De Rmeich naa, ti guidxihuiiniʼ nuu ndaaniʼ guidxi Líbano gaxha de ra dxaagani guidxi Israel. Biniiseʼ ca dxi nabé gudinde ca binni que. Qué lica riaandaʼ naa ora ricaguí ca mina ni ruxhuuxhe xiixa parte de xcuerpu binni qué guzaabi gastiʼ. Nabé nagana modo bibánidu; guiráʼ ladu ridúʼyadu cucheené binni ley ne nuu stale guendaridinde.

Familia stinneʼ riecaʼ ti yuʼduʼ Maronita, tobi de ca yuʼduʼ católicu ni nuu neza Oriente. Nácadu 12 ndaaniʼ familia stidu, ngue runi bixhozeʼ runi dxiiñaʼ guiráʼ dxi para gudii ni iquiiñedu laga riné jñaaʼ laadu yuʼduʼ. Despué bidieeʼ cuenta cásica Iglesia zaqueca guiráʼ binni rudxiidéchecaʼ cani jma pobre.

Dxi maʼ biniiseʼ, nabé guyuuladxeʼ quiteʼ kung fu. Ne bineʼ entrenar stale. Despué biziideʼ gunenaʼyaʼ binni ne nayaʼ siaʼ ne ñeeʼ, ne biziideʼ iquiiñeʼ ca guiibaʼ riquiiñecabe lu artes marciales. Nécapeʼ qué zanda gucueezaʼ guerra, guníʼ iqueʼ neca ca binni runiná xcaadxi que gucueezaʼ. Ngue runi, cada biaje guuyaʼ cadinde chupa binni nagueendaca richuaaʼ lu guendaridinde que. Qué riníʼ iqueʼ ante guneʼ xiixa ne nagueenda ridxiicheʼ. Guidubi naca ladu gueteʼ stiʼ guidxi Líbano nabé bidxíbicabe naa, purtiʼ gudixheʼ iqueʼ gucueezaʼ cani qué runi ni jneza ne cani runiná sti binni.

Lu iza 1980, bicaaʼ laʼyaʼ lu ti grupu de kung fu ndaaniʼ guidxi Beirut. Nin ca bomba ni cusábacabe ndaaniʼ guidxi que guiráʼ dxi qué nucueeza diʼ naa de chiguneʼ entrenar. Ni runeʼ siaʼ ca dxi que nga gahuaʼ, gaseʼ ne guibaneʼ casi Bruce Lee, ti actor de Estados Unidos ni zá de familia chinu ne guca campeón de kung fu. Gudixheʼ guicha iqueʼ casi laabe, guzayaʼ casi guzabe ne dede runeʼ ca ridxi bíʼnibe ora maʼ cadindeʼ. Qué lica ruxidxeʼ dxiqué.

Nabé guníʼ iqueʼ ñaaʼ nitindeʼ China ra rié puru si ni nanna tinde kung fu que. Ti dxi laga cayuneʼ entrenar para chuaaʼ listu chaaʼ China. Bixhidxinácabe ra puertaʼ lidxeʼ. Nacuaʼ traje yaaseʼ de kung  fu stinneʼ ne nazeʼ nisa luna. Ora bixheleʼ puertaʼ que biiyaʼ ti xhamiguaʼ ne chupa testigu stiʼ Jiobá. Zécabe para guiniʼnécabe naa de Biblia, peru gudxeʼ laacabe qué lica gannaʼ gastiʼ de ngue. Qué lica niníʼ iqueʼ pa raqué nuchaa xquendanabaneʼ dede yanna.

Ca Testigu que biluíʼ ca naa ne Biblia nin ti hombre qué zanda cuee guendaridinde ne cani qué runi ni jneza. Bisiénecabe naa Binidxabaʼ nga napa donda pur guiráʼ guendanagana ni nuu (Apocalipsis 12:12). Nabé bidxagayaa modo rusihuínnicabe nuudxícabe ne modo nuucabe seguru de cani caníʼcabe que. Laaca biniibi ladxiduáʼ ora gunnaʼ napa Dios lá (Salmo 83:18). Laaca biindanécabe naa 1 Timoteo 4:8 ra na: «Caadxi si racané ejerciciu cuerpu stinu para gapa stipa, peru ni zacané pe laanu la? nga uyubi nu sa nu gaxha de Dios, purti nga zaquiiñe laanu lu enda nabani ni napa nú yanna riʼ ne ni gueeda ruʼ». Bicaa ca diidxaʼ que naa guchaaʼ modo nabaneʼ.

Nabé guyuaaʼ triste dxi maʼ qué ñannaʼ gastiʼ de ca Testigu, purtiʼ binnilidxeʼ gudxi laacabe maʼ cadi guibiguétacabe. Neca zaqué gudixheʼ iqueʼ gusaanaʼ kung fu que ne bizuluáʼ biindaʼ Biblia. Qué ñuulaʼdxiʼ ca bicheʼ ni bineʼ que, peru naa gudixheʼ iqueʼ guyubeʼ ca Testigu para gusiidicaʼ naa jma.

Guiráʼ ladu biyubeʼ laacabe peru qué nidxelaʼ laacabe. Ca dxi que málasi guti bixhozeʼ ne bizaacaʼ ca binnilidxeʼ xcaadxi desgracia. Guiráʼ ngue bicaa naa gacaʼ deprimir stale. Bineʼ dxiiñaʼ ndaaniʼ ti empresa ni rucuí yoo, ti dxi tobi de ca xcompañeruaʼ láʼ Adel, gunabadiidxaʼ naa xiñee nabé nuaaʼ triste. Óraque guníʼnebe naa de esperanza ni zeeda ndaaniʼ Biblia de dxi guindisaʼ Dios binni de lade gueʼtuʼ. Ti huaʼ Testigu Adel. Gáʼ beeu bisiidibe naa de Biblia. Nabé nachaʼhuiʼ gúcabe ne gúpabe paciencia naa.

Ra jma ziziideʼ que bidieeʼ cuenta naquiiñeʼ guchaaʼ modo nabaneʼ... ne gúcani nagana para naa. Nabé nagueenda ridxiicheʼ, peru Biblia bisiidiʼ naa gucueezaʼ naa ne guiníʼ iqueʼ ante guneʼ xiixa. Casi lu Mateo 5:44 bidii Jesús conseju riʼ: «Laganaxhii cani nanalaʼdxi laatu, ne lainíʼ né Dios pur cani riguu dí laatu». Ne lu Romanos 12:19 na: «Cadi uquixe tu ni guni cabe laatu, sínuque lausaana ni lu ná [Jiobá], purti cá ni lu Xquiʼchi be ra na be: Xcuenta nuu ni, ne naa uquixe ni laacabe». Ca textu riʼ ne xcaadxi versículo gucanécani naa gacaʼ ti binni nadóʼ.

Nécapeʼ primeru qué niná binnilidxeʼ ñuundané ca Testigu naa, yanna maʼ runi respetarcaʼ laacabe. Dede né ti bicheʼ guca testigu stiʼ Jiobá ne jñaaʼ bisihuinni jneza cani runi credu dede dxi gutiʼ.

Maʼ guluu Jiobá ndaayaʼ naa ne ti xheelaʼ ni nabé sicarú ne nadxii naa láʼ Anita. Guirópadu riquiiñedu stale de tiempu stidu para gusíʼdidu binni de Dios. Dede lu iza 2000 que nabézadu Eskilstuna (Suecia), racá rusíʼdidu binni de Dios lu diidxaʼ árabe.

Qué randa rusaanaʼ de guiníʼ iqueʼ de ca binni ni cayuninácabe laacaʼ. Peru ratadxí ladxiduáʼ ne riecheʼ guieneʼ xiñee nuu stale yuubaʼ ne gannaʼ mayaca cuee Dios cani (Salmo 37:29).