Yanna riʼ caree stale libru ni racalaʼdxiʼ gusihuinni jneza modo riníʼ ique caadxi binni nuu lu ti grupu ni runibiáʼcabe casi Nuevo Ateísmo. Cumu riuulaʼdxiʼ stale binni guʼndaʼ ca libru riʼ la? stale biaje rucaani laacaʼ guni debatircaʼ pur laani. Guidúʼyanu xi bicaa ti neurólogo láʼ David Eagleman ora bizeeteʼ de laacani: «Caadxi de ca binni ruundaʼ ca libru riʼ riníʼ íquecaʼ maʼ nanna ca científicu guiráʼ cosa». Peru laca laabe cusiénebe: «Científicu ni nachaʼhuiʼ la? riuulaʼdxiʼ guiziidiʼ stale cosa, ne lu historia stiʼ ciencia ridúʼndanu ximodo huadxela ca binni riʼ stale cosa ni rucaa laacaʼ guidxagayaacaʼ».

Lu ca siglu ni maʼ gudiʼdiʼ hasta nagasi, huayuu stale hombre ne gunaa ni nabé nuu xpiaaniʼ ni huadxela stale cosa risaca, ne rúnicabe ni purtiʼ racaláʼdxicabe gánnacabe ca cosa nagana ni qué ganda gusiene ciencia. Peru nuu tiru laaca rucheecabe. Guzéʼtenu ti ejemplu. Isaac Newton nga tobi de ca científicu ni jma runibiáʼ binni laa, ne bisihuinni hombre riʼ nuu ti stipa ni láʼ gravedad ni rucueeza ca planeta, ca beleguí ne ca galaxia ni nuu lu universo. Laaca biʼniʼ inventarbe ni runibiaʼnu casi cálculo, nuu ndiʼ lade matemática ne nabé riquiiñeni lu ca programa stiʼ computadora, para gaca viaje lu espaciu ne laaca riquiiñeni lu física nuclear. Peru laaca biʼniʼ cré Newton lu ni rábicabe alquimia, laani nga ti ciencia ni cadi dxandíʼ (pseudociencia). Guniʼbe zanda iquiiñeʼ ciencia riʼ para gaca plomo, o guiibaʼ oro pa iquiiñecaʼ magia ne astrología.

Jma de 1,500 iza ante gale Newton, guyuu ti astrónomo de Grecia láʼ Tolomeo. Pur cani biʼyaʼ si hombre riʼ gunda bidxela ximodo rudii ca planeta buelta ne beeda gácabe ti binni nanna guni mapa stiʼ Guidxilayú (cartógrafo). Peru laaca biʼniʼ crebe nuu Guidxilayú riʼ galaa galaa universo. Yanna guidúʼyanu xi guníʼ astrofísico Carl Sagan de Tolomeo: «Biʼniʼ cré binni nuu Guidxilayú riʼ galaa galaa universo 1,500 iza, ndiʼ rusietenalaʼdxiʼ laanu ti cosa: neca guizáʼ nuu xpiaaniʼ caadxi binni, rudiʼnu cuenta laaca rucheecabe ora gacaláʼdxicabe gusiénecabe xiixa ni nagana».

Dede nagasi cadxaagalú ca científicu guendanagana casi cani maʼ bizéʼtenu. Dxandíʼ maʼ biʼniʼ ciencia stale cosa galán pur binni, peru laaca nuu ni qué ganda gúnini. Ñee zadxiña dxi gunibiáʼ chaahuinu ne guiénenu guiráʼ ni nuu lu universo stinu riʼ la? Ti físico láʼ Paul Davies guníʼ qué zanda diʼ gacané ciencia laanu gánnanu ne guiénenu guiráʼ ni racaláʼdxinu. Ca diidxaʼ riʼ rusihuínnicani xiixa nabé risaca: qué ziuu dxi guiene chaahuinu guiráʼ ni nuu lu Guidxilayú. Nga runi, ora guiníʼ tuuxa zadxiña dxi guidxela ciencia modo guicabi guiráʼ ni racalaʼdxiʼ binni ganna la? cadi nagueendaca guni crenu laa.

Sicaríʼ caníʼ Biblia de guiráʼ cosa sicarú ni maʼ bizáʼ Dios: «Ndiʼ nga ruaa ca neza stibe, ¡ne ti cosa huiiniʼ si nga ni huayunadiáganu de laabe!» (Job 26:14). Nuuruʼ stale cosa ra maʼ qué rugaanda xquendabiaaninu guiene. Raca biaʼ chupa mil iza guníʼ apóstol Pablu sicaríʼ: «Nabé riene Dios, iruti ru nuu xpiaani biaʼ nuu xpiaani be, ne iruti ru riene biaʼ riene be. Qué zanda di ganna nu xi na xquenda biaani be nin guiene nu xi cayuni be» (Romanos 11:33). Cadi dxandíʼ dede nagasi ridúʼyanu dxandíʼ ni guníʼ Pablu la?