Lu iza 1949, biree bixhoze de Alemania ne guyé Australia para guyubi dxiiñaʼ de mineru ne ra raca producir biaaniʼ. Gulézabe ndaaniʼ ti guidxihuiiniʼ stiʼ guidxi Victoria ne raqué nga bichaganabe jñaaʼ. Naa guleʼ lu iza 1953.

Chupa chonna iza despué, bizulú jñaaʼ bi’ni’ estudiar Biblia né ca testigu de Jehová, nga runi ca ni rusiidiʼ Biblia nga caadxi de ni rietenalaʼdxeʼ dxi nahuiineʼ. Peru bixhozeʼ qué lica ñacalaʼdxiʼ nin ti religión. Guizáʼ feu guca xpiaʼbe. Ngue runi nabé bidxibi jñaaʼ laabe, peru neca zaqué, qué nusaanabe de ñuni estudiarbe neca bíʼnibe ni nagaʼchiʼ. Nabé bisisácabe guiráʼ ca ni biziidibe. Nga runi ora qué guinni bixhozeʼ rusiidibe naa ne bizanaʼ de ca ni caziidibe que. Gúdxibe laadu zaca Guidxilayú riʼ ti paraísu ne pa gúnidu ni ná Biblia zabánidu nayecheʼ (Salmo 37:10, 29; Isaías 48:17).

Cumu guizáʼ feu xpiaʼ bixhozeʼ la? dxi napaʼ 18 iza bireeʼ de ra lidxeʼ ne yendezaʼ sti ladu. Neca bineʼ cré guiráʼ ni bisiidiʼ jñaaʼ naa la? huaxiéʼ bisisacaʼ ni rusiidiʼ Biblia, ngue runi, qué ñuneʼ ni ná ni. Bizuluáʼ bineʼ dxiiñaʼ de eléctricu ndaaniʼ ca mina ra raca buu ne bichaganaʼyaʼ dxi napaʼ 20 iza. Chonna iza despué, gule primé dxaapahuiiniʼ stidu, nga bicaaʼ naa guiníʼ iqueʼ xii nga ni jma risaca lu xquendanabaneʼ. Nannaʼ zanda gacané Biblia familia stinneʼ, ngue runi bizuluáʼ bineʼ estudiar né ca testigu stiʼ Jehová. Peru xheelaʼ qué ñacalaʼdxiʼ ca Testigu. Nga runi, ora guyaaʼ tobi de ca reunión stícabe la? gúdxibe naa: o gusaanaʼ de guneʼ estudiar Biblia o chaaʼ de ra yoo. Cumu qué nidxelaʼ xi ñuneʼ, bineʼ ni nabe ne bisaanaʼ de guneʼ estudiar né ca Testigu. Peru despué gucaʼ arrepentir purtiʼ nannaʼ ngue nga ni jneza.

Ti dxi bizulú biluíʼ ca ni runeniaʼ dxiiñaʼ naa pornografía. Guizáʼ guyuuladxeʼ guuyaʼ ni, peru laaca bibixhila’dxeʼ ni ne guiluxe guuyasiáʼ ni guizáʼ feu modo runeʼ sentir ne riníʼ iqueʼ napaʼ donda. Ora rietenalaʼdxeʼ guiráʼ ca ni biziideʼ lu Biblia que, nannaʼ dxicheʼ zuni castigar Dios naa pur ca ni cayuneʼ. Peru cumu qué nusaana de ñuuyaʼ ca imagen ni cadi jneza que la? maʼ qué nuchiiñaʼ xquendabiaaneʼ naa ora guuyaʼ pornografía ne beeda gácani ti viciu para naa.

Gande iza bisaanaʼ de guneʼ guiráʼ ca cosa galán ni bisiidiʼ jñaaʼ naa. Guiráʼ ca ni bineʼ que, bisihuinni ca ni xii ngue ca ni ruuyaʼ. Puru chiste de diidxaʼ guidxa gunieeʼ ne puru diidxaʼ feu. Ma’ casi guendariguite biiyaʼ gatané tuuxa ni cadi xheelaʼ, ngue runi, neca nabezaniáʼ xheelaʼ, guyuaaniáʼ xcaadxi gunaa. Ti dxi biiyaʼ naa lu espeju ne guníʼ iqueʼ: «Qué riuuladxeʼ modo naa riʼ». Lugar de ñannaxhieeʼ naa, laga guca nanaladxeʼ laca naa.

Gucaʼ divorciar de xheelaʼ ne nabé feu modo bibaneʼ. Peru bineʼ orar Jehová de guidubi ladxiduáʼ. Neca maʼ gudiʼdiʼ gande iza, biguetaʼ biziideʼ de lu Biblia sti biaje, para ca dxi que maʼ gutiʼ bixhozeʼ ne jñaaʼ maʼ naca ti testigu de Jehová.

Gadxé peʼ modo nabaneʼ que ne modo rusiidiʼ Biblia. Peru biaje riʼ gudixheʼ iqueʼ guyuube gatadxí xquendabiaaneʼ casi ná Stiidxaʼ Dios. Ngue runi, bineʼ stipa gusaanaʼ de guinieeʼ ca diidxaʼ feu que ne guchaaʼ modo naa. Laaca bisaanaʼ ca apuesta que, guendarixudxi, maʼ qué nibaʼnaʼ empresa ra runeʼ dxiiñaʼ que ne maʼ qué ñuaaniáʼ gunaa.

Ca ni runeniaʼ dxiiñaʼ, qué ñénecaʼ xiñee nagueendaca nuaaʼ guchaaʼ modo nabaneʼ que. Chonna iza biyúbicabe ximodo gucaacabe naa guneʼ ca cosa ni maca runeʼ que. Ora ribiguetaʼ ruuyaʼ pornografía ne ridxiicheʼ o guinieeʼ xiixa diidxaʼ feu la? riéchecabe, nagueendaca rucaacabe ridxi ne riníʼcabe: «Ndiʼ nga Joe ni runibiaʼdu que». ¡Guizáʼ runiná ca diidxaʼ que naa ne runeʼ sentir qué iquiiñeʼ!

Guizáʼ ruuyacabe pornografía ra runeʼ dxiiñaʼ. Guiráʼ ora ruseendaʼ ca ni runeniáʼ dxiiñaʼ que imagen de pornografía lu computadora o runi imprimircaʼ ni casi bineʼ ni dxiqué. Guizáʼ bineʼ stipa pur gusaanaʼ viciu que, peru laacabe ni nuucabe nga guibiguetaʼ guuyaʼ ni sti biaje. Biyubeʼ hermanu ni bidii estudiu naa que, para gacané ne cuʼ gana naa, né stale paciencia bicaadiágabe naa ora gudxeʼ laabe ca ni cayuneʼ sentir que. Biindanebe naa textu ni nánnabe zacané naa ne biluiʼbe naa xi zanda guneʼ para gusaanaʼ viciu que. Laaca guluube gana naa cadi gusaanaʼ de guneʼ orar Jehová ne guinabaʼ laa gacané naa (Salmo 119:37).

Ti dxi bineʼ reunir guiráʼ ca ni runeniaʼ dxiiñaʼ ne ora biiyaʼ maʼ nuu guirácabe la? gudxeʼ laacabe gudiicabe chupa cerveza chupa de ca compañeru stidu ni cayúnicaʼ stipa gusaanacaʼ guendarixudxi. Guiracaʼ gudindenécabe naa, ne nacaʼ: «¡¿Zudii xa du ni laacabe?! ¡¿Cadi cayuuyaluʼ cayuni ca hombre riʼ stipa gusaanacaʼ guendarixudxi ca la?!». Óraque gudxeʼ laacaʼ: «Ngaca la? naa ya». Ne dede dxi que biénecabe laaca cayuneʼ stipa pur gusaanaʼ viciu de guuyaʼ pornografía que ne maʼ qué nucaacabe naa guneʼ ca cosa ni bineʼ dxiqué.

Ra gudiʼdiʼ tiempu, gunda bisaanaʼ viciu que purtiʼ gucané Jehová naa. Guyuaanisaʼ casi testigu stiʼ Jehová lu iza 1999. Nga runi, rudieeʼ xquixe peʼ Jehová purtiʼ bidii naa sti oportunidad para guibaneʼ nayá ne nayecheʼ.

Yánnaruʼ maʼ bieneʼ xiiñeʼ nanalaʼdxiʼ Jehová guiráʼ ca cosa ni biuulaʼdxeʼ pur stale iza. Cásica bixhoze binni la? ni nuu Jehová nga gapa naa de ca yuubaʼ rapa binni ora guuyaʼ pornografía. Rihuínnica dxandíʼ peʼ nga ca diidxaʼ ni zeeda lu Proverbios 3:5, 6: «Gupa confianza Jehová de guidubi ladxidoʼloʼ, ne cadi chinándaluʼ ni ná xpiaaniluʼ. Lu guiráʼ ni gúniluʼ, biiyaʼ xi nabe, ne laabe zúnibe ca neza stiluʼ derechu». Pa chinándanu ca ni rusiidiʼ Biblia, cadi zapa si ca ni laanu, sínuque de seguru zabáninu galán (Salmo 1:1-3).

Dxiqué guca nanaladxeʼ laca naa, peru yanna maʼ rusisacaʼ xquendanabaneʼ ne nuaaʼ nayecheʼ purtiʼ maʼ nexhedxí ladxiduáʼ. Ma’ nayá modo nabaneʼ ne nannaʼ maʼ biʼniʼ perdonar Jehová naa ne qué rusaanabe de gacanebe naa. Lu iza 2000 bichaganaʼyaʼ ti Testigu, ti gunaa nabé nachaʼhuiʼ láʼ Karolin. Guizáʼ nadxiidu Jehová. Ne nabánidu nayecheʼ purtiʼ nácadu parte de ti guidxi ni nayá ne nadxiisaa.