Biblia rusiidiʼ guiráʼ binni guidxilayú ruchee. Dede ora gálenu maca riuuláʼdxinu gúninu ni cadi jneza purtiʼ nga nga herencia ni bisaanané Adán laanu, primé bixhózenu. Nga runi nuu tiru rúninu xiixa cosa malu ne despué maʼ raca arrepentirnu pur cani bíninu. Guti Jesucristu, Xiiñiʼ Dios, para quixe ca donda stinu. Ne pur gútibe ca maʼ zanda gutiidilaʼdxiʼ Dios donda stinu. Ni bíʼnibe ca nácani ti cosa sicarú bisigaʼdeʼ Dios laanu. (Biindaʼ Romanos 3:23, 24.)

Nuu binni maʼ biʼniʼ xiixa cosa nabé malu ne rinabadiidxacaʼ pa ziuu dxi gutiidilaʼdxiʼ Dios stóndacaʼ. Nabé ratadxí ladxidoʼno ora guidúʼndanu ca diidxaʼ ni zeeda lu Biblia ra na: «[R]usiá rini sti Jesucristu Xiiñi be laanu de irá ni huachéʼ nu» (1 Juan 1:7). Dxandíʼ, de guidubi ladxidóʼ Jiobá rutiidilaʼdxiʼ dede ca cosa nabé malu ni bíninu pa gaca arrepentirnu de guidubi ladxidoʼno. (Biindaʼ Isaías 1:18.)

Pa racaláʼdxinu gutiidilaʼdxiʼ Jiobá donda stinu la? naquiiñeʼ gunibiaʼnu laabe: guiénenu ximodo rúnibe dxiiñaʼ, guiénenu ca conseju ne ca ley stibe (Juan 17:3). De guidubi ladxidóʼ Dios rutiidilaʼdxiʼ donda stiʼ tutiica binni gaca arrepentir pur stonda ne guni stipa pur guchaa. (Biindaʼ Hechos 3:19.)

Zanda gúninu ni riuulaʼdxiʼ Dios. Riénebe laanu purtiʼ nánnabe nácanu binni ruchee. Jiobá nachaʼhuiʼ ne rilaselaʼdxiʼ. Ñee cadi rucaa nga lii guiziidiluʼ xiruʼ zanda guʼnuʼ para chuuláʼdxibe ni ruʼnuʼ la? (Biindaʼ Salmo 103:13, 14.)