Si naida asadatise ka zio bakure; si naida asadatise ka banda pabakure. Mbori afu maku afu kurii gamo asadatise ka duni bakureako na ka nye ni bakureako kindi. Yesu agumba gupai fu agu aboro naidi kuti ko nga: ‘Oni ara ni rironi be rengo.’ (Yoane 8:32) Gure nayugo ginipai?

Mo rengbe ka du na ngbarago be ranirii awere. Mo rengbe ka kusagoro kusayo be gu zire yugopai gbiati aziree nga gu Satana naagbaragaha. Mo rengbe ka kusagoro kusayo be gu zanga du na maabangirise hiisi gu raka nga ga badungu aboro nga aguyo ainonga Yekova ya. (ARomo 8:22) Zavura “gunde kpio” a, abakurea Mbori ima kusa goyo behe.​—AEbere 2:14, 15.

Mo rengbe ka gbia ngbarago be ranirii rogo ga Mbori vovo zegino. Nga gu bawene ranirii rengbe mo ka gbia ngbarago behe kumbatayo! Rogo Paradizo kpotosende, ranirii aduho zanga vura, kaza, na kuondiko. Ranirii aduho zanga rungo gbiati gomoro. Ranirii aduho zanga gbinza na kpio. Ranirii aduho zanga gunde, rungosi aboro, gbiati irairapai. Baibiri nagumba gupai tipa Mbori nga: “Mo naza bero, ki nimbisi gu nyemuhe nga ga unga ahe dunduko.”​—Atambuahe 145:16.

 Abakurea Mbori araka nyeanye kindi. Nyenye unga nga gu bawene gamahe nga gu Mbori nika gamaha fu agu aboro dunduko nagbata gako pa bakure. (ARomo 6:23) Mo berẽnga pa wai gu raka adunga na digidoho tini ya nika du!

Mo adu na regbo bero ka manga dungu apai. Isoke mo naida ka wirika wai ka bika abia rogo kundi. Isoke mo naida ka wirika wai kaa keka kpiahe watadu ka duni basekengua. Watadu gu du gbe nga mo naida ka wirikapai tipa anya watadu kurukuru ahe. Si nawira mo naida ka ndu nunguro ka biko aringara ni bakiakia na ariko aboro. Du na nyenye unga asa agi apai dunduko re ni gupai ka mangi amanga!

Mo adu na regbo bero ka zio bakure na dungu aboro. Raka nyeanye kindi asaro mo ini kura dungu aboro nga aguyo naima duni abakurea Mbori. Mo aye ka ino gayo abirĩ-inohe gbiati wene asino, na i adu a ni abakureamo. Mo akpinyemu yo, na i akpinyemu ro. (1 AKorindo 13:8) Du na gu unga adunga digidoho tini ya afu regbo foro mo zi bakure na agu aboro dunduko nika du auru kpotosende! Gu ngba berewe kisusi nga, gamo pabakure na Yekova asona ni nyanyakihe wa akama agarã nikaa susa. Mo dunga adu tie ni bakurea Mbori nyeanye kindi!