Xi naquiiñeʼ gúninu para chuulaʼdxiʼ Dios cani rúninu. Ñee caquiiñeʼ chinándanu stale ley la? Coʼ, cadi zacá diʼ ni. ¡Galán nga qué rinábabe nga laanu! Jesucristu, Xiiñiʼ Dios, na né ti diidxaʼ si zanda guininu ni canabaʼ Dios laanu. (Biindaʼ Marcos 12:28-31.)

Primé, naquiiñeʼ gánnanu xi cayaca ora gucuá ca diidxaʼ riʼ. Bizaaca ni 11 stiʼ beeu nisán. Maʼ cayaadxaʼ xhupa xhonna gubidxa si para guuticabe Jesús, ne laabe cusiidibe ndaaniʼ yuʼduʼ. Cumu ca enemigu stibe cuyúbisicaʼ paraa gucheebe la? gunabadiidxacaʼ laabe stale cosa para gusábacaʼ laabe. Cumu ninruʼ xi guiníʼcabe ora ricabi Jesús laacabe la? tobi de laacabe gunabadiidxaʼ Jesús: «Uná nga mandamientu ni jma risaca» (versículo 28).

Cadi gunabadiidxadibe ni purtiʼ dxandíʼ racaláʼdxibe gánnabe. Chupa chonna de ca judíu que ridindediidxacaʼ pur gánnacaʼ gunáʼ nga ley ni jma risaca lade jma de xhoopaʼ gayuaa ley ni bidii Dios Moisés, xcaadxi na guiráʼ xixé ni risaca ne cadi naquiiñeʼ guisaca chupa chonna si. Xi guiníʼ Jesús yaʼ.

Ora bicabi Jesús, qué nuzeeteʼ diʼ ti mandamientu si, sínuque chupa. Primé guniʼbe: «Gunaxhii Dios stiuʼ de idubi ladxidóʼ loʼ ne de idubi xhialma luʼ ne de idubi xquenda biaani luʼ ne de irá stipa stiu» (versículo 30; Deuteronomio 6:5). Ni riníʼ ca diidxaʼ riʼ nga gusihuínninu nadxiinu Jiobá lu guiráʼ ni rúninu ne lu guiráʼ ni nápanu. Ti libru ni rusiene de Biblia na: «Naquiiñeʼ gannaxhiinu Dios lu guiráʼ xixé ni gúninu». Nga runi, pa tuuxa dxandíʼ nadxii Dios zuni intiica cosa ti chuulaʼdxiʼ Dios ni runi (1 Juan 5:3).

Guiropa mandamientu ni guníʼ Jesús nga: «Gunaxhii stobi cásica nadxii lu lii» (versículo 31; Levítico 19:18). Pa nadxiinu Dios la? laaca zusihuínninu nadxiinu binni (1 Juan 4:20, 21). Pa nadxiinu sti binni cásica nadxiinu laanu la? zúninu laabe ni ñuuláʼdxinu ñúnibe laanu. (Mateo 7:12). Pa gúninu zacá, zusihuínninu nadxiinu Dios, ni bizáʼ guiráʼ binni casi laa (Génesis 1:26).

Pabiáʼ risaca para laanu gannaxhiinu Dios ne gannaxhiinu binni yaʼ. Sicaríʼ guníʼ Jesús «Gasti ru mandamientu jma risaca que iropa mandamientu ca» (versículo 31). Lu sti textu ra cayeeteʼ relatu riʼ, Jesús guníʼ guiropa mandamientu riʼ nga naaze xcaadxi mandamientu (Mateo 22:40).

Cadi nagana diʼ nga gusiéchenu Dios. Guiráʼ ni rinábabe laanu zanda guininu ni né chupa chonna si diidxaʼ: gannaxhiinu laabe ne gannaxhiinu binni. Ne nga nga ni rinábabe laanu ti ganda guni adorarnu laabe jneza. Peru cadi pur ni guininu o pur ni guni sentirnu nga zusihuínninu nadxiinu binni, sínuque naquiiñeʼ gusihuínninu ni lu cani gúninu (1 Juan 3:18). Ñee riuuláʼdxiluʼ gánnaluʼ ximodo zanda gusihuínniluʼ nadxiiluʼ Jiobá, Dios ni nadxii binni la? (1 Juan 4:8.)