Lu beeu agosto iza 2014, gudiiziʼ ca testigu stiʼ Jiobá ni nuu lu guidubi Guidxilayú ti tratadu para ganna binni de sitiu jw.org. Xi guleendúcabe né dxiiñaʼ riʼ yaʼ. Beeu riʼ guyuu jma de 20% binni lu sitiu riʼ, biaʼsi yendani 65 millón binni. Lu guidubi Guidxilayú, biaʼ 10,000 binni gunabaʼ lu sitiu ca guʼndanécabe laacaʼ Biblia, 67% jma que beeu gudiʼdiʼ ca. Cayacané campaña riʼ binni de guiráʼ ladu.

Bigapadiuxi ti gunaa Testigu de Canadá ti baʼdudxaapaʼ láʼ Madeline ndaaniʼ ti elevador ne biluiʼbe laa tratadu Tu zanda guicabi cani jma racalaʼdxiʼ binni ganna. Óraque gudxi Madeline laabe ti gueelaʼ ante, laga caziilaʼdxiʼ ra lidxi, gunabaʼ Dios gacané laa guiene ca guenarinabadiidxaʼ ni zeeda lu tratadu que. Laabe maruʼ huabidxibe binni de xcaadxi yuʼduʼ pur teléfono para gusiidicaʼ laabe de Biblia, peru nin tobi de laacaʼ maʼ qué niníʼnecaʼ laabe. Qué nindaa bizulú biindané ca testigu stiʼ Jiobá laabe.

Ndaaniʼ guidxi Filipinas guniʼné Rowena ti hombre de China ni zuhuaa ra nuu ti restaurán ne bidiibe laa tratadu ca, bisiénebe hombre que rusiidiʼ ca testigu stiʼ Jiobá binni de Biblia gratis.

Hombre que na qué huayuudxí guʼyaʼ ti Biblia. Ne ni guníʼcabe despué que bicaa hombre que cheʼ ti asamblea stiʼ ca testigu stiʼ Jiobá. Laaca guniʼbe racaláʼdxirube guiziidibe de Biblia ne zandétebe ni lu sitiu nápanu lu Internet.

Guillermo, ti Testigu de España ni qué runadiaga. Ti dxi bidxaagabe Jorge, ti hombre ni guzánebe scuela ne laaca qué runadiaga. Gudxi Jorge laabe cadi xadxí de guti jñaa ne pur ngue racalaʼdxiʼ ganna stale cosa. Bidii Guillermo laabe tratadu ni cayaaziʼ que ne bisiene laabe ximodo zanda guidxélabe cani racaláʼdxibe gánnabe que lu sitiu jw.org ne lu diidxaʼ seña. Laaca biʼniʼ invitar Guillermo laabe chebe ra Yoo stiʼ Reinu. Guyebe ne dede dxiqué qué huayaadxabe nin ti reunión neca riaana lídxibe 60 kilómetro de ra Yoo stiʼ Reinu.

Chupa guendaxheelaʼ Testigu bíʼnicaʼ ti viaje lu ti barcuhuiiniʼ, caru gudíxecabe ne bindaa xhoopaʼ hora para yendácabe ndaaniʼ ti guidxihuiiniʼ stiʼ Groenlandia ra nabeza 280 binni. Bicheechecabe diidxaʼ ndaaniʼ guidxi que, bisaananécabe binni tratatu que ne biluíʼcabe laacaʼ videu ni caníʼ de jw.org lu diidxaʼ groenlandés. Bizulú biindanécabe ti guendaxheelaʼ, ne yanna rundanécabe laacaʼ por teléfono chupa biaje lu ti semana.

Peru cadi racá si nga bíʼnicabe dxiiñaʼ nadipaʼ. Ca Testigu de Nicaragua laaca gudixhe chaahuicaʼ ximodo quíʼzicaʼ tratadu que ndaaniʼ ca guidxihuiiniʼ nuu ndaaniʼ ca guiʼxhiʼ neza ra rábicabe zona del Caribe, ra riníʼcabe diidxa mayangna. Guyécabe 20 hora ndaaniʼ ti autobús maʼ nayooxhoʼ ne dxaʼ barranca neza ra gudíʼdicabe, ne laaca guzácabe 11 hora, nuu ra gudíʼdicabe beñe para yendácabe ra nuu ca guidxi que. Gudiizicabe tratadu ndaaniʼ guiráʼ ca guidxihuiiniʼ que ne biluíʼcabe binni caadxi videu lu diidxaʼ mayangna, ora biʼyaʼ ca binni que cani nabé bidxagayaacaʼ ne guyuuláʼdxicaʼ guiráʼ ni.

Ndaaniʼ guidxi Brasil, bidii Estela ti tratadu ti señor ni zidiʼdiʼ neza ra nuu ca guidxihuiiniʼ stiʼ guiʼxhiʼ Amazonas. Gucuaa señor que ni neca qué nusihuinni pa riuulaʼdxiʼ guiziidiʼ. Ora biguétabe ra lídxibe, bixiiñeʼ canua stibe neza ne biaanacabe ruaa ti guiiguʼ. Laga cabézabe tu gacané laabe, biindabe tratadu que ne bixhélebe sitiu jw.org lu celurar stibe. Biindabe caadxi tema luni ne gundétebe caadxi videu. Gudiidi si caadxi dxi, biiyaʼ hombre que xheelaʼ Estela ne gudxi laabe gudiibe xquíxepeʼ Estela pur bidii laabe tratadu que. Sicaríʼ guníʼ señor que: «Ca tema biindaʼ que gucané cani gatadxí ladxiduáʼ laga cabezaʼ tu gacané naa. Yanna, ca xiiñeʼ nabé riuuláʼdxicaʼ ca videu stiʼ Caleb. Ziuaaruaʼ lu sitiu jw.org ca».