Yesu Kristo nga Wiri Yekova, ki duni mbembedi bakureako nga guko kpi Ko nyemu ko gbe. Mbata fu ko raki auru kpotosende ni boro, Yesu araki ngbangbaturũ yo ni gu toro du na bakere ome. (Yoane 17:5) Fuo gure, ko ki ye ku auru kpotosende ka yugo rengo fu aboro tipa Mbori. (Yoane 18:37) Ko afu ungako nga ga boro a tipa ka batasa aborogiasangba be kpio na ingapai. (ARomo 6:23) Yesu awere nga Bakindo ga Mbori Kindo, nga gu zogarago nga ga ngbangbaturũ, nga gu nika ye na Paradizo ku auru gi kpotosende re.​—Yugoti 19:16.

Amaraika nga abakurea Mbori a. Amaraika atonanga gayo raka wa aboro auru kpotosende te. I akusiyo ngbangbaturũ yo mbata fu Mbori mangi kpotosende. (Eyobo 38:4-7) Badungu amaraika gudu ho. (Daniere 7:10) Agi abakurea Mbori nga ga ngbangbaturũ yo re naida aboro wiriki rengo tipa Yekova.​—Yugoti 14:6, 7.

Mbori na abakurea ko ti ni a auru kpotosende; ko nayamba yo nga gako aDezire. Dezire nagumba gupai ngbanga yo nga gu ini ni he tipa boro watadu tipa pai. ADezire Yekova nagumba gupai fu kura aboro nga gu ini yo ho tipa Yekova na gako ringbisapai. (Yesaya 43:10) Wa kina amaraika, aDezire Yekova naida ka undo ro mo wiriki rengo tipa Yekova. I naida mo duni bakurea Mbori a.