Ne chupa chonna si diidxaʼ cusiene Génesis, primé libru stiʼ Biblia ximodo bizulú guiráʼ ni nuu guibáʼ ne lu Guidxilayú: «Primé que Dios bizáʼ guibáʼ ne guidxilayú» (Génesis 1:1). Despué de bizáʼ Dios ca yaga ne ca maniʼ, bizaʼbe Adán ne Eva, ca primé binni guyuu lu Guidxilayú. Gadxé modo guyáʼ ca maniʼ ca ne gadxé modo guyáʼ binni, purtiʼ bidii Dios laacabe guenda casi cani napa ne bidii lugar laacabe cuícabe xi gúnicabe. Ngue runi, gupa xidé bidxiilúcabe guiráʼ ni guleendúcabe pur cani bíʼnicabe. Pa nuzuubacabe stiidxaʼ Dios ni bizáʼ laacabe la? qué ñuu dxi ñaca huarácabe, ñóʼxhocabe, ñáticabe ne nin ca xiiñicabe, ne ñuunécabe laacaʼ tobi si casi maca gudixhe Dios nibánicabe.

Peru guyuu ti ángel biquiiñeʼ binni para guni ni racalaʼdxiʼ. Zaqué nga beeda gácabe Binidxabaʼ, «tobi ni rucaalú». Laabe biquiiñebe ti beendaʼ para gudxítebe ique Eva. Gúdxibe laa jma galán zabani pa guni ni na lugar de guni ni na Dios. Adán ne Eva bíʼnicaʼ ni na Binidxabaʼ ne zaqué nga bisihuínnicabe maʼ qué racaláʼdxicabe guni mandar Dios laacabe. Pur ni gudixhe ique Adán ne Eva guni maʼ qué ñanda nibánicaʼ sin qué ñuu dxi ñáticaʼ ne pur laacabe nácanu binni gulené donda ne ni rati.

Nagueendaca guníʼ Dios ximodo zabee ni bisaanané Adán ne Eva binni ne ximodo zanda guibánicaʼ sin qué chuʼ dxi gáticaʼ. Dios guníʼ zaquiiñeʼ ti binni «ni za» de ti gunaa para gunitilú Binidxabaʼ ne zabee guiráʼ yuubaʼ cayuniná binni pur ni biʼniʼ Adán ne Eva (Génesis 3:15). Tuu nga binni «ni za de gunaa» que yaʼ. Chaahuidugá zahuinni tu laabe.

Peru dede dxiqué huayuni Binidxabaʼ stale cosa para cadi gaca ni naguixhe ique Dios guni ne nagueendaca bidale binni ruchee ne ni runi cosa malu. Ngue runi, gudixhe ique Dios gunitilú guiráʼ binni malu né ti nisaguié naroʼbaʼ. Laabe gúdxibe Noé, ti hombre ni qué nusaana de ñuni ni nabe, guni ti arca —ti caja naroʼbaʼ ni cadi guiaaziʼ ndaaniʼ nisa— para ganda guilá laa ne binnilidxi, ne zaqueca guilá ca maniʼ ni gudxi Dios laabe uguube ndaaniʼ ni.

Gudiʼdiʼ si ti iza de biaba Nisaguié naroʼbaʼ que, biree Noé ne binnilidxi de ndaaniʼ arca que ne biiyacaʼ maʼ biá Guidxilayú. Peru caʼruʼ guihuinni tuu ngue «ni za de gunaa» que.

(Biree ni lu Génesis capítulo 1 dede 11, Judas 6, 14 ne 15 ne Apocalipsis 12:9.)