Biniiseʼ ndaaniʼ ti barriu ra nabeza binni ni runi dxiiñaʼ ndaaniʼ guidxi Turku, ni riaana ruaa nisadóʼ. Bixhozeʼ nabé biʼniʼ ganar dxi gudxite box, naa ne sti bicheʼ nahuiiniʼ laaca gudxítedu ni. Dxi guzayaʼ scuela nabé guluaaʼ golpe cani bicaalú naa. Dxi maʼ ziniiseʼ guyuaaʼ lade ti banda ni nabé runibiáʼ binni, ne jmaruʼ si gudindenedu xcaadxi. Ne laaca guyuuladxeʼ saa ni rábicabe heavy metal, ne ngue bicaa naa guiníʼ iqueʼ gacaʼ tuuxa binni risaca ra guxhidxeʼ ne guundaʼ rock.

De raqué guziéʼ ti batería, ne gundisaʼ ti grupu ne qué nindaa maʼ naa biindaʼ ládecabe. Nabé raca iqueʼ ora maʼ cayuundaʼ. Zeʼ dxi jma ziyuni biaʼ binni grupu que purtiʼ ruuyacabe naa casi ti binni ni riuulaʼdxiʼ tinde. Bixhídxidu nezalú stale binni ne biʼniʼ grabardu chupa chonna discu, ne últimu discu ni biʼniʼ grabardu, nabé guyuulaʼdxiʼ binni ni. Ra ziluxe ca iza stiʼ 1980 bínidu ti gira Estados Unidos para siʼ binni discu stidu. Bixhídidu chupa chonna lugar ndaaniʼ guidxi Nueva York ne Los Ángeles, ne ante guibiguétadu Finlandia guninedu chupa chonna de ca binni ni racané cani ruundaʼ para gácacaʼ tuuxa risaca.

Neca nabé riuuladxeʼ chuaaʼ lu grupu que la? laaca racalaʼdxeʼ chuaaʼ jma nayecheʼ. Nabé nagana nga para gaca binni tuuxa risaca lade cani ruundaʼ, ne qué niníʼ iqueʼ pa zaqué ni; ne qué riuaa nayecheʼ pur ca cosa ni runeʼ que. Cumu riníʼ iqueʼ nabé malu naa la? ridxibeʼ guicayaguiéʼ ndaaniʼ infiernu. Biyubeʼ guiráʼ clase libru ni caníʼ de religión para ñannaʼ de cani naguu xizaa naa, ne gunabaʼ Dios de guidubi ladxiduáʼ gacané naa, peru guníʼ iqueʼ qué ziuu dxi gusiecheʼ laabe.

Para ganda gapaʼ ni guibaneniáʼ la? bineʼ dxiiñaʼ ndaaniʼ ti oficina ni riguiiziʼ correu. Ti dxi gunnaʼ testigu stiʼ Jiobá tobi de cani runeniáʼ dxiiñaʼ. Oraqueca gunabadiidxaʼ laabe stale cosa. Jneza modo biquiiñebe Biblia para bicábibe ca guendarinabadiidxaʼ que, ne ngue bicaa naa chúʼladxeʼ guiziideʼ jma, de raqué bizulú biindanebe naa Biblia. Chupa chonna semana despué  bíʼnicabe ti contratu né grupu stinneʼ que para guni grabardu ti discu ne gutoocabe ni Estados Unidos. Guníʼ iqueʼ ngue nga ni cabezaʼ para gacaʼ ti binni risaca.

Bizeeteʼ lu Testigu ni cayuundané naa Biblia que napaʼ gana guneʼ grabar sti discu, ne despué maʼ zuneʼ stipa pur chinanda ca conseju stiʼ Biblia. Laabe qué ñábibe naa xi riníʼ íquebe, sínuque gúdxibe naa guundaʼ ca diidxaʼ ni guníʼ Jesús lu Mateo 6:24, ra na: «Iruti zanda gapa chupa xpixuaana». Biaande si luaʼ ora biindaʼ ca diidxaʼ guníʼ Jesús riʼ. Xhupa xhonna gubidxa despué dede biaande si lú Testigu ni cayuundané naa Biblia que ora gudxeʼ laa maʼ bisaanaʼ grupu stinneʼ que purtiʼ racalaʼdxeʼ chinandaʼ Jesús.

Biblia zeeda gaca casi ti speju ra rihuinni paraa cucheeʼ (Santiago 1:22-25). Bidieeʼ cuenta gucaʼ ti binni nabé feu xpiaʼ: nabé bichayaʼ bi yanneʼ ne guyuuladxeʼ gapaʼ stale cosa, guniéʼ diidxaʼ guidxa o diidxaʼ dxabaʼ, gudindeniáʼ tutiica binni, gudubaʼ gueza ne guizáʼ guxudxeʼ. Ora bidieeʼ cuenta cadi nabaneʼ casi modo rusiidiʼ Biblia, bineʼ sentir casi ora nidxelasaaʼ cueʼ ti pader. Peru gudixhe iqueʼ guchaaʼ modo nabaneʼ (Efesios 4:22-24).

Dxi nacubi caziideʼ que nabé bichiiñaʼ xquendabiaaneʼ naa pur ca cosa ni qué ñuneʼ jneza dxiqué. Peru Testigu ni cayuundané naa Biblia que nabé gucané naa. Biluiʼbe naa xiná Biblia lu Isaías 1:18, ra na: «Neca nabé naxiñáʼ rini ca donda stitu, zácacani naquichibé casi nieve». Textu riʼ ne xhupa xhonna gucanécani naa gannaʼ dxandíʼ rilaselaʼdxiʼ Bixhózenu ni nuu guibáʼ binni ne racaláʼdxibe gutiidiláʼdxibe stonda cani gaca arrepentir pur ca cosa ni biʼniʼ.

Ora binebiaʼyaʼ Jiobá ne gunnaxhiee laabe la? ngue bicaa naa gudieeʼ laabe xquendanabaneʼ (Salmo 40:8). Guyuaanisaʼ lu iza 1992 lu ti guendaridagulisaa roʼ stiʼ stale guidxi ni runi ca testigu stiʼ Jiobá ni gucaʼ San Petersburgo (Rusia).

Maʼ napaʼ stale xhamiguaʼ ni dxandíʼ nachaʼhuiʼ ndaaniʼ xquidxi Jiobá. Gatigá ridagulisaadu para guxhídxidu saa sicarú ne chuʼdu nayecheʼ pur ni bisigaʼdeʼ Dios binni riʼ (Santiago 1:17). Nabé sicarú ndaayaʼ bidii Dios naa ra bichaganayaʼ Kristina. Nabé stale guendanayecheʼ huayapaniáʼ xheelaʼ ne zaqueca huadxaagaludu guendanagana, ne laacaʼ nánnabe xi guiráʼ nuu ndaaniʼ ladxiduáʼ.

Pa qué ñacaʼ testigu stiʼ Jiobá, zándaca maʼ biiti binni naa. Dxiqué guizáʼ gupaʼ guendanagana, nin caʼruʼ guireeʼ de tobi maʼ nuaaʼ lu stobi. Peru yanna huaxa maʼ nannaʼ xi pur nabaneʼ ne maʼ rieneʼ cani guluu xizaa naa dxiqué.