Ra nuu Jiobá Dios «cadá guendanabani» (Salmo 36:9). Nga runi, laaasibe nga zanda gusibánibe cani maʼ guti. Biblia na maʼ cadi candaa diʼ zúnibe ni. (Biindaʼ Hechos 24:15.) Xiñee racalaʼdxiʼ Dios gusibani cani maʼ guti yaʼ.

Purtiʼ dede dxi bizaʼbe binni gucaláʼdxibe nibánicaʼ sin qué ñuu dxi ñáticaʼ (Génesis 1:31; 2:15-17). Ne caʼruʼ guchaa Dios modo riníʼ ique. Riuubaʼ ladxidoʼbe modo nabani binni: chupa chonna iza si ne stale guendanagana. (Biindaʼ Job 14:1, 14, 15.)

Ñee bizáʼ Dios binni para guibani guibáʼ la? Coʼ. Laabe bizaʼbe ca ángel para guibani guibáʼ, ne laanu la? para guibáninu ndaaniʼ Guidxilayú riʼ (Génesis 1:28; Job 38:4, 7). Yanna, guníʼ ique ca binni ni bisibani Jesucristu, paraa bibiguetaʼ bibánicabe yaʼ. Raríʼ, lu Guidxilayú riʼ. Ne ngaca nga chiguizaaca ca binni ni chiguibani sti biaje: zabánicaʼ lu Guidxilayú riʼ. (Biindaʼ Juan 5:28, 29 ne 11:44.)

Gulí Dios caadxi binni para guibánicaʼ guibáʼ, peru né ti cuerpu de espíritu (Lucas 12:32; 1 Corintios 15:49, 50). Grupuhuiiniʼ riʼ nga chiguni mandarné Jesucristu lu Guidxilayú riʼ. (Biindaʼ Apocalipsis 5:9, 10.)