Maʼ raca jma de chonna mil iza, bicaa ti poeta ca diidxaʼ riʼ: «Zaguaa naróʼ stiluʼ purtiʼ ridxagayaa modo bizaʼluʼ naa dede ruchíbini naa» (Salmo 139:14). Ne dxandíʼ ni guniʼbe ca: purtiʼ guidúʼyasinu modo riaa ti baʼduhuiiniʼ de ti célula rucaani laanu guidxagayaanu ni, cadi dxandíʼ la? Stale binni riníʼ ique nuu tu bizáʼ guiráʼ ni nabani. (Biindaʼ Salmo 139:13-17 ne Hebreos 3:4.)

Laaca ni bizáʼ guibáʼ ca bizáʼ guidxilayú ne guiráʼ ni nabani nuu ndaaniʼ ni. (Salmo 36:9). Maʼ guníʼnebe ca binni guidxilayú para gunibiaʼcaʼ laabe. (Biindaʼ Isaías 45:18.)

Stale modo ruluíʼ tobi si cuerpu stiʼ binni ne stiʼ ca maniʼ ca. Peru zácani purtiʼ cásica laanu ne ca maniʼ ca guyanu para guibáninu lu Guidxilayú riʼ ne tobi si tu bizáʼ laanu. Ne laabe cadi de ti maniʼ nga bizaʼbe laanu, sínuque de yú. (Biindaʼ Génesis 1:24 ne 2:7.)

Nuu chupa cosa ni runi laanu gadxé de ca maniʼ ca. Primé la? zanda gunibiaʼnu, gannaxhiinu ne guni respetarnu ni bizáʼ laanu. Guiropa la? laanu guyanu para guibáninu sin qué chuu dxi gátinu, peru ca maniʼ ca coʼ. Rátinu yanna purtiʼ primé hombre guyuu qué niná ñuni mandar Dios laa. (Biindaʼ Génesis 1:27 ne 2:15-17.)