TEMA STIʼ PORTADA | TUU NGA CA TESTIGU STIʼ JIOBÁ
Xi rúnicabe
Nexheʼ chaahuiʼ dxiiñaʼ rúnidu lu guidubi Guidxilayú, ne qué ridáʼgudu xcaadxi religión. Estados Unidos nga nuu oficina central stidu, ca testigu stiʼ Jiobá, peru stale de laadu nabézadu ndaaniʼ gadxé gadxé guidxi. Nácadu jma de xhono millón de binni lu guidubi Guidxilayú, ne rusíʼdidu binni de Biblia lu jma de 230 guidxi roʼ ne territorio. Zacá rúnidu ni na ca diidxaʼ guníʼ Jesucristu riʼ: «Zuiʼ cabe stiidxa Dios de idubi naca guidxilayú para ganna irá xixé guidxi modo runi mandar» (Mateo 24:14).
Ra tiica nabézadu, runi respetardu ne rúnidu ni na ca ley stiʼ guidxi ra nuudu, peru qué riuʼdu lu política. Zacá rúnidu ni na mandatu bidii Jesús ca xpinni riʼ: «Cadi de guidxilayú riʼ laatu». Nga runi, qué riuʼdu lu política ne qué riuudu lu guerra (Juan 15:19, TNM; 17:16). Pur nga, dxi guca Segunda Guerra Mundial biseguyoocabe, bininácabe, ne biiticabe stale testigu stiʼ Jiobá. Ti hombre de Alemania ni guca obispo bicaa: «Laasicabe nga grupu ni zanda guiníʼ qué ñuu pur Tercer Reich, ne qué ñúnicabe ni pur cani maʼ biziidicabe».
«[Ca testigu stiʼ Jiobá] rúnicaʼ stipa para gúnicaʼ ni jneza. Ñanda niguʼdu ti binni casi laacabe lu política, tobi ni riuulaʼdxiʼ gacané binni, peru qué ziuu dxi gúnidu nga. [...] Nánnacabe gobiernu nga runi mandar, peru para laacabe la? Reinu si stiʼ Dios nga zanda guni chaahuiʼ guiráʼ guendanagana stiʼ binni.» (Ni bizeeteʼ periódicu Nová Svoboda, República Checa)
Peru qué riníʼ diʼ nga qué ridxaagadu binni. Sicaríʼ biʼniʼ orar Jesús Dios pur ca discípulo stiʼ: «Cadi canaba lii gaxhu laacabe de ndaani guidxilayú» (Juan 17:15). Nga runi, rúnidu dxiiñaʼ, risidu ne riuudu scuela cásica ca vecinu stidu.
Laaca zándaca ziuuláʼdxiluʼ ca ndiʼ
CANI NABÉ RINABADIIDXAʼ BINNI
Xiñee qué riuu ca testigu stiʼ Jehová lu política
Ñee nuu razón para guidxibi binni laadu purtiʼ si qué riuʼdu lu política la?
