Xipeʼ nga Armagedón
Xipeʼ nga Armagedón
«Espíritu sti binidxaba [...] yeutopa ca irá ni runi mandar ndaani guidxilayú [...] ti lugar rabi cabe Armagedón, diidxa hebreu.» (APOCALIPSIS 16:14, 16)
ARMAGEDÓN nga láʼ ti lugar. Peru xiñee riquiiñecabe diidxaʼ riʼ para guiníʼcabe de xiixa ni chiguizaaca, casi ti guerra yaʼ. Yanna, xipeʼ nga riníʼ diidxaʼ ca yaʼ.
Bidagulisaacabe ti lugar rábicabe Armagedón
Diidxaʼ hebreu Har–Magedón riníʼ ni «Dani stiʼ Meguidó». Neca qué ñuu ti dani niree lá zacá, peru nuu ti lugar láʼ Meguidó. Nuu ni ra ridiʼdiʼ laagaʼ chupa neza roʼ ni riaana ladu guiá stiʼ guidxi Israel ni guyuu dxiqué. Gaxha de raqué gudinde stale guidxi ne guyuu tobi ni biʼniʼ ganar, nga runi dede dxiqué maʼ bizulú biquiiñeʼ binni diidxaʼ Meguidó ora guiníʼ de guendaridinde. *
Peru cadi caquiiñepeʼ gánnanu gunáʼ nga ca guidxi ni gudinde Meguidó, sínuque xiñee gudíndecabe. Lugar riʼ riaana ni lu layú ni bidii Jiobá ca israelita (Éxodo 33:1; Josué 12:7, 21). Laabe guniʼbe zulabe laacaʼ de lu náʼ ca xhenemígucaʼ, ne zaqué bíʼnibe ni (Deuteronomio 6:18, 19). Ne Meguidó nga ra biʼniʼ Jiobá ti milagru ra bilá xquidxi de lu náʼ ca xpinni Jabín, rey stiʼ Canaán, ne de lu náʼ Sísara, xaíque stiʼ ca soldadu que (Jueces 4:14-16).
Nga runi diidxaʼ Har–Magedón, o Armagedón, ca nabé risaca ni riniʼni. Ne riquiiñeʼ binni diidxaʼ ca ora guiníʼ gudinde chupa guidxi nadipaʼ.
Ca diidxaʼ riguixhená ni zeeda lu Biblia cusihuínnicani maʼ qué zandaa zucaa Binidxabaʼ ne ca demonio stiʼ cani runi mandar para gutagulisaacaʼ ca binni nanda guiibaʼ sticaʼ para gucaalucaʼ xquidxi Dios. Peru ni zazaaca ora gaca nga zati millón de binni ra gunitilú Dios ca xhenemigu (Apocalipsis 19:11-18).
Cumu rusiidiʼ Biblia rilaselaʼdxiʼ Dios binni, rindaa para guidxiichi ne qué rusaana de gannaxhii la? nga runi zaca nagana para laanu guni crenu chiguutibe stale binni (Nehemías 9:17). Para ganda guiénenu xipeʼ nga chigúnibe la? caquiiñeʼ guicábinu guionna guendarinabadiidxaʼ riʼ: 1) Tu laa chiguzulú guendaridinde ca. 2) Xiñee ziuu Jiobá luni. 3) Xi zazaaca Guidxilayú riʼ ne ca binni ni nuu ndaaniʼ ni ora gaca ni.
1. TU LAA CHIGUZULÚ GUENDARIDINDE CA.
Guendaridinde ni chigaca lu Armagedón ca cadi para gusihuinni diʼ Dios pabiáʼ cadxiichi, sínuque para gulabe ca binni nachaʼhuiʼ de lu náʼ cani racalaʼdxiʼ guniná laacaʼ. Ca binni ni chigucaalú ca xpinni Dios nga cani «runi mandar ndaani guidxilayú» o cani naca xaíque ndaaniʼ ni. Xiñee chigucaalúcabe laacaʼ yaʼ. Cásica runiibi tuuxa binni ti títere, zacaca nga zucaa Binidxabaʼ ca gobiernu ne ca soldadu gucaalucaʼ ca binni ni runi adorar Jiobá Dios (Apocalipsis 16:13, 14; 19:17, 18).
Ndaaniʼ caadxi guidxi nabé rieeteʼ napa binni derechu guiníʼ ni gacalaʼdxiʼ ne gapa religión ni chuulaʼdxiʼ, nga runi nagana raca para laanu guni crenu zadxiña dxi gucueeza cani runi mandar ca binni de guni cani raca ndaaniʼ religión sticaʼ o dede gacaláʼdxicaʼ gunduuxecaʼ ca religión ca. Peru maruʼ bíʼnicabe zacá lu siglu XX, ne dede yanna rúnicabe ni. * Neca zacá, nuu chupa cosa ni rusihuinni maʼ gadxé ni raca lu ca guendaridinde riʼ né ni chigaca ora gueeda Armagedón. Primé la? zucaalú ca xhenemigu Dios xquídxibe, ne zúnicaʼ ni lu guidubi naca Guidxilayú. Guiropa, dxi ca nga jma zusihuinni Jiobá pabiáʼ napa poder (Jeremías 25:32, 33). Biblia na óraca nga guzulú dxi cuidxi Dios ni jma nandxóʼ cuenta binni.
2. XIÑEE ZIUU JIOBÁ LUNI.
Jiobá cayabi ca xpinni gácacaʼ nachaʼhuiʼ ne gannaxhiicaʼ ca xhenemígucaʼ (Miqueas 4:1-3; Mateo 5:43, 44; 26:52). Nga runi, ora gucaalúcabe ca xpinni Dios sin guiácabe laacaʼ, qué zaguunacaʼ guiibaʼ para gudxiilucaʼ laacabe. Pa qué guni Dios gastiʼ para gucueeza ca binni riʼ zunitilúcabe xquidxi ne zaníʼ binni mal de lá Dios, purtiʼ zusihuinni nga cadi nadxiibe ca xpínnibe, qué rúnibe ni jneza ne qué gápabe poder. Nga runi qué ziuu dxi gusaanabe xquídxibe (Salmo 37:28, 29).
Cumu qué racalaʼdxiʼ Dios gunitilú guirutiʼ la? nga runi rábibe binni xi chigúnibe (2 Pedro 3:9). Caadxi historia ni zeeda lu Biblia rusietenaláʼdxiʼcani laanu racané Dios xquidxi ora rucaalúcabe laacaʼ (2 Reyes 19:35). Lu Biblia laaca cayeeteʼ zaquiiñeʼ Jiobá poder stiʼ para gacané xquidxi ora gucaalú Binidxabaʼ ne ca binni ni nuu lu náʼ ca xpínnibe. Maʼ xadxí bieeteʼ lu Stiidxaʼ Dios zunitilube ca binni malu (Proverbios 2:21, 22; 2 Tesalonicenses 1:6-9). Ora guedandá dxi ca, cani gucaalú xquídxibe zanna dxíchicaʼ cucaalucaʼ Dios ni jma nandxóʼ (Ezequiel 38:21-23).
3. XI ZAZAACA LU GUIDXILAYÚ RIʼ PUR GUENDARIDINDE CA YAʼ.
Lu guendaridinde ni láʼ Armagedón ca zalá millón de binni, ne de racá zabánicabe ti tiempu ra ziuu guendariuudxí lu Guidxilayú riʼ (Apocalipsis 21:3, 4).
Lu últimu libru stiʼ Biblia cayeeteʼ de «jma binni» ni zalá lu guendaridinde riʼ (Apocalipsis 7:9, 14). Zusiene Dios ca binni ni guilá dxi ca para gacanecaʼ gaca Guidxilayú riʼ ti paraísu, cásica modo gucalaʼdxiʼ Jiobá ñácani dxiqué.
Yanna, padxí guzulú gucaalú ca binni riʼ xquidxi Dios yaʼ.
[Nota]
^ Cadi guendaridxagayaa nga iquiiñe binni diidxaʼ ca para guiníʼ de guendaridinde. Casi ora ruzeeteʼ binni de Hiroshima, ti guidxi stiʼ Japón ni binitilú ti bomba atómica, riquiiñecaʼ ni para guiniʼcaʼ de guerra nuclear.
^ Guzéʼtenu chupa ejemplu de ni huayacalaʼdxiʼ ca gobiernu ca gúnicaʼ. Tobi de laani nga dxi gucalaʼdxiʼ ca nazi nunduuxeʼ ca binni de chupa chonna raza ne cani napa religión. Ne stobi nga ni bizaaca ndaaniʼ guidxi Rusia dede 1917 hasta 1991 dxi bininá gobiernu ca binni ni nuu ndaaniʼ chupa chonna religión. Biiyaʼ tema ni zeeda lu La Atalaya 1 stiʼ mayo 2011, ni láʼ «Un pueblo pacífico defiende su buen nombre», ni biʼniʼ ca testigu stiʼ Jiobá.
[Imagen ni zeeda lu yaza 6]
Dxiqué bilá Jiobá xquidxi ne biitibe ca xhenemígucaʼ
[Imagen ni zeeda lu yaza 7]
Lu guendaridinde ni láʼ Armagedón ca zulá Jiobá xquidxi sti biaje
