Stale binni riníʼ ique runítisicaʼ tiempu ora runi orarcaʼ, purtiʼ guirutiʼ rucaadiaga laacaʼ. Xcaadxi runi orar peru runi sentircaʼ qué ricábicabe oración sticaʼ. Ti hombre ni qué runi cré Dios guníʼ ique ximodo laabe ne óraque biʼniʼ orar: «Neca xiixa gudxi naa». Peru laabe guniʼbe casi ñaca «niniʼneuʼ gueʼtuʼ» nga guiniʼneuʼ Dios.

Peru Biblia cayabi laanu rucaadiaga Dios ca oración stinu. Lu Stiidxabe zeeda caadxi diidxaʼ gúdxibe ti guidxi guyuu dxiqué: «Zia [Dios] lii ora gucaaluʼ ridxi laa; cásipeʼ gunadiágabe lii zacábibe lii» (Isaías 30:19, El libro del Pueblo de Dios). Sti versículo ná sicaríʼ: «Nabé riuuláʼdxibe gucaadiágabe oración stiʼ cani runi ni jneza» (Proverbios 15:8).

Lu Biblia laaca zeeda caadxi oración ni bicabi Dios. Ti textu na gunabaʼ Jesús «lu Dios nulá laa de enda guti [...]. Bicaa diaga Dios laabe» ra gundisaʼ laabe de lade gueʼtuʼ (Hebreos 5:7). Zadxélanu xcaadxi ejemplu lu Daniel 9:20, 21 ne 2 Crónicas 7:1.

Yanna, xiñee nuu binni riníʼ guirutiʼ rucaadiaga oración stiʼ yaʼ. Pa racaláʼdxinu guicabi Jiobá, * Dios ni cuzeeteʼ Biblia, laanu, caquiiñeʼ guni orarnu laasibe ne guirútiruʼ. Ne lu Stiidxabe na «pa inaba nu ni riulaʼdxi Dios gaca la? zucaa diaga laanu» (1 Juan 5:14). Nga runi, pa racaláʼdxinu gucaadiaga Dios laanu caquiiñeʼ gunibiaʼnu laabe ne guzúʼbanu stiidxabe.

Stale binni nanna dxichi cadi ti costumbre si nga guni orar Dios ne nánnacaʼ rucaadiágabe ne ricábibe laacaʼ. Isaac, ti hombre de Kenia guníʼ: «Gunabaʼ lu ti oración gacanécabe naa guieneʼ Biblia. Nin qué nindaa, beeda ti binni ra nuaaʼ ne gucané naa». Ti gunaa láʼ Hilda, de Filipinas, gucalaʼdxiʼ nusaana de niguʼbaʼ gueza stale biaje, peru qué ñanda. Ngue runi, gudxi xheelabe laabe guinábabe Dios gacané laabe. Despué de biʼniʼ orarbe, guniʼbe: «Nabé bidxagayaaʼ modo gucanebe naa. Chaahuidugá maʼ qué nuquiindepeʼ naa nigubaʼ gueza dede bisaanaʼ ni».

Yanna, pa guinábaluʼ xiixa para gúniluʼ ni na Dios, ñee zacabi lii la?