Maʼ xadxí nga riníʼ ique binni pabiáʼ galán nibani pa qué ñoʼxhoʼ ne pa qué ñati. Triste guininu ni, peru ridxiña dxi rátinu. Maʼ raca jma de chonna mil iza nga guníʼ Job ca diidxaʼ zeeda ra ruzulú tema riʼ ne dede yanna ridúʼyanu dxandíʼ cani.

Guiráʼ binni riuulaʼdxiʼ guibani sin gatiʼ. Biblia na guluu Dios gustu riʼ ndaaniʼ ladxidoʼno, nga runi rizaaláʼdxinu guiénenu ximodo nga guendanabani stiʼ tuuxa ni qué rati (Eclesiastés 3:11). Yanna, ñee raʼbuʼ jneza nga uguu Dios xiixa ni riuuláʼdxinu ndaaniʼ ladxidoʼno pa nánnabe qué zanda gaca ni la? Coʼ, njaʼ. Stiidxaʼ Dios na zeeda gaca guendaguti casi ti enemigu stinu ne laaca riniʼni zadxiña dxi zunitilú Dios ni (1 Corintios 15:26).

Guiranu nánnanu zeeda gaca guendaguti ti enemigu stinu. Ne laaca nánnanu qué riuulaʼdxiʼ binni gatiʼ. Cadi dxandíʼ nagueenda riree guxooñenu de ti lugar pa gudiʼnu cuenta nuu xiixa ni zándaca guniná laanu raqué la? Ne ora raca huaranu, ruyúbinu ti doctor guʼyaʼ laanu. Rúninu intiica si para guixélenu de ca cosa ni zándaca gueeda guuti laanu.

Ñee zadxiña dxi guinitilú enemigu ni cayuuti binni maʼ raca stale iza riʼ la? Zadxiña pue. Cadi bizáʼ diʼ Jiobá laanu para guibáninu chupa chonna iza si. Qué lica niníʼ íquebe pa ñuu guendaguti. Laabe gudixhe íquebe guibáninu sin gátinu ndaaniʼ Guidxilayú riʼ, ne rúnibe guiráʼ ni riniʼbe (Isaías 55:11).

Peru, ximódopeʼ nga chigunduuxeʼ Dios guendaguti yaʼ. Maʼ xadxí nga de cayuni binni stale cosa para cuee guendaguti, peru qué ganda diʼ cueecabe ni. Ne dede yanna cuyúbiruʼ binni xi zanda guni. Maʼ biʼniʼ ca científicu stale medicina ne vacunu ni rusianda caadxi guendahuará. Ne laaca cayuni estudiárcabe genética stiʼ binni. Pa guchaaganu biaʼ bibani binni raca ti gayuaa iza, zudiʼnu cuenta jma stale iza ribani binni yanna. Peru dede nagasi qué ganda diʼ chuʼ tu cuee guendaguti. Casi na Biblia, «raca guirácabe yu sti biaje» (Eclesiastés 3:20).

Peru nuu caadxi diidxaʼ ni rusiecheʼ laanu: cadi caquiiñeʼ diʼ cuézanu guidxela binni guidxilayú modo gaca chaahuiʼ ni. Maʼ biʼniʼ Jiobá ti cosa nabé risaca para cuee laanu lu náʼ guendaguti, ne caquiiñebe Jesucristu para ganda gúnibe ni.