ANTE guicábinu guendarinabadiidxaʼ riʼ, chidúʼyanu chupa ejemplu zeeda lu Biblia ra biʼniʼ castigar Dios binni, casi Nisaguié naroʼbaʼ biaba dxi bibani Noé ne dxi binitilú ca cananeu.

NUU BINNI RINÍʼ: «Nabé malu Dios purtiʼ biiti stale binni dxi biaba Nisaguié naroʼbaʼ ra bilá Noé si né binnilidxi».

NI RUSIIDIʼ BIBLIA: Dios guníʼ: «Qué riecheʼ diaʼ ora gatiʼ binni malu, sínuque riecheʼ ora guchaacaʼ modo laacaʼ ne guibánirucaʼ» (Ezequiel 33:11). Nga runi, zanda guininu qué ñecheʼ diʼ Dios ora binitilú ca binni malu ni guyuu dxi bibani Noé. Yanna, xiñee biitibe ca binni que yaʼ.

Biblia cusiene biʼniʼ castigar Dios ca binni malu que para «idxibi irá binni ni qué rulabi laabe, ne ganna ca xi cabeza laacaʼ» (2 Pedro 2:5, 6). Laaca ruzeeteʼ Biblia cásica biʼniʼ Dios ca cosa ca dxiqué zacaca rúnibe cani yanna.

Dios maca bisiene neca riáʼ ca binni malu ni chiguuti peru qué riaandaʼ diʼ laa pabiáʼ malu rácacabe né binni, nga runi para laa caquiiñeʼ quíxecabe ni rúnicabe. Maʼ qué zandaa zabee Dios guiráʼ ni cayuniná binni ne guiráʼ ca cosa ni qué raca jneza.

Modo biʼniʼ Dios dxiqué rusihuínnini nadxiibe binni, nga runi, guiráʼ biaje riguixhenabe laacaʼ ante guni castigarbe laacaʼ. Casi ante guiaba Nisaguié naroʼbaʼ que biseendabe Noé chitixhená ca binni que peru qué ninacaʼ nucaadiágacaʼ. Biblia ruzeeteʼ: «Caʼru guiene ca xi chi gaca dede ora beeda nisa que, ziné irá caʼ» (Mateo 24:39).

Ñee bichaa Dios modo runi ca cosa ca ra gudiʼdiʼ dxi la? Coʼ. Jiobá gudxi xquidxi Israel pa gúnicaʼ guiráʼ guendaquéiquiiñeʼ runi ca binni ni nabeza ndaaniʼ ca guidxi nuu gaxha de laacaʼ, zudiibe lugar gucaalú ca xhenemígucaʼ laacaʼ, guinitilú Jerusalén, capital sticaʼ, ne chinécabe laacaʼ casi esclavu. Qué nulabi diʼ ca israelita que laabe ne bíʼnicaʼ guiráʼ guendaquéiquiiñeʼ runi ca binni nabeza gaxha de laacaʼ. ¡Dede bizaaquicaʼ ca xiiñicaʼ para ca dios sticaʼ! Ñee biʼniʼ castigar Jiobá laacabe la? Biʼniʼ castigar pue, peru ante gúnibe ni gatigá biseendabe ca profeta stibe ra nuucaʼ para gabi laacaʼ guchaacaʼ xpiaʼcaʼ ante guinitilucaʼ. Dede gúdxibe laacaʼ: «Jiobá, Señor ni jma nandxóʼ, qué zúnibe nin ti cosa sin qué gábibe ni nánnabe laasibe ca xpínnibe cani riguixhená» (Amós 3:7).

 NI NAQUIIÑEʼ GÁNNANU: Modo biʼniʼ Dios dxiqué para guni castigar binni riguixhedxí ni ladxidoʼno. Zanda guni crenu zuni castigar Jiobá ca binni malu purtiʼ Biblia na: «Ca binni malu ca zareecaʼ [...]. Peru cani nadóʼ zacaacaʼ guidxilayú, ne zadxélacaʼ guendanayecheʼ purtiʼ ziuu stale guendariuudxí» (Salmo 37:9-11). Dios maʼ gudixhe ique guni castigar ca binni malu para cuee guiráʼ ni cayuniná binni. Lii xi riníʼ íqueluʼ de ni chigúnibe ca yaʼ. Ñee niniʼluʼ nácabe ti Dios malu la? o ti Dios ni rilaselaʼdxiʼ binni.

NUU BINNI RINÍʼ: «Cadi jneza diʼ biʼniʼ Dios ra binduuxeʼ ca cananeu que casi modo ruuticabe stale binni ni qué gapa donda yanna».

NI RUSIIDIʼ BIBLIA: «Guiráʼ neza stibe jneza cani. [Laabe nga] Dios ni runi ni riníʼ, ne qué runi ni malu» (Deuteronomio 32:4). Qué zanda diʼ guchaaganu ca guerra ni runi binni guidxilayú ne ora runi castigar Dios binni, purtiʼ qué ganna diʼ binni xi nuu ndaaniʼ ladxidóʼ stobi, peru Dios huaxa nanna ni.

Casi dxi biʼniʼ juzgar Dios ca binni ni guleza ndaaniʼ guidxi Sodoma ne Gomorra gudixhe íquebe gunitilube laacaʼ, peru Abrahán guyuu xizaa purtiʼ guníʼ ique cadi jneza ni chigúnibe. Ngue runi gunabadiidxabe Dios: «Ñee zunduubaluʼ binni ni runi ni jneza ra guutiluʼ ca binni malu la?». Qué guirá guidxagayaabe pa nuu Jiobá guni ngue laa ndaʼ naca ti Dios ni runi ni jneza. Né diidxaʼ nadóʼ gudxi Dios laabe qué zunitilú ca binni de Sodoma pa guidxela neca chii si binni nachaʼhuiʼ ndaaniʼ ni (Génesis 18:20-33). Nannadxíchinu biiyaʼ Dios xi nuu ndaaniʼ ladxidóʼ ca binni que ne biiyabe nabé malu laacaʼ (1 Crónicas 28:9).

Casi ca cananeu que la? biiyaʼ Dios malu laacabe, nga runi jneza ngue biʼniʼ ora gunabaʼ guinitilúcabe. Ca cananeu que nabé binibiáʼ binni laacaʼ purtiʼ nabani nabani ca baʼduhuiiniʼ que bizaaquicabe laacaʼ para ca dios stícabe ne bíʼnirucabe xcaadxi guendaquéiquiiñeʼ (2 Reyes 16:3). * Ca cananeu que maca nánnacaʼ gudxi Jiobá ca israelita que guicaacaʼ ca layú que. Ne cani bicaalú ca israelita que para ñaananecaʼ ca layú que la? cadi laasicabe bicaalucaʼ, sínuque nepeʼ Jiobá, ti Dios ni bisihuinni cayacané xquidxi.

Peru laaca bilaselaʼdxiʼ Jiobá ca cananeu ni bisaana de ñuni guendaquéiquiiñeʼ ne yenándacaʼ ni na ca ley stibe lu xquendanabánicaʼ. Casi Rahab, ti gunaa ni guzá zacasi, bilá Dios laa né binnilidxi. Ne dxi gunabaʼ ca binni de guidxi Gabaón guiácabe laacaʼ, bilacaʼ ne laaca bilá ca xiiñicaʼ (Josué 6:25; 9:3, 24-26).

NI NAQUIIÑEʼ GÁNNANU: Yanna riʼ zanda guizíʼdinu ti ejemplu galán pur modo biʼniʼ castigar Dios ca cananeu. Zeʼ dxi jma mayaca «unitilú [Dios] irá [binni malu ni] qué rulabi laabe, dxi cuidxi be cuenta laacaʼ» (2 Pedro 3:7). Pa nadxiinu Jiobá ne guzúʼbanu stiidxabe la? zabáninu sin yuubaʼ dxi maʼ gunitilube guiráʼ binni ni qué naʼ guni mandar gobiernu stibe laa.

Né diidxaʼ nadóʼ rusietenalaʼdxiʼ Jiobá laanu guiráʼ ni quixhe ique binni guni zanda gacaneni ca xiiñicaʼ o guninani laacaʼ. Stiidxa Dios cayabi laanu: «Nápaluʼ xidé cuiluʼ guendanabani ti cadi gátiluʼ, lii ne ca xiiñiluʼ, gannaxhiiluʼ Jiobá Dios stiluʼ, gucaadiágaluʼ stídxibe ne cadi guixéleluʼ de laabe» (Deuteronomio 30:19, 20). Ñee niníʼ Dios ca diidxaʼ ca pa ñaca riuuláʼdxibe gúnibe cosa malu la? o caniʼbe zacá purtiʼ nadxiibe laanu ne racaláʼdxibe cuinu gúninu ni jneza.