Guleʼ Acul, ti guidxihuiiniʼ nuu lade dani stiʼ guidxi Guatemala. Zá binnilidxeʼ de ca Ixil, ti grupu indígena ni zá de ca maya. Riniéʼ diidxastiá ne laaca biziideʼ guiniéʼ stiidxadu. Biniiseʼ tiempu ra nabé gudinde binni xquidxeʼ, ni bindaa treinta y seis iza. Lu guerra que guti stale binni Ixil.

Dxi napaʼ tapa iza, bicheʼ ni napa gadxe iza caguite ti granada ne ni málasi gucadé ni. Pur ngue biaanaʼ ciegu, peru bicheʼ guti. Dede dxiqué biniiseʼ ti lugar ra nabeza puru binni nacheepaʼ lú ni nuu ndaaniʼ guidxi Guatemala ne raqué biziideʼ guundaʼ braille. Qué ñuu dxi ñannaʼ xiñee qué riná ca binni que guinieniáʼ xcaadxi xcuidi nuu raqué o xiñee qué riná ca xcompañeruaʼ guieegucaʼ naa. Cumu stubeʼ luchaʼ maʼ nuaaʼ la? dede riecheʼ ora guedandá dxi chigannaʼ jñaaʼ ni nadxii naa, ne riuaaniáʼ laa chupa beeu. Peru dxi napaʼ 10 iza beeda gati jñaaʼ. Nabé bininá ngue naa, purtiʼ biniteʼ binni ni jma nadxii naa.

Dxi napaʼ 11 iza, bibiguetaʼ xquidxeʼ ne yendezaʼ ra lidxi ti bicheʼ. Bidiicabe guiráʼ ni iquiiñeʼ, peru guirutiʼ niguixhedxí ladxiduáʼ. Nuu biaje rucaaʼ ridxi Dios: «Xiñee guti jñaaʼ. Xiñee biaanaʼ ciegu». Nuu binni gudxi naa maʼ nga nga na Dios guizaacaʼ. Nga runi, guníʼ iqueʼ naguidxi ladxidóʼ Dios ne qué runi ni jneza. Pa ñaca ñanda la? maʼ biiteʼ laca naa.

Ra bicheepaʼ luaʼ stale tu bininá naa né golpe dede né diidxaʼ. Stale biaje gulaxoocabe naa dxi nahuiineʼ. Cumu guníʼ iqueʼ guirutiʼ zazaalaʼdxiʼ naa la? qué ñuu dxi niniéʼ guiráʼ ni bíʼnicabe naa. Qué riníʼnepeʼ binni naa. Ngue runi, nabé gucaʼ deprimir ne qué riuuladxeʼ chuaaʼ ra nuu binni, purtiʼ qué gapaʼ confianza guirutiʼ.

Dxi napaʼ 13 iza, guniʼné ti guendaxheelaʼ testigu stiʼ Jiobá naa ra scuela ora bireeʼ recreu. Ti maestra ni riaʼ naa nga gunabaʼ laacabe chigánnacabe naa. Gúdxicabe naa ruzeeteʼ Biblia zuuyaʼ cani qué ruuyaʼ sti biaje ne zabani cani maʼ guti (Isaías 35:5;  Juan 5:28, 29). Nabé riuuladxeʼ gucaadiaʼgaʼ laacabe, peru cumu cadi biaaʼ güeʼ diidxaʼ la? huaxiéʼ riniéʼ. Neca zaqué, qué nireecabe gana ne bisihuínnicabe nadxiicabe naa, qué nusaana de nigánnacabe ne de nusiidicabe naa cani zeeda lu Biblia. Rizácabe 10 kilómetru lade dani para chindácabe guidxihuiiniʼ ra nabezaʼ.

Ora gudxi bicheʼ naa ximodo laacabe, gúdxibe naa pobre ca binni que, peru zuchaahuicaʼ. Rihuínnica nadxiicabe naa, purtiʼ dede rusigáʼdecabe naa xiixa. Raqué bidieeʼ cuenta cani dxandíʼ si xpinni Cristu nga zuni guiráʼ ni cayúnicabe que.

Bineʼ estudiar Biblia né publicación ni nuu lu braille. Rieneʼ cani caziideʼ que, peru guca nagana para naa guneʼ cré caadxi de laacani. Tobi de laacani nga guneʼ cré rizaalaʼdxiʼ Dios naa ne rizaalaʼdxiʼ xcaadxi binni naa. Bieneʼ xiñee cudiibe lugar guizaaca cosa malu, peru guca nagana para naa guuyaʼ laabe casi ti binni nadxii xiiñiʼ. *

Chaahuiʼ chaahuiʼ bichaa modo riníʼ iqueʼ ra biziideʼ ni rusiidiʼ Biblia. Yanna maʼ nannaʼ riuubaʼ ladxidóʼ Dios guʼyaʼ cayacananu. Sicaríʼ riniʼbe ora guninácabe ca xpínnibe: «Maʼ biiyaʼ pabiáʼ naná ni cadiʼdiʼ xquidxeʼ [...;] nannaʼ dxicheʼ xi guendananá cadíʼdicabe» (Éxodo 3:7). Ora bidieeʼ cuenta pabiáʼ nadxii Jiobá naa, gudixheʼ iqueʼ gudieeʼ xquendanabaneʼ laabe para guneʼ ni nabe. Lu iza 1998 guyuaanisaʼ ne gucaʼ ti testigu stiʼ Jiobá.

Biaʼ ti iza de guyuaanisaʼ, guyaaʼ ti cursu para binni ciegu ndaaniʼ guidxi Escuintla. Tobi de cani ruuyaʼ gaca dxiiñaʼ ndaaniʼ ti congregación nuu guidxi que gunna pabiáʼ nagana raca para naa chaaʼ reunión guidxi Acul, purtiʼ napaʼ xidé tiideʼ lade dani ra gudiʼdiʼ guendaxheelaʼ Testigu ni yeguundané naa que. Para gacané hermanu que naa la? biyúbibe ti familia Testigu ni ganda guiaanaʼ ra lidxi ne gacané naa para chaaʼ ca reunión que. Dede yanna rápacabe naa casi ñacaʼ xiiñicabe.

Ñanda ñueniaruaʼ laatu xiruʼ huayuni ca hermanu para gusihuínnicaʼ pabiáʼ nadxiicaʼ naa. Nannaʼ dxicheʼ ca testigu stiʼ Jiobá nga cani dxandíʼ xpinni Cristu (Juan 13:34, 35).

Yanna huaxa maʼ nannaʼ risaca xquendanabaneʼ ne zanda guneʼ xiixa ni gusiecheʼ naa. Lugar de guiníʼ iqueʼ modo nuaaʼ riʼ, riquiiñeʼ tiempu stinneʼ para gacaniáʼ xcaadxi binni gánnacaʼ xi rusiidiʼ Biblia. Nacaʼ tobi de ca binni ni ruuyaʼ modo gaca dxiiñaʼ ndaaniʼ congregación ne laaca rigudieeʼ libana ndaaniʼ ca congregación ni nuu gaxha. Laaca riuaaʼ nayecheʼ pur rudieeʼ libana lu asamblea ra ridagulisaa mil de binni.

Lu iza 2010 gucaʼ graduar lu Scuela ra Riziidicabe Gúnicabe Xhiiñaʼ Dios (yanna lani Scuela para cani rucheeche stiidxaʼ Reinu) guidxi El Salvador. Pur cani biziideʼ lu scuela riʼ randa racaniáʼ ca xpinni Cristu jma jneza. Ne laaca gucané ni naa guneʼ sentir rusisaca Jiobá naa ne nadxii naa, ne zanda iquiiñebe tutiica si binni gacaláʼdxibe para guni xhiiñabe.

Jesucristu guníʼ: «Jma nayeche ni rudii que ni ricaa» (Hechos 20:35). Yanna huaxa maʼ nuaaʼ nayecheʼ, ne runeʼ sentir maʼ randa racaniáʼ binni neca qué ñuu dxi niníʼ iqueʼ pa ñuneʼ ni.