba ra ventana. Ucuaa bacaanda laa purti xadxí caníʼ Pablu». Ñee ñuuláʼdxiluʼ ñánnaluʼ xiruʼ bizaaca la?...

Biaba Eutico de «raguionna pisu». Guiráʼ cani nuu raqué, dede né Pablu, biete guxooñecaʼ. Peru ora biétecabe, biiyacabe maʼ guti Eutico. Ñee rábiluʼ guizáʼ triste guyuucabe la?... Biblia na gudiidxi dxiichiʼ Pablu laabe ne dede cayecheʼ guníʼ: «Cadi idxibi tu. Ma bibani be». Ne dxandíʼ bibánibe, purtiʼ Biblia na Dios ngue bisibani laabe.

Xi rusiidiʼ historia ni caníʼ de Eutico riʼ laanu de Dios... Primé la? rusiidiʼ ni laanu zanda gusibani Jiobá, Bixhózenu ni nuu guibáʼ, ca binni  ni maʼ guti, dede né cani nahuiiniʼ. Ne laasibe jma riénebe lii que bixhózeluʼ ne jñaaluʼ ne laaca jma nadxiibe lii. Dxi guyuu Jesús ndaaniʼ Guidxilayú, bisihuinni nadxii ca xcuidi huiiniʼ cásica runi Jiobá, Bixhózebe. Gudiidxibe laacaʼ ne guluu ndaayabe laacaʼ, peru cadi ngasi, sínuque laaca bisibánibe chupa chonna de cani nahuiiniʼ, tobi de laacaʼ nga ti dxaapahuiiniʼ de 12 iza.

Yanna ra maʼ nánnaluʼ guizáʼ nadxii Dios lii, ñee rucaa nga lii gannaxhiiluʼ laabe la?... Zacá nga laani, guizáʼ nadxiinu Dios, nga runi racaláʼdxinu guzúʼbanu stiidxabe. Ñee racaláʼdxiluʼ gánnaluʼ ximodo zanda gusihuínniluʼ nadxiiluʼ Dios la?... Zanda gábiluʼ laabe nadxiiluʼ laabe cásica biʼniʼ Jesús, laa guníʼ: «Nadxiee Bixhozeʼ». Peru Jesús qué niníʼ si nadxii laabe, sínuque bisihuinni ni lú cani biʼniʼ.

Jesús bizuubaʼ stiidxaʼ Dios. Sicaríʼ guniʼbe: «Qué riaana dxie de gune ni riulaʼdxi be». Yanna, pa racaláʼdxinu guzúʼbanu stiidxaʼ Dios para gusiéchenu laabe ne Xiiñibe la? zúninu stipa pur gatananu ra scuela ne ra ridagulisaanu para guidúʼndanu Biblia.