BIXUIʼLÚ cayuuyaluʼ dopacuuxhuʼ Noé ne familia stiʼ ndaaniʼ arca que, peru fuera que cayaba dxacha ti Nisaguié naroʼbaʼ. Guisi si cuzaaniʼ ti bele huiiniʼ stiʼ ti lámpara de aceite lúcabe ne dede cayaande lúcabe cayunadiágacabe cadiñentaa nisa que ique arca que ne cueʼ ni. Nanna pabiáʼ cuchibi guiráʼ ruidu que laacabe yaʼ.

Ruyadxí Noé familia stiʼ, raqué nuu xheelabe, guionnaʼ xiiñibe ne guionnaʼ xuaalídxibe. Nanna dxíchinu cudiibe xquixe Dios de guidubi ladxidoʼbe. Neca nabé nagana ra cadiʼdiʼ ca binni que, peru laabe guiidxi dxiichibe ca binnilídxibe ni jma nadxiibe, nazaaca nuucaʼ ne nabánicaʼ. Ne nanna dxíchinu biʼniʼ orárnebe laacaʼ para gudiibe xquíxepeʼ Dios, ne zándaca guniʼbe reciu para ganda gunadiágacaʼ xi caniʼbe purtiʼ nabé cayaca ridxi raqué.

Noé nabé gupa fe, Dios stiʼ, ne pur fe gúpabe que bilá Jiobá laabe ne binnilídxibe (Hebreos 11:7). Peru ñee maʼ cadi naquiiñeʼ gápabe fe purtiʼ si maʼ bilabe de Nisaguié naroʼbaʼ que la? Coʼ, purtiʼ ca dxi zeeda que jma naquiiñeʼ gusihuínnibe fe stibe. Nga ca nga laanu, jma naquiiñeʼ gápanu fe yanna ra nabáninu lu ca dxi nabé nagana riʼ. Guidúʼyanu xi zanda guizíʼdinu de ejemplu stiʼ Noé, ti hombre ni nabé gupa fe.

«Cuarenta dxi ne cuarenta gueelaʼ» bindaa nisaguié que (Génesis 7:4, 11, 12). Ora guca ziáʼ nisa que, biiyaʼ dxichi Noé ximodo bilá Jiobá ca binni nachaʼhuiʼ ne ximodo bisabanáʼ ca binni malu.

Cadi guiaandaʼ laanu xi bizaaca caadxi ángel. Cumu bidiicabe lugar gucaa Binidxabaʼ laacabe gúnicabe puru si ni riuuláʼdxicabe cásica runi la? stale de laacabe qué ninácabe ñaanacabe guibáʼ, lugar ra guluu Dios laacabe, ne beedacabe lu Guidxilayú riʼ guyuunécabe caadxi gunaa ne gupanécabe laacaʼ xiiñicabe ni biree lá nefilim. Peru dxi biaba Nisaguié naroʼbaʼ que bicueeza Dios ca ángel ni qué nuzuubaʼ stiidxaʼ que para maʼ cadi gueedacaʼ lu Guidxilayú (Judas 6; Génesis 6:4). Ni biʼniʼ ca ángel que nabé bisiecheʼ ni Binidxabaʼ purtiʼ ne ngue jmaruʼ si guca yuudxuʼ modo nabani binni, ne laanu nánnanu de lade guiráʼ dxiiñaʼ biʼniʼ Dios, binni nga ni jma galán bizaʼbe.

Peru ora biaba Nisaguié naroʼbaʼ que bicaani ca ángel ni qué nuzuubaʼ diidxaʼ que gusaanacaʼ cuerpu de beela ne dxita ni gúpacaʼ ne gúcacaʼ espíritu, ne maʼ qué ñuuruʼ dxi ñápacabe cuerpu casi binni. Xheelacabe ne ca xiiñicabe ni bisaanacabe gúticaʼ guiiguʼ ra gutiʼ guiráʼ binni ni guyuu dxiqué.

Dede dxi bibani Enoc, gadxe gayuaa iza ante guiaba Nisaguié naroʼbaʼ que, maca biseendatidxi Jiobá binni chigunitilú ca binni malu (Génesis 5:24; Judas 14, 15). Peru biʼniʼ binni stale guendaquéiquiiñeʼ dede biaʼ qué nunitilúsicaʼ Guidxilayú riʼ ne bidxá tipa ni de guendaquéiquiiñeʼ. Peru bedandá ora gáticabe. Ñee biecheʼ Noé ne binnilidxi pur ni cazaacacabe que la?

Coʼ. Ne laaca qué ñecheʼ diʼ Dios stibe, ni nabé riá binni (Ezequiel 33:11). Jiobá biʼniʼ guiráʼ ni gúndatiʼ pur nulá biaʼ tiica si binni. Biseendabe Enoc chitixhená ca binni que ne gúdxibe Noé gucuí ti arca. Stale iza bindaa dxiiñaʼ nadipaʼ biʼniʼ Noé ne binnilidxi que ne bíʼnicabe ni nezalú ca binni xquídxicabe. Ne laaca biseendaʼ Dios Noé chitidxi ca binni que «nusaana ca irá enda ruchee sticaʼ» ne chitidxi laacaʼ mayaca cuidxi Dios cuenta laacaʼ, cásica biʼniʼ Enoc (2 Pedro 2:5). Ñee bicaadiaga ca binni que laabe  la? Dede dxi nuu Jesús guibáʼ maca biiyaʼ guiráʼ ni cayaca lu Guidxilayú riʼ, ngue runi, chupa chonna gayuaa iza despué guniʼbe ca diidxaʼ riʼ: «Caʼru guiene ca xi chi gaca dede ora beeda nisa que, ziné irá ca» (Mateo 24:39).

Ñee riníʼ íqueluʼ xi guiráʼ biʼniʼ Noé ne binnilidxi biteeguʼ si Jiobá ra puertaʼ stiʼ arca que la? Lu cuarenta dxi cadi cabezadxí nisaguié que, zándaca gudíxhecabe ximodo gúnicabe caadxi dxiiñaʼ huiiniʼ ndaaniʼ arca que, casi gapasaacabe laacabe, gúʼyacabe xi caquiiñeʼ lugar ra nabézacabe que ne guni tendércabe ca maniʼ que... Gudiʼdiʼ si caadxi dxi de nuucabe ndaaniʼ arca ngola que, málasi bizulú caniibi ni. Cumu cadi cusaana de gaca ziáʼ nisa que la? gundisaʼ ni arca que de layú ne zindísaruʼ ni laa dede ra maʼ qué nuruuxhaʼ ni yú ne bixuubaʼ laahua ni lu nisa que (Génesis 7:17). ¡Raqué nga bihuinni pabiáʼ nadipaʼ poder napa Jiobá, ti Dios ni zanda guni guiráʼ xixé cosa!

Noé bidii xquíxepeʼ Jiobá pur bilá laa ne binnilidxi, peru cadi pur nga si bíʼnibe ni, sínuque laaca bíʼnibe ni purtiʼ nánnabe pur rilaselaʼdxiʼ Jiobá binni, ngue runi biquiiñeʼ laacabe para yetídxicabe ca binni ni biiti Nisaguié naroʼbaʼ que xi chiguni Dios. Zándaca ruluíʼ gastiʼ qué zabeendú Noé dxi cayuni ca dxiiñaʼ nadipaʼ que. ¡Qué niná ca binni qué nucaadiágacaʼ! Yanna pa guiníʼ íquenu la? zándaca gupa Noé biʼchiʼ, bizaʼnaʼ ne sobrinu, peru familia jma gaxha si stibe nga guná bicaadiaga laabe, ninruʼ stobi (Génesis 5:30). Dxi maʼ nuu xhono binni que ndaaniʼ arca que nabé gutadxí ladxidoʼcaʼ ora guníʼ íquecaʼ xadxí guzacaʼ yetídxicaʼ ca binni que nuyúbicaʼ nilacaʼ.

Qué huachaa diʼ Jiobá modo laa (Malaquías 3:6). Jesucristu bisiene zeeda gaca ca dxi stinu riʼ casi «dxi bibani Noé» (Mateo 24:37). Tiempu nabáninu riʼ, nuu stale guendanagana ni chiguiluxe ra guinitilú guidxilayú malu riʼ. Yanna riʼ laaca caguixhená xquidxi Dios guiráʼ binni ni racalaʼdxiʼ gucaadiaga. Lii yaʼ, ñee zuʼnuʼ ni cayabi Dios lii para ganda guilaluʼ la? Pa maʼ biziidiluʼ stiidxaʼ Dios ne maʼ nánnaluʼ xi naquiiñeʼ gúniluʼ para gulabe lii, ñee zanaluʼ chitídxiluʼ ni sti binni cásica biʼniʼ Noé ne binnilidxi la?

Cani nuu ndaaniʼ arca que zándaca binadiágacaʼ modo guxidxi yaabiʼ ca yaga stini ora cuniibi nisa  que ni. Ñee guyuu Noé xizaa pa naroʼbaʼ ca ola stiʼ nisa que o pa zuni huantar arca que la? Coʼ. Yanna riʼ nuu stale binni qué runi cré pa dxandíʼ biʼniʼ huantar arca que, peru Noé qué ñuu ora niníʼ ique pa qué zuni huantar ni. Biblia na: «Bini cre Noé Dios, nga runi [...] bizáʼ be [ti] arca» (Hebreos 11:7). Xi biʼniʼ crebe yaʼ. Biʼniʼ crebe pactu biʼniné Jiobá laabe. Dios guníʼ zapa Noé ne binnilidxi dxi guiaba Nisaguié naroʼbaʼ que (Génesis 6:18, 19). Ñee qué ñanda ñapa Dios ni bizáʼ guibáʼ ne Guidxilayú ne ni bizáʼ guiráʼ xixé ni nuu lu Guidxilayú arca que la? ¡Ñanda pue! Ne napa Noé razón para guni cré dxandíʼ zuni Jiobá cani maʼ guníʼ, ne ngapeʼ nga bizaaca. Bilá Dios laabe ne binnilídxibe «ndaani arca que ra undisa nisa ni» (1 Pedro 3:20).

Despué de cuarenta dxi ne cuarenta gueelaʼ gulezadxí nisaguié que. Pa chinándanu calendariu ni nápanu yanna riʼ la? zándaca guca ni lu beeu diciembre stiʼ iza 2370 ante de ca dxi stiʼ Jesús. Peru cayaadxaruʼ para guireecabe ndaaniʼ arca que. Stubi lucha arca ra nuu ca binni ne ca maniʼ que canaxuubaʼ laahua lu nisadóʼ ngola que, ne nuuni luguiáʼ de ca dani ni jma nasoo (Génesis 7:19, 20). Bixuiʼlú zuba Noé ne ca xiiñiʼ, Sem, Cam ne Jafet, caguíxhecaʼ ximodo gúnicaʼ ca dxiiñaʼ jma nadipaʼ raca ndaaniʼ arca que para ganda guyaanacabe ca maníʼ que, chúʼcame nayá ne nazaaca. Laanu nánnanu laaca Dios ni bisidóʼ ca maniʼ que para gunda guyuucaʼ ndaaniʼ arca que, laaca laabe nga gúpabe laacame biaʼ dxi bindaa Nisaguié naroʼbaʼ que. a

Noé bicaa guiráʼ xixé ni bizaaca dxi biaba Nisaguié naroʼbaʼ que. Cani bicaabe que nga bisihuinni padxí bizulú Nisaguié naroʼbaʼ que ne padxí gulezadxí ni. Laaca cusihuínnini bilahua Guidxilayú riʼ 150 dxi. Despué bizulú biete nisa que. Ne qué ziuu dxi guiaandaʼ ti dxi stiʼ beeu abril stiʼ iza 2369, purtiʼ dxiqué dede naguudxi gunaazeʼ arca que yu «lu ca dani stiʼ Ararat», ra nuu guidxi Turquía yanna riʼ. Gudiʼdiʼ si 73 dxi, lu beeu junio stiʼ iza que, bihuinni ique ca dani ni jma nasoo. De raqué gudiʼdiʼ xhonna beeu, lu beeu septiembre, bixheleʼ Noé ti ndaa ique arca que. Pur ni bíʼnibe que maʼ gunda gudiñe gubidxa ne bi gaʼndaʼ laacabe. Dede ante guiree Noé ndaaniʼ arca que, maʼ bizulú biiyaʼ pa maʼ naguidxi nuu raqué ne pa maʼ zanda cueza binni. Ni bíʼnibe primeru nga bindaabe ti biaʼquiʼ, maniʼ huiiniʼ riʼ bipapame peru laaca lu arca que bedatime purtiʼ qué nidxélame paraa cuime. De raqué bindaabe ti paloma, laame bibiguétame chupa chonna biaje beedatime lu arca que, peru últimu bidxélame ti lugar ra nabidxi (Génesis 7:24–8:13).

Laanu nanna dxíchinu, ni jma risaca para Noé nga guni xhiiñaʼ Dios. Ne zanda guiníʼ íquenu familia stiʼ Noé qué rusaana de guidagulisaacaʼ para guni orarcaʼ Dios ne guiniʼcaʼ ximodo huayapa Bixhózecaʼ ni nuu guibáʼ laacaʼ. Ante quixhe ique Noé guni xiixa, primeru biyubi ganna ximodo ruuyaʼ Jiobá ni racalaʼdxiʼ guni. Ne neca maʼ ziné Noé jma de ti iza ndaaniʼ arca que ora beeda guuya maʼ nabidxi xhuxhu nuu Guidxilayú que, peru qué nuxheleʼ diʼ puertaʼ stini ne niree ra daguyoo que nagueendaca (Génesis 8:14). Qué ñúnidibe nga, sínuque gulézabe gabi Jiobá laabe xi gúnibe.

Cani naca xaíque ndaaniʼ ti familia zanda guiziidicaʼ stale cosa de ejemplu bisaana Noé, ti hombre ni qué nusaana de ñuni ni na Dios. Laabe nabé gudixhe chaahuibe guiráʼ ni chigúnibe, bíʼnibe dxiiñaʼ, gulézabe ne gúpabe ca binnilídxibe ne ca maniʼ que. Ne jma gucuá íquebe gúnibe ni na Jiobá primé lu xquendanabánibe. Pa chinándanu ejemplu sti Noé, hombre ni nabé gupa fe riʼ, guizáʼ naroʼbaʼ ndaayaʼ zacaa ca binnilídxinu.

Últimu gudxi Jiobá laabe: «Biree ndaaniʼ arca ca, lii ne xheelaluʼ ne ca xiiñiluʼ ne xheelaʼ ca xiiñiluʼ». Óraque bizuubaʼ familia que stiidxaʼ Jiobá ne bireecaʼ ndaaniʼ ni, de raqué maʼ biree ca maniʼ que. Peru cadi guiníʼ íquenu luguialisaa bireecame. Biblia ruzeeteʼ juntu biree cada clase maniʼ que ndaaniʼ arca que (Génesis 8:15-19). Dxi maʼ biree Noé ne binnilidxi ndaaniʼ arca que, ne maʼ nuucaʼ ique dani Ararat, maʼ cacaacaʼ bi nayá, biiyacaʼ nayaguieʼ nuu Guidxilayú, maʼ qué guinni diʼ ca nefilim que, maʼ guirutiʼ tu cadinde, maʼ qué guinni ca ángel malu que, ne laaca maʼ gastiʼ nin ti binni malu ni guyuu ante que. b Zaqué nga bizulú binni guidxilayú sti biaje.

 Noé maca nanna xi naquiiñeʼ guni. Bizulú biʼniʼ adorarbe Jiobá: bíʼnibe ti altar ne gucuaabe caadxi de ca maniʼ ni nayá para Dios, ca maniʼ ni guluube gadxe ndaaniʼ arca que, para gudiibe Dios casi ofrenda (Génesis 7:2; 8:20). Ñee bisiéchebe Dios ne ni bíʼnibe que la?

Biblia cayabi laanu biiyaʼ Jiobá ni biʼniʼ Noé que casi «ti xhoʼ naxhi ni riuuláʼdxibe guicaabe». Yuubaʼ guyuu ladxidoʼbe biaʼ dxi bidxá Guidxilayú riʼ de guendaquéiquiiñeʼ que biree ni, ne biʼniʼ sentirbe nayecheʼ ora bíʼyabe nuu ti familia cá ique guni ni nabe lu Guidxilayú riʼ. Peru qué ribézabe gácacaʼ binni ni qué liica zuchee, purtiʼ nánnabe dede nahuiiniʼ binni rucaa ladxidóʼ laa guni guendaquéiquiiñeʼ (Génesis 8:21). Yanna, guidúʼyanu ximodo bíʼnibe para qué nusaana de ñápabe paciencia binni ne ñabe laacaʼ.

Dxi maʼ qué nuzuubaʼ Adán ne Eva diidxaʼ la? maʼ qué ñapa diʼ yú stiʼ Guidxilayú riʼ ndaayaʼ stiʼ Dios, ngue runi maʼ nagana guca para laacabe nudxiibacabe luni. Peru bedandá dxi bisaana de ñaca ni zaqué, purtiʼ ti dxi guníʼ Lamec, bixhoze Noé, pur xiiñiʼ zaguu Dios ndaayaʼ binni guidxilayú. Ne lá Noé ruluíʼ si riniʼni «Guiziilaʼdxiʼ» o «Gatadxí ladxidóʼ». Zándaca guyuu Noé nayecheʼ ora gunna zuuyaʼ ora gaca ni bizabiruaa bixhoze que ne maʼ qué zaca nagana para laa guni dxiiñaʼ layú. ¡Yanna huaxa maʼ nánnanu xiñee nagueendaca bizulú biʼniʼ Noé dxiiñaʼ layú! (Génesis 3:17, 18; 5:28, 29; 9:20.)

Jiobá bidii caadxi ley cani za de Noé ti gánnacaʼ ximodo guibánicaʼ. Ca ley que cadi nagana para chinándacabe cani ne cadi nagana para guiénecabe cani, casi ley ni na cadi guuticabe binni ne cadi iquiiñecabe rini modo qué riuulaʼdxiʼ Dios. Ne bíʼninebe binni guidxilayú ti pactu: bidii stiidxabe qué ziuuruʼ dxi gueedanebe ti Nisaguié naroʼbaʼ para guutibe laacaʼ. Laaca biquiiñebe ti arco iris para gusihuínnibe dxandíʼ ni guniʼbe que. Nga runi dede yanna ora guidúʼyanu ti arco iris guibáʼ, riguixhedxini ladxidoʼno purtiʼ rusietenalaʼdxiʼ ni laanu ni bizabiruaa Jiobá (Génesis 9:1-17).

Pa ñaca cadi dxandíʼ historia stiʼ Noé la? niluxe ni ra gucuá arco iris que. Peru dxandíʼ bibani Noé ne bidxaagalurube stale guendanagana. Tiempu que nabé xadxí bibani binni ne laabe laaca xadxí bibánibe purtiʼ gudiʼdiʼ si Nisaguié naroʼbaʼ que bibánirube xhonna gayuaa cincuenta iza..., peru gudíʼdibe stale yuubaʼ. Casi ti biaje la? bíʼnibe ti cosa ni cadi jneza, guxúdxibe, ne pur ngue biʼniʼ Canaán, xhiágabe, sti cosa jma naxoo, pur ni biʼniʼ Canaán que guleendú ca xiiñiʼ stale guendananá. Ne cumu stale iza bibani Noé la? biiyabe xi guiráʼ guendaquéiquiiñeʼ biʼniʼ binni dxi bibani Nemrod, ne biiyabe biʼniʼ cani za de laabe xcaadxi cosa malu, biʼniʼ adorarcaʼ bidóʼ. Peru laaca biiyabe biʼniʼ cani za de laabe ni jneza. Casi Sem xiiñibe la? nabé gupa fe ne pur ngue bidii ti ejemplu galán familia stiʼ (Génesis 9:21-28; 10:8-11; 11:1-11).

Laanu laaca cadi naquiiñeʼ gusaana de gápanu fe cásica biʼniʼ Noé. Neca guiráʼ ladu nuu binni ni qué rulabi Dios ni dxandíʼ o nuu de laacaʼ dede rusaanacaʼ de gúnicaʼ ni nabe la? peru laanu cadi naquiiñeʼ diʼ gúninu zacá. Nabé rusisaca Jiobá laanu ora qué rusaananu de gúninu ni na ne ora qué rixélenu de laa. Ne casi guníʼ Jesús que: «Tu qué ixhacalaʼdxi dede dxi iluxe irá ni la? zalá» (Mateo 24:13).