Lu iza 2022, biniti ca gobiernu ca biaʼ chupa mil chupa gayuaa cuarenta millón de dólar luguiáʼ ca ejércitu sticaʼ. Bizaaca ndiʼ purtiʼ bicaalú Rusia guidxi Ucrania. Sicaríʼ bizeeteʼ Instituto Internacional de Estudios para la Paz de Estocolmo, lu ti informe ni bidii lu abril de 2022:

•   Lu iza 2022, biniti ca gobiernu ni nuu Europa jma de 13% de bueltu biaʼ runíticaʼ luguiáʼ ca ejércitu sticaʼ, qué huazaaca ndiʼ dede lu iza 1991.

•   «Biaʼ bueltu ni huaniti Rusia luguiáʼ ejércitu stiʼ, gudxiʼbaʼ ni biaʼ 9,2%». Dxiqué la? Rusia nga nanda lugar gaayuʼ de ca gobiernu ni jma runi gastu luguiáʼ ejércitu stiʼ, peru yanna maʼ nuuni lu guionna.

•   Nácaruʼ Estados Unidos guidxi ni jma runi gastu luguiáʼ ejércitu stiʼ: «biʼniʼ gástucaʼ 39% de bueltu ni huaniti ca gobiernu ni nuu lu guidubi Guidxilayú luguiáʼ ca ejércitu sticaʼ».

 «Guiráʼ iza, jmaruʼ stale bueltu riquiiñeʼ ca gobiernu ca luguiáʼ ca ejércitu sticaʼ, nga rusihuinni maʼ gastiʼ peʼ seguridad», ndiʼ nga ni guníʼ doctor Nan Tian, ni gucané guicá informe ni bidii Instituto Internacional de Estudios para la Paz de Estocolmo.

 Lu Biblia maca cá jma nadipaʼ modo zadindesaa ca potencia mundial ca tiempu riʼ. Laaca ruzeeteʼ ni ximodo zanda gápanu paz ni dxandíʼ.

•   Lu Biblia ná maʼ nabáninu tiempu ra maʼ yaca gueeda fin (Daniel 8:19).

•   Lu libru stiʼ Daniel maca cá qué ziuu ca potencia mundial ca tobi si tiempu riʼ. Ne pur nga nabé nadipaʼ modo zadíndecaʼ ne zuyúbicaʼ gusihuínnicaʼ tu laa jma napa poder. Nga runi, zaquiiñecaʼ stale bueltu ne cosa risaca ni nápacaʼ para gúnicaʼ ni (Daniel 11:40, 42, 43).

 Pa racaláʼdxiluʼ gánnaluʼ jma de profecía ni zeeda lu Biblia riʼ, biiyaʼ videu ni láʼ Cayaca cumplir profecía ni zeeda lu Daniel 11.

•   Biblia ná zabee Dios guiráʼ gobiernu ni cayuni mandar lu Guidxilayú riʼ. Ne «ca dxi stiʼ ca rey ca, Dios ni nuu guibáʼ zucuí ti reinu ni qué ziuu dxi guinitilú ne qué zadiʼdiʼ ni lu náʼ sti guidxi. Zunideni ne zunduuxeni guiráʼ ca reinu ca, ne laasini ziaanani para siempre» (Daniel 2:44).

•   Ma cadi candaa zedané Jehová a paz ni dxandíʼ lu guidubi Guidxilayú, ti cosa ni qué zanda guni binni. Peru ¿ximodo chigúnibe ni yaʼ? Zaquiiñebe Reinu stibe, laani nga ti gobiernu ni nuu guibáʼ, ne zunitilú ni guiráʼ ca guiibaʼ ni rinécabe lu guerra ne maʼ qué ziuuruʼ dxi chuʼ guendaridinde (Salmo 46:8, 9).

 Pa racaláʼdxiluʼ gánnaluʼ jma de xi chiguni Reinu stiʼ Dios, biindaʼ artículo ni láʼ «Zedané Reinu stiʼ Dios stale guendariuudxi».