Nga nga ti binni nadóʼ ni qué ruchá bi yanni. Ne qué riníʼ ique jma risaca que xcaadxi binni. Nanna caquiiñeʼ gacané tuuxa laa, purtiʼ nuu cosa ni qué zanda guni.

Qué nuchabe bi yánnibe pur guzanírube lade ca israelita. Ora ti binni chuʼ ti lugar ra guni mandar, nagueendaca rusihuinni pa ruchá bi yanni o coʼ. Robert G. Ingersoll, ti hombre ni guníʼ nezalú stale binni ni bibani lu siglu XIX guníʼ sicaríʼ: «Stale binni runi huantar ora rapa guendanagana. Peru pa racaláʼdxiluʼ gunibiáʼ chaahuiluʼ ti binni la? guluu laabe ti lugar ra guni mándarbe». Ne Moisés bidii ti ejemplu galán dxi guca xaíque.

Jiobá bidii laabe ti dxiiñaʼ nabé risaca, purtiʼ biʼniʼ laabe xaíque lade ca binni de Israel, xquidxi Dios. Peru Moisés qué ñuu dxi nuchá bi yanni. Guidúʼyanu ximodo bisihuínnibe zacá laabe ora biʼniʼ chaahuibe ti guendanagana ni guyuu pur ti herencia (Números 27:1-11). Naquiiñeʼ gaca chaahuiʼ guendanagana que, purtiʼ modo guiaana ni nga chinanda binni despué.

Xi biʼniʼ Moisés yaʼ. Ñee guníʼ íquebe zanda guni chaahuibe guendanagana que purtiʼ laabe ngue nácabe xaíque la? Ñee guníʼ íquebe zanda gúnibe ni purtiʼ nánnabe gúnibe stale cosa, purtiʼ maʼ nápabe stale iza de nácabe xaíque o purtiʼ guníʼ íquebe nánnabe ximodo riníʼ ique Jiobá la?

Ti binni ni ruchá bi yanni, ñuni zacá. Peru cumu cadi zacá Moisés la? Biblia na gunábabe Jiobá gabi laabe xi zanda gúnibe (Números 27:5). Yanna guníʼ ique, neca maʼ nápabe cuarenta iza de zanírube lade ca israelita que, peru gunabarube Jiobá gacané laabe lugar de niníʼ íquebe laasibe zanda guni chaahuibe guendanagana que. Cadi dxandíʼ rusihuinni nga qué nudxiibabe laabe la?

Qué niníʼ ique Moisés laasi nga naquiiñeʼ sániruʼ lade ca binni que. Lugar de nidxiichibe ora guca xcaadxi israelita ni riguixhená la? laga biéchebe ora gúnnabe ni (Números 11:24-29). Ora gudxi suégrube laabe guyúbibe xcaadxi binni gacané laabe lu dxiiñaʼ nápabe que, yenándabe conseju stiʼ (Éxodo 18:13-24). Dxi mayaca gátibe, gunábabe Jiobá cuí sti binni para chuʼ lugar stibe neca naguídxiruʼ nuube. Ne ora gulí Jiobá Josué, gucané Moisés laabe de guidubi ladxidóʼ purtiʼ gúdxibe guidxi que chinanda Josué, xaíque ni chigacané laacabe chuucabe lu Layú ni Bizabiruaa Dios gudii laacabe (Números 27:15-18; Deuteronomio 31:3-6; 34:7). Nanna dxíchinu risaca para Moisés ngue saniruʼ lade ca xpinni Dios, peru ni jma bizaaláʼdxibe nga gacanebe ca binni que.

Cadi chuʼ dxi guchanu bi yánninu purtiʼ si nápanu xiixa dxiiñaʼ ni risaca o laasinu nánnanu gúninu xiixa cosa. Ni ruuyaʼ Jiobá nga gácanu binni ni qué rudxiibaʼ laca laa ne cadi pa jma nánnanu gúninu xiixa cosa (1 Samuel 15:17). Pa dxandíʼ nácanu binni ni qué rudxiibaʼ laca laa, zinándanu conseju ni zeeda lu Biblia riʼ: «Gulaʼquiʼ guidubi ladxidoʼloʼ lu naʼ Jiobá, ne cadi gúniluʼ ni na si xpiaaniluʼ» (Proverbios 3:5, 6).

Ejemplu stiʼ Moisés laaca rusiidiʼ laanu cadi guiníʼ íquenu risácanu pur nápanu ti dxiiñaʼ galán o pur nácanu xaíque.

Ñee galán chinándanu ejemplu stiʼ Moisés la? Galán pue. Purtiʼ pa dxandíʼ nácanu binni ni qué rudxiibaʼ laa la? jma ziuulaʼdxiʼ binni guieeguʼ laanu ne zannaxhiicabe laanu. Ne ni jma risaca nga zannaxhii Jiobá laanu, ti Dios ni qué rudxiibaʼ laa (Salmo 18:35). Ne Biblia na: «Nanalaʼdxi Dios ni runi cani rudxiiba laca laa, peru racané be cani qué rudxiiba laca laa» (1 Pedro 5:5). Ne nga nga ti razón ni jma risaca nápanu para chinándanu ejemplu stiʼ Moisés, ti hombre ni qué nudxiibaʼ laa.