Maʼ guiráʼ ladu nuu pornografía. a Rihuínnini lu tele, lu moda, lu ca saa ni rucaadiaga binni, lu Internet (casi lu ca sitiu ra rudxiibaʼ binni foto para guʼyaʼ xcaadxi binni); lu ca anunciu, lu película, lu revista, lu videojuego, lu teléfono celular, lu computadora laptop, tablet ne xcaadxi cosa casi laacani. Ruluíʼ si maʼ biaa binni guʼyaʼ pornografía ca casi xiixa ni cadi malu. Qué huayuu dxi guidale binni ni guʼyaʼ pornografía casi cayaca ni yanna riʼ, ne zidaleruʼ binni ni cayuni zacá (biiyaʼ cuadru ra na  «Caadxi cosa ni naquiiñeʼ gánnanu de pornografía»).

Yanna riʼ nabé maʼ cuchaa modo riníʼ ique binni de pornografía. Ti profesora ni láʼ Gail Dines bicaa ca diidxaʼ riʼ: «Ca cosa de idxa guidxa ni guca pornografía dura para binni dxiqué yanna riʼ maʼ pornografía blanda ni».

Lii xi riníʼ íqueluʼ de ni bizéʼtenu ca yaʼ. Ñee rábiluʼ nácani ti cosa ni cadi malu ni zanda guiechené binni la? o nácani casi ti venenu ni zanda guuti binni. Jesús guníʼ: «Ti yaga ni nazaaca, zudii cuananaxhi galán, peru ti yaga yuudxu la? zudii cuananaxhi ni qué zaquiiñeʼ» (Mateo 7:17). Xi ribeendú binni ora ruuyaʼ pornografía yaʼ. Para ganda guicábinu ni, chigusiénenu chonna guendarinabadiidxaʼ ni caníʼ de pornografía.

NI GUNÍʼ CA BINNI NI NANNA DE LAANI: Pornografía ca nácani ti viciu ni nabé nagana para gusaana binni, ne cásica ca binni ni ruundaʼ de tema riʼ ne xcaadxi binni ni racané ca binni ni napa viciu guʼyaʼ ni, nacaʼ zeeda gácani casi crack (ti tipu de cocaína).

Brian, b ti hombre ni gupa viciu guʼyaʼ pornografía lu Internet, guníʼ: «Gastiʼ qué ñanda nucueeza naa de ñuuyaʼ ni. Rúnini naa casi ti binni ni guduʼbaʼ guixi. Ne bineʼ sentir napaʼ donda dede racadiʼteʼ ne riuubaʼ iqueʼ. Biraruʼ ni bineʼ para nusaanaʼ ni, peru gudiʼdiʼ iza para gunda bisaanaʼ ni».

Ca binni ni napa viciu guʼyaʼ pornografía rucaachicaʼ ni cayúnicaʼ. Qué liica riníʼcabe ne ruluíʼ qué rúnicabe xiixa cosa malu. Ne laaca nabé rixélecabe de binni, rituí lúcabe, riuucabe xizaa, rápacabe depresión ne nabé ridxiichicabe. Nuu de laacabe dede ricá ique guuti laca laa. Sergio, ti hombre ni gundeteʼ pornografía lu celular stiʼ guiráʼ dxi, guníʼ: «Huaxiéʼ bidxaagaʼ binni ne qué nidxelaʼ xi ñuneʼ. Bineʼ sentir qué iquiiñeʼ para guneʼ xiixa, bineʼ sentir napaʼ donda, nuaaʼ stubeʼ ne naaze dxiichiʼ viciu que naa. Nabé bituí luaʼ guyubeʼ tu gacané naa ne nabé bidxibeʼ ñuneʼ ni».

Pornografía ca nabé runinani binni, neca ti ratu huiiniʼ si guʼyaʼ ni o málasi gueeda guuya ni neca qué racalaʼdxiʼ. Ti doctora láʼ Judith Reisman, ni nabé runibiáʼcabe purtiʼ ruundaʼ de pornografía, guníʼ caadxi diidxaʼ nezalú ti comité stiʼ Senado stiʼ Estados Unidos. Laabe nabe: «Guiráʼ cosa de idxa guidxa ni ruuyaʼ binni riaaziʼ cani lu xquendabiaaniʼ ne nagueenda ruchaa cani xquendabiaaniʼ binni neca qué naʼ [...] ne nagana para guixiá cani ne nuu de laani maʼ qué liica randa rixiá». Susan, ti baʼdudxaapaʼ de 19 iza ni biʼyaʼ pornografía lu Internet neca cadi ngue nuu guʼyaʼ, ne despué gúpapeʼ viciu guʼyaʼ ni, guníʼ sicaríʼ: «Guiráʼ ni biiyaʼ que biaaziʼ cani lu xquendabiaaneʼ. Ne málasi ridiʼdiʼ cani biiyaʼ que lu xpiaaneʼ neca qué gapaʼ gana. Zuluaʼsiaʼ qué ziuu dxi guixiá cani lu xquendabiaaneʼ».

NI NAQUIIÑEʼ GÁNNANU: Ca binni ni ruuyaʼ pornografía ca rácacaʼ esclavu stini ne nabé runinani laacaʼ (2 Pedro 2:19).

NI GUNÍʼ CA BINNI NI NANNA DE LAANI: «Pornografía ca runduuxeʼ ni guendaxheelaʼ ne familia» Zacá ruzeeteʼ ti libru ni láʼ (The Porn Trap [Ca trampa stiʼ porno], ni bicaa Wendy ne Larry Maltz).

Pornografía ca runinani xquendaxheelaʼ binni ne familia stiʼ purtiʼ...

• ... pur laani maʼ qué runi cré xheelaʼ binni laa, maʼ qué runi sentir xheelaʼ galán ora gatané laa ne rucaani binni gusaana de gannaxhii xheelaʼ (Proverbios 2:12-17).

• ... rucaani binni guni puru si ni racalaʼdxiʼ, ruxheleʼ ni laa de xheelaʼ ne maʼ qué ridxá neca gatané xheelaʼ (Efesios 5:28, 29).

• ... rucaani binni guiníʼ ique nexhené tuuxa ne chuulaʼdxiʼ guni cosa dxabaʼ (2 Pedro 2:14).

• ... pur laani rucaa binni xheelaʼ gúnicaʼ cosa dxabaʼ ora maʼ néxhecaʼ (Efesios 5:3, 4).

• ... rucaani binni guiníʼ ique gusaana xheelaʼ ne gapa jnadxii (Mateo 5:28).

Biblia na cadi naquiiñeʼ diʼ gucheené binni xheelaʼ (Malaquías 2:16). Purtiʼ ora riuuné binni tuuxa ni  cadi xheelaʼ runinani xquendaxheelaʼ, ne pur laani rusabixheelaʼ binni ne raca divorciar, ne nga nabé runinani ca xiiñicabe.

Pornografía ca jma runinani binni ora guzulú guʼyaʼ ni dede nahuiiniʼ. Brian guniʼruʼ: «Dxi napaʼ 10 iza, bidxelaʼ caadxi revista de idxa guidxa stiʼ bixhozeʼ dxi canaguiteʼ endarucachilú. Bizuluáʼ biiyaʼ ni nagaʼchiʼ neca qué gannaʼ xi pur riuuladxeʼ guuyaʼ ca dibuju que. Zaqué nga biniiseniáʼ ti costumbre ni bininá naa dede dxi biniiseʼ». Caadxi binni ni maʼ biindaʼ de tema riʼ nacaʼ zanda gucaa pornografía ca cani nahuiiniʼ gatanecaʼ tuuxa dede nahuiinicaʼ, chúʼnecaʼ gadxé gadxé binni, dede guiláxoocaʼ binni. Ne laaca riguuni laacaʼ triste ne ruquídxani xquendabiaanicaʼ.

NI NAQUIIÑEʼ GÁNNANU: Pornografía ca reedaneni yuubaʼ ne rucaani cani ruuyaʼ ni gusaana de gannaxhii ca xhamigu ne binnilidxi (Proverbios 6:27).

NI RUSIIDIʼ BIBLIA: «Nga runi, lagaxha irá ni zeeda de guidxilayú ri ndaani ladxidóʼ to. Nin tobi de laatu cadi chuʼ né ni cadi xheelaʼ, nin guni gasti ni nadxabaʼ. Cadi chi nanda tu ni na ique tu, nin uluiʼlaʼdxi tu guni tu ni cadi jneza. Ne cadi nisi bidxichi ma cá ique tu gapa tu, purti ra guni tu zacá la? ma nga nga ni cusisaca tu, ne cadi Dios» (Colosenses 3:5).

Ni nani nga rixhacalaʼdxiʼ Jiobá c pornografía. Peru cadi purtiʼ si riníʼ íquebe malu nga gatané binni tuuxa. Laabe bizaʼbe laanu para gatanenu sti binni, ne ni racaláʼdxibe nga cani maʼ bichaganáʼ si guiéchecaʼ ora gatanecaʼ xheelacaʼ, chuʼcaʼ tobi si ne guiéchecaʼ ora gápacaʼ xiiñicaʼ (Santiago 1:17).

Yanna, xiñee zanda guininu qué riuulaʼdxiʼ Jiobá pornografía yaʼ. Guidúʼyanu chupa chonna razón.

• Jiobá nanna zunitilú pornografía ca xquendanabani binni (Efesios 4:17-19).

• Laabe nadxiibe laanu ne qué racaláʼdxibe guniná xiixa laanu (Isaías 48:17, 18).

• Racaláʼdxibe gápabe ca guendaxheelaʼ ne ca familia ca (Mateo 19:4-6).

• Racaláʼdxibe guibáninu modo riuuláʼdxibe ne guni respetarnu derechu ni napa xcaadxi binni (1 Tesalonicenses 4:3-6).

• Racaláʼdxibe iquiiñenu ra nácanu hombre o ra nácanu gunaa modo gudíxhebe iquiiñenu cani (Hebreos 13:4).

• Laabe nánnabe rucaa pornografía ca binni guni puru si ni riuulaʼdxiʼ, laaca rucaani binni gatané tuuxa casi na Binidxabaʼ ne cadi casi na Jiobá (Génesis 6:2; Judas 6, 7).

NI NAQUIIÑEʼ GÁNNANU: Pornografía ca ruxheleʼ ni binni de Dios (Romanos 1:24).

Peru riaʼ Jiobá ca binni ni racalaʼdxiʼ gusaana viciu ca. Biblia na: «Jiobá nga ti Dios ni rilaselaʼdxiʼ ne nachaʼhuiʼ, rindaa para guidxiichi ne napa stálepeʼ guendarannaxhii ni qué rusaana. Purtiʼ nanna dxíchibe ximodo guyanu, ne rietenaláʼdxibe de yú laanu» (Salmo 103:8, 14). Ni rinabaʼ Dios ca binni ni qué rudxiibaʼ laca laa nga guidxíñacaʼ laabe «purti nachaʼhui be, riá be laanu, ne zacá zacané be laanu ora caquiʼñe nu tu acané laanu» (Hebreos 4:16; biiyaʼ cuadru ni láʼ  «Ximodo zanda gusaana binni pornografía»).

Guizáʼ maʼ stale binni bidii lugar gacané Dios laa. Yanna, ñee dxandíʼ huayacanebe binni la? Guidúʼyanu xi rusiidiʼ Biblia de caadxi binni ni gunda bisaana viciu ni runiná binni, laani nani: «Ma bia ladxidóʼ to ne ma ulee chu Dios laatu, ne ma bixá stonda tu pur Señor Jesús ne pur Espíritu sti Dios stinu» (1 Corintios 6:11). Ne zanda guiníʼ ca binni ca casi guníʼ apóstol Pablu: «Guiráʼ cosa zanda guneʼ purtiʼ cudii Dios poder naa» (Filipenses 4:13, TNM).

Susan, ti baʼdudxaapaʼ ni bisaana viciu de pornografía, guníʼ: «Jiobá si nga zanda gacané binni gusaana viciu ca. Pa guinábanu laabe gacanebe laanu ne gudiʼnu lugar gábibe laanu xi gúninu la? ziá xquendanabáninu ne ziuʼnu galán né laabe. Qué ziuu dxi gusaana Dios laanu».