ÑEE DXANDÍʼ nga nadxii Dios ca xpinni la? Pa zacá ni, pabiáʼ nadxiibe laacaʼ yaʼ. Zanda gánnanu ni ra guidúʼyanu xiná Dios de laani. Lu ca ejemplu ni zeeda lu Biblia rihuinni ni runi sentir Jiobá. Tobi de laacani nga ni zeeda lu Isaías 49:15.

Lu libru stiʼ Isaías zeeda tobi de ca ejemplu ra jma cusihuinni Jiobá pabiáʼ nadxii Dios binni. Sicaríʼ guniʼbe: «Ñee zanda gusiaandaʼ ti gunaa ugadxi xiiñiʼ ne qué guiabe xiiñibe ni gúpabe la?». Primeca ni zaníʼ ique binni nga qué zanda diʼ gusiaandaʼ ti gunaa xiiñiʼ huiiniʼ, purtiʼ riquiiñeʼ baʼduhuiiniʼ ca laabe ridxí ne huaxhinni ne cada ratu ruuna para gudii jñaa ni caquiiñeʼ. Peru nuuruʼ xcaadxi cosa ni racalaʼdxiʼ Jiobá gusiidiʼ né ca diidxaʼ ni guníʼ ca.

Xiñee rugadxi ti gunaa xiiñiʼ ne rudii guiráʼ ni iquiiñebe yaʼ. Ñee rúnibe ni para si cadi guʼnaʼ xiiñibe la? Coʼ, cadi para nga si rúnibe ni. Pur modo guyáʼ ca gunaa ca riacaʼ xiiñicaʼ. Diidxaʼ hebreu ni biquiiñecabe para guníʼcabe «riá» laaca zanda guibiʼxhiʼ ni casi «guilaselaʼdxiʼ» (Éxodo 33:19; Isaías 54:10). Ni riníʼ diidxaʼ ca nga gannaxhii binni tuuxa ni caquiiñeʼ tu gacané laa o ni zándaca guninácabe laa. Ora riá ti gunaa xiiñiʼ nga tobi de ca modo jma rusihuinni binni nadxii tuuxa.

Triste guininu ni, peru cadi guiráʼ diʼ gunaa riá xiiñiʼ ora candaana. Na Jiobá: «Dede né ca gunaa ca zanda gusiaandacaʼ». Nabáninu ndaaniʼ ti guidxilayú ra nuu stale hombre ne gunaa ni maʼ qué rusihuínnicaʼ pa nadxiicaʼ binni (2 Timoteo 3:1-5). Huayuu biaje huayunadiáganu nuu gunaa qué rapa ca xiiñiʼ neca casi gule, runinácabe laacaʼ o rusaanacabe laaca. Sicaríʼ guníʼ ti hombre, ni rusiene de Biblia, de ca diidxaʼ ni cá lu Isaías 49:15: «Binni ruchee nga ca gunaa ni napa xiiñiʼ ne riuu biaje ca cosa malu ca rucaani laacabe gusaana de gannaxhiicabe. Nécapeʼ guizáʼ gannaxhii binni tuuxa, ziuu biaje qué zusihuinni ni».

Peru Jiobá cayabi laanu: «Naa qué zusiaandadiáʼ lii». Yanna maʼ nánnanu xipeʼ nga nuu Jiobá guiníʼ ora gunabadiidxaʼ ni zeeda lu Isaías 49:15. Cadi caníʼdibe nácabe casi ca gunaa ni napa xiiñiʼ, sínuque gadxepeʼ laabe de laacaʼ. Ti gunaa zanda gusiaandaʼ ti xiiñiʼ huiiniʼ, peru Jiobá qué ziuu dxi gusaanaʼ de guiaʼ ca xpinni ni caquiiñeʼ tu gacané laa. Nga runi, hombre ni rusiene de Biblia, ni bizéʼtenu luguiáʼ que, nabe lu Isaías 49:15 nga zeeda «tobi de ca modo ra rusihuinni Dios pabiáʼ nadxii binni —o zándaca laani nga ni jma rusihuinni nadxiibe binni— ni zeeda lu guidubi naca Antiguo Testamento».

Nabé ratadxí ladxidoʼno gánnanu naca Jiobá ti Dios ni nadxii binni, ne «riá laanu» (Lucas 1:78). Dios peʼ cayabi laanu: «Qué zusaana laatu ne qué ziaana dxie de acaniá laatu» (Hebreos 13:5). Xiñee qué guyúbiluʼ gánnaluʼ ximodo zanda chuʼluʼ jma gaxha de laabe yaʼ.