I namaa mburu pabakure rii nyemuse. Wa mo kaa wirikapai gbe tipa Yekova, kinawo a nyemu ko nikaa kio tiro. Wa gamo nyemu Mbori nikaa sona, nyemu manga mo sunge ko asona a. Gere afõngbaduroyo mo da ni ga Yesu Kristo bawiriki. (Matayo 28:19) Ni koda mo tiro kuti gu badona awirina du na ngbarago nga aDezire Yekova, mo rengbe ka inopa ga Mbori pabakure nyeanye kindi. Ginipai du wa ka mo mangihe?

Mo du wa ka mo yugu gamo nyemu Mbori ni irisa mo gako arugute. “Bambiko gi nga du na nyemu Mbori re, nga ka ani kuti gako rugute. Gako rugute asusa nga omerani te.”​—1 Yoane 5:3.

Mo nimangi gupai mo awirikaha. Yesu ape pangbanga nga gu nayugo gere. Tatamanatatamana kumba ame gako bambu rii mbia. Mumungo kumba ki me gako bambu tigako rii ngume. Ho bakere bavugumo aye ni, gu bambu i amehe rii mbia aatinga te, ono gu i amehe rii ngume ati na bakere woroho. Yesu aya wẽ agu aboro nagia gako yugopai na kini mangihe, i wakina gu tatamanatatamana kumba name gako bambu rii mbia. Ono aguyo nagia gako yugopai na ka i amanganga ha ya, i wakina gu mumungo kumba name gako bambu rii ngume. Mo naida ka du wa gini kumba?​—Matayo 7:24-27.

 Kparatise. Gere nayugo gupai nga mo nandu fuo Yekova rogo kparakpee na ki gumba gupai fuko nga mo naida ka manga gupai ko akpinyemuhe nyeanye kindi. Manga gupai Mbori akpinyemuhe nayugo gupai nga mo nga ga Yesu Kristo bawiriki.​—Matayo 11:29.

Bapatiza. “Mo gúari, i ki bapatizi ro ki ta zunda ga gbegberẽapai ti ro, [mo] nikpari ti rimoko.”​—Amokedi 22:16.

Mo rimisi tiro wenengai ku rogo mangasunge Mbori. “Gu oni amanga oni mángi he na kpotoroni yo wa manga ha fu Gbia, wa fu aboro te.”​—AKorosaio 3:23.