Tuu nga rucaadiaga ca oración stinu

NI RUCAADIAGA ca oración stinu nga Dios, ni bizáʼ laanu ne ni bizáʼ xquendabiaaninu. Turuʼ nga zanda ganna xi nuu ndaaniʼ xquendabiaaninu. Turuʼ nga zanda guicabi ca oración ni rúninu ne gacané laanu yaʼ. Cani guninu ca rucaacani laanu guinabadiidxanu: «Ñee jneza nga guni crenu nuu tu bizáʼ laanu la?»

Stale binni na pa runi cré ciencia la? qué zanda diʼ guni cré nuu tu bizáʼ laanu. Peru cadi dxandíʼ diʼ ni nácabe ca.

◼ Ora gunabadiidxacabe 1,646 maestru ni rusiidiʼ de ciencia ndaaniʼ veintiun scuela roʼ ni nuu Estados Unidos, 550 si de laacaʼ guniʼcaʼ qué runi crecaʼ Dios.

Peru ni dxandíʼ nga nuu científicu ni runi cré nuu Dios.

Cani rusihuinni nuu tu bizáʼ laanu

Ñee naquiiñeʼ guni crenu nuu tu rucaadiaga ca oración stinu, neca gastiʼ nin ti razón para guni crenu zacá ni la? Coʼ, cadi dxandíʼ diʼ nga naquiiñeʼ guni crenu intiica cosa neca gastiʼ nin ti razón. Biblia na fe ca nga «casi ñaca ma caduʼya nu [xiixa] yanna» neca qué rihuínnini (Hebreos 11:1). Guzéʼtenu ti ejemplu. Neca qué rihuinni señal o ni rábicabe onda stiʼ radiu la? radiu stiluʼ rusihuinni dxandíʼ nuu ni pur ca ridxi ni runadiágaluʼ luni. Zacaca nga rizaaca né Dios, neca qué randa ridúʼyanu laabe, peru nuu cosa ni rusihuinni dxandíʼ nuube.

Paraa zanda guidxélanu cani yaʼ. Nuu cani gaxha de laanu. Sicaríʼ na Biblia: «Dxandíʼ, guiráʼ yoo nuu tu bizáʼ laa, peru ni bizáʼ guiráʼ xixé ni nuu nga Dios» (Hebreos 3:4). Ñee cadi rábiluʼ biaʼsi ejemplu ca la? Pa guiníʼ íqueluʼ modo nexheʼ chaahuiʼ guiráʼ ni nuu guibáʼ ne ndaaniʼ Guidxilayú riʼ, modo beeda chuu guendanabani o modo guyáʼ yubaʼ ique binni, ti cosa ni jma nagana modo guyáʼ ni nuu lu Guidxilayú riʼ, zándaca zucaa ca nga lii  guiníʼ íqueluʼ nuu tuuxa ni jma risaca que binni. *

Peru guiráʼ ca cosa sicarú ni nuu lu Guidxilayú riʼ qué zanda diʼ gusiidiʼ chaahuicani laanu de Dios. Ora guidúʼyanu ca cosa ni bizaʼbe ca casi ñaca ñunadiáganu caxidxi ñee tuuxa ni zedadxiña ra puertaʼ. Neca nánnanu nuu tuuxa deche puertaʼ que la? qué gánnadinu tu laabe, dede óraruʼ guxhélenu puertaʼ ca. Zacaca nga para gánnanu tu bizáʼ guiráʼ ca cosa ca, laaca naquiiñeʼ guyúbinu gánnanu tu laabe casi ñaca nuxhélenu ti puertaʼ.

Xii nga ni zeeda gaca puertaʼ ca yaʼ. Laani nga Biblia. Ne ra guidúʼndanu guiráʼ ni cá lu ca yaza stini zanda gunibiaʼnu Dios. Guiráʼ ca diidxaʼ ni zeeda luni, cani caníʼ xi chiguizaaca, rusihuínnicani nuube. * Laaca rusihuinni libru ca ximodo naca Dios ni rucaadiaga ca oración stinu, purtiʼ luni zeeda caadxi historia ra rihuinni ximodo gúcabe né caadxi binni.

Ximodo nga naca Dios «ni rucaadiaga oración» stinu

Lu Biblia rihuinni Dios, «ni rucaadiaga oración» stinu ca, naca ti binni nabé nuu xpiaaniʼ, ne zanda gunibiaʼnu laabe. Ti binni zacá nga zanda gucaadiaga ne guiene laanu. Nánnanu zacá ni pur ni na ca diidxaʼ riʼ: «Lii, ni rucaadiaga oración, ra nuuluʼ zié guiráʼ xixé binni» (Salmo 65:2). Laabe rucaadiágabe cani runi orar laabe né fe. Dios, ni rucaadiaga  oración stinu ca, napa lá. Sicaríʼ na Biblia: «Zitu nuu Jiobá de ca binni ni qué iquiiñeʼ, peru rucaadiágabe oración stiʼ ca binni ni runi ni jneza» (Proverbios 15:29).

Biblia na naca Jiobá ti Dios ni «nadxii» binni ne «ti Dios ni nayecheʼ» (2 Corintios 13:11; 1 Timoteo 1:11, TNM). Nga runi «gucaná ladxidoʼbe» pur ca guendaquéiquiiñeʼ ni biʼniʼ binni dxiqué (Génesis 6:5, 6). Ne cadi dxandí diʼ nga runiná Dios laanu casi riníʼ binni. Purtiʼ Biblia na: «Zitu zuhuaa de ndaaniʼ ique Dios ni dxandíʼ ca guni ni malu» (Job 34:10). Peru zándaca guiníʼ íqueluʼ: «Pa Dios nga ni bizáʼ guiráʼ cosa ne ni jma napa poder, xiñee qué cueebe guiráʼ xixé ni runiná laanu yaʼ».

Cumu rudii Jiobá lugar cuinu xi gúninu né xquendanabáninu la? rusihuinni nga nabé nacháʼhuibe. Ñee cadi naquiiñeʼ gusisácanu nga la? Nabé triste nga ridúʼyanu cayacaná stale binni ne laaca runinacaʼ xcaadxi binni purtiʼ cadi jneza diʼ ni ribicaʼ gúnicaʼ. Yanna nuu ti guendarinabadiidxaʼ ni naquiiñeʼ guicábinu: ximodo chindeebe ca cosa ni runiná laanu sin gáxhabe binni derechu ni nápacaʼ de cuicaʼ xi gúnicaʼ yaʼ. Zacábinu guendarinabadiidxaʼ ca lu sti tema ca.

[Nota]

[Cuadru ni zeeda lu yaza 5]

Ñee maʼ qué runi creluʼ Dios pur ca cosa malu ni huayuni ca religión ca la?

Nabé triste ni, peru ca religión ca nápacaʼ donda pur riníʼ ique binni pa dxandíʼ nuu tuuxa ni riá laacaʼ ne rucaadiaga oración sticaʼ. Dede ca binni ni nabé riuulaʼdxiʼ guiziidiʼ de Dios maʼ bisaanacaʼ de guni crecaʼ laabe. Purtiʼ biiyacaʼ riuu ca religión ca lu guendaridinde, tobi si nuucaʼ né cani cayuuti binni para guchibi gobiernu ne rudiicaʼ lugar guilaxoocabe cani nahuiiniʼ.

Xiñee ruluíʼ si puru cosa malu runi ca religión ca yaʼ. Purtiʼ nuu binni malu ni huaquiiñeʼ ca religión ca para gúnicaʼ guendaquéiquiiñeʼ. Biblia na ziuu tu zaníʼ xpinni Cristu laa para si gúnicaʼ guendaquéiquiiñeʼ. Apóstol Pablu bidii conseju riʼ cani zaniruʼ lade ca xpinni Cristu: «Ne dede lade ca tu ziuu tu guiasa usiguii ca xcaadxi para chi nanda laacaʼ» (Hechos 20:29, 30).

Guiráʼ ni huayuni ca religión ni cadi dxandíʼ ca nabé ruchiichicani Dios. Nga runi, lu Stiidxabe rieeteʼ «bixii rini sti cani byuíʼ stiidxa Dios ne ca xpinni be, ne rini sti irá cani biiti binni» (Apocalipsis 18:24). Cumu qué nusiidicabe binni ni dxandíʼ de Dios, ni nabé rannaxhii binni ca la? nga runi nabe ca religión ca nga nápacaʼ donda pur ca binni ni huayati (1 Juan 4:8).

Dios ni rucaadiaga ca oración stinu riuubaʼ ladxidoʼbe gúʼyabe ca binni ni cayacaná pur ni runi ca religión ca. Cumu nadxiibe binni la? maʼ qué zandaa zábibe xiiñibe guinabaʼ cuenta ca religión ca purtiʼ cadi dxandíʼ guiráʼ ni rusiidicaʼ. Sicaríʼ guníʼ Jesús: «Stale tu zabi naa dxi que: “Señor, ñee cadi byuí du stiidxa lu [...] la?” Oraque zabe laacaʼ: “Qué runebiaʼya laatu. Laguiree de ra nuaaʼ, purti qué ñuu dxi ñuni tu jneza”» (Mateo 7:22, 23).