Guleʼ ra granja ni gupa bixhozeʼ ne jñaaʼ ndaaniʼ ti guidxihuiiniʼ stiʼ Galicia, ni riaana ladu guiaʼ stiʼ España. Naa nga guidapa de lade xhono xiiñiʼ jñaaʼ ne bixhozeʼ. Nabé nayecheʼ bibánidu. Ca tiempu que cadi guendaridxagayaa nga cheʼ xiiñiʼ binni seminariu o conventu. Lade ca binnilidxeʼ, chonna de laadu guyuudu seminariu.

Dxi napaʼ 13 iza guyaaʼ ti seminariu ni nuu Madrid, maca nuu tobi de ca bendaʼ raqué. Nabé feu lugar que purtiʼ nin tobi de cani nuu raqué qué rihuinni pa nuucaʼ nayecheʼ. Guirutiʼ xhamigu raqué, rinándacabe guiráʼ ni maca nexheʼ gaca, runi orárcabe ne qué gápacabe nin ti cosa risaca. Cásipeʼ guirá gueelaʼ ridagulisaadu ndaaniʼ ti capilla para guiníʼ íquedu, nécapeʼ naa qué randa runeʼ ni purtiʼ nagueendaca riníʼ iqueʼ sti cosa. Despué ridúʼndadu caadxi saa stícabe ne riuudu mixaʼ. Guirani raca lu diidxaʼ latín, stale de laacani qué lica rieneʼ ne runeʼ sentir zeʼ dxi jma zitu nuaaʼ de Dios. Cada dxi zidiʼdiʼ qué lica randa rinieniáʼ guirutiʼ. Dede ora guidxaagaluaʼ bendaʼ, qué randa rinieniáʼ laa, ni zanda si guinidu nga: «Ave María purísima». Rudiicabe laadu media hora para ganda güínedu tuuxa diidxaʼ despué de guidoʼdo. ¡Gadxepeʼ ngue de modo bibánidu ra lídxidu! Bineʼ sentir nuaaʼ stubeʼ ne guidubi dxi ruunaʼ.

Nécapeʼ qué ñuu dxi ñuneʼ sentir nuaaʼ gaxha de Dios, bineʼ guiráʼ ni rúnicabe para gacaʼ monja ne dxi napaʼ 17 iza gucaʼ monja. Bineʼ ni purtiʼ ngue nga ni cabézacabe de naa, peru qué nindaa gunabadiidxaʼ laca naa pa ngue nga ni dxandíʼ racalaʼdxeʼ guneʼ. ¡Ca monja que rábicaʼ laadu cadi galán diʼ guiníʼ íquedu pa biaʼsi ngue ni cayúnidu purtiʼ pacaa la? ziuudu ndaaniʼ infiernu! Neca gúdxicabe naa zaqué peru naa riníʼ íqueruaʼ pa biaʼsi ngue ni cayuneʼ que. Naa nannaʼ Jesús cadi naca diʼ ti binni ni riuulaʼdxiʼ chuʼ stubi, sínuque biquiiñebe tiempu stibe para bisiidibe binni ne gucanebe laacaʼ (Mateo 4:23-25). Dxi napaʼ 20 iza, guníʼ iqueʼ maʼ qué gáparuaʼ nin ti razón para gacaʼ monja. Guizáʼ bidxagayaaʼ ora gudxi madre superiora que naa, jma galán gusaanaʼ de gacaʼ monja pa cadi nuaaʼ seguru de ni cayuneʼ raqué, ngue runi bireeʼ de ndaaniʼ seminariu que. Riníʼ iqueʼ zándaca bidxíbicabe pa nicá modo riníʼ iqueʼ que xcaadxi monja nuu raqué.

 Bibiguétasiaʼ ra lidxeʼ, bixhozeʼ ne jñaaʼ biénecaʼ naa xi pur bineʼ zaqué, peru cumu gastiʼ dxiiñaʼ ndaaniʼ guidxihuiiniʼ que la? ngue runi yendezaʼ Alemania occidental, ra nabeza tobi de ca bizanaʼ. Laabe nuube lade ti grupu comunista de ca binni ni biree de España. Galán bineʼ sentir lade ca binni que purtiʼ rucaalucaʼ pur ca derechu ni napa ca binni ni runi dxiiñaʼ ne laaca ridíndecaʼ pur guisaca gunaa biaʼca risaca hombre. Gucaʼ comunista ne qué nindaa bichaganaʼyaʼ ti hombre ni nuu lu grupu que. Gudiizeʼ ca guiʼchiʼ stícabe ne rireʼdu lu calle para gucáʼludu ca derechu stidu. Bineʼ sentir risaca ni cayuneʼ que.

Peru ra zidiʼdiʼ dxi bireeʼ gana de ca cosa ni cayuneʼ que. Bineʼ sentir qué runi ca comunista que guiráʼ ni riniʼcaʼ. Ne jmaruʼ si guníʼ iqueʼ zaqué lu iza 1971, dxi bicaaguí caadxi hombrehuiiniʼ ne dxaapahuiiniʼ consulado español de Fráncfort para gucaalucaʼ pur guiráʼ cosa ni cadi jneza cayuni ca xaíque stiʼ guidxi España. Peru guníʼ iqueʼ cadi zaqué diʼ nga naquiiñeʼ gusihuínnicabe cadi cayuuláʼdxicabe ni cayuni ca binni que.

Dxi gule primé xiiñidu, gudxeʼ xheelaʼ maʼ qué zadagualisaaniáʼ grupu que. Bineʼ sentir nuaaʼ stubeʼ, purtiʼ nin tobi de ca xhamiguaʼ qué niganna naa ne baʼduhuiiniʼ stinneʼ. Rinabadiidxaʼ laca naa xi para nga nabani binni guidxilayú. Ñee dxandíʼ nga zabeenduáʼ xiixa ni galán pur gacaniáʼ binni la?

Lu iza 1976, bixhidxináʼ ti guendaxheelaʼ ni naca testigu stiʼ Jiobá ra puertaʼ lídxidu ne bisaananecaʼ naa caadxi guiʼchiʼ ni biree lu Biblia. Dxi bibiguétacabe ra lidxeʼ bineʼ laacabe stale guendarinabadiidxaʼ casi, xiñee ridiʼdiʼ binni stale yuubaʼ ne xiñee raca stale cosa ni cadi jneza. Nabé bidxagayaaʼ ora biiyaʼ biquiiñecabe Biblia para bicábicabe guiráʼ ca guendarinabadiidxaʼ bineʼ laacabe. Oraqueca gunabaʼ laacabe guʼndanécabe naa Biblia.

Dxi nacubi bizulú biindanécabe naa, ni gúpasiaʼ gana nga gannaʼ xi rusiidicabe, peru bichaa modo riníʼ iqueʼ dxi maʼ yeniáʼ xheelaʼ ca guendaridagulisaa stiʼ ca Testigu ndaaniʼ Yoo stiʼ Reinu. Ca dxi que maʼ nápadu chupa xiiñidu. Ca Testigu que gucanecaʼ laadu para ganda chuudu ra Yoo stiʼ Reinu ne laaca gucanecaʼ laadu para gápacaʼ ca xiiñidu ora maʼ cayaca guendaridagulisaa que. Nabé gunnaxhieeʼ laacabe.

Neca zaqué guyuuruʼ cosa ni bicaa naa guiníʼ iqueʼ pa dxandíʼ ni caziideʼ. Ti biaje yegannaʼ ca binnilidxeʼ España, ti stiuaʼ ni naca sacerdote, gucalaʼdxiʼ nucuudxi naa ti maʼ cadi ñuundané ca Testigu naa, peru caadxi Testigu de ndaaniʼ guidxi que nabé gucanecaʼ naa. Cásica biʼniʼ ca Testigu de Alemania zaqueca gucanécabe naa para guieneʼ cani zeeda lu Biblia. Gudixhe iqueʼ guʼndaneruʼ ca Testigu naa Biblia guibiguétasiaʼ xquidxeʼ. Nécapeʼ xheelaʼ maʼ qué niná ñuundaʼ peru naa qué nusaanaʼ de ñuneʼ ni. Lu iza 1978 guyuaanisaʼ ne gucaʼ testigu stiʼ Jiobá.

Ra bieneʼ cani rusiidiʼ Biblia gucané cani naa guibaneʼ nayecheʼ ne gudieeʼ cuenta nuu xiixa ni cabézanu gudii Dios laanu. Casi 1 Pedro 3:1-4 cudii conseju ca gunaa ni maʼ bichaganáʼ guni respetarcaʼ xheelacaʼ casi xaíque, gácacaʼ nachaʼhuiʼ né laacabe purtiʼ «nga nga enda sicarú ni risaca nezalú Dios». Conseju riʼ ne xcaadxi casi laani huayacané cani naa guneʼ xhiiñaʼ jneza casi ti gunaa ni maʼ bichaganáʼ ne zaqueca para gusiniiseʼ ca xiiñeʼ.

Maʼ treinta y cinco iza de nacaʼ testigu stiʼ Jiobá. Guizáʼ nayecheʼ runeʼ sentir cayuneʼ xhiiñaʼ Dios, ne purtiʼ nuaaʼ lade ti familia ni dxandíʼ riuulaʼdxiʼ guni ni na Dios ne de lade gaayuʼ xiiñeʼ, tapa de laacaʼ cayúnicaʼ ni na Dios, cásica cayuneʼ ni.