Ñee gupa David razón para guiníʼ ique qué zusaana Jiobá laa o zazaláʼdxibe laa la? Ñee rizaalaʼdxiʼ Dios lii la? Stale binni raca nagana para laacaʼ guni crecaʼ rizaalaʼdxiʼ Dios ni jma napa poder laaca. Xiñee yaʼ.

Tobi de ca razón stícabe nga nácabe jma risaca Dios que binni. Risácabe stale nga runi para laabe «ca guidxi ca zeeda gácacaʼ casi ti gota [nisa] ndaaniʼ ti cubeta; casi ti capa yu dé nexheʼ lu balanza» (Isaías 40:15). Ti hombre rucaa libru ne qué runi cré Dios dede guníʼ: «Ti binni ni jma rudxiibaʼ laca laa nga ni runi cré nuu ti Dios ni rizaalaʼdxiʼ ganna xi cayúninu».

Ne nuu tu laa, runi cré qué runi merecer gacané Dios laa pur ca cosa malu ni runi. Casi ti hombre láʼ Jim guníʼ: «Guiráʼ ora maʼ canieniáʼ Dios gacané naa gucueezaʼ naa, peru qué rindaa runi ganar xiana que naa. Dede guníʼ iqueʼ guizáʼ malu naa de nin Dios qué zanda gacané naa».

Ñee zítupeʼ nuu Dios de laanu de nin rudii cuenta pa nuunu raríʼ la? Xi runi sentirbe pur ca binni gulené donda yaʼ. Zanda gacané Dios laanu guicábinu ca guendarinabadiidxaʼ riʼ. Lu Biblia, Stiidxabe ca, rábibe laanu cadi zitu nuube ne rizaaláʼdxibe laanu. Hechos 17:27 na: «Gaxha doʼ nuu [Dios] de cada tobi de laanu». Lu stapa tema zeeda ca zadúʼyanu xi rusiidiʼ Biblia de tema riʼ ne ximodo rusihuinni Dios rizaalaʼdxiʼ binni, dede ne lii.