Ka mo aida ka duni bakurea Mbori, mo du wa ka mo amanga gu pambori nga gu Mbori aidaha. Yesu aya “ndikidi aboro irisa” airiso Mbori rogo “rengo.” (Yoane 4:23, 24) Ruru gene ho gbua kina sa tipa iriso Mbori. (AEfeso 4:4-6) Ndikidi pambori nandu sa nyenye unga, zire pambori tigaha nandu sa gbarasahe.​—Matayo 7:13, 14.

Mo rengbe ka ino ndikidi pambori ni kparia mo agu aboro namangaha. Wa duhe nga Yekova ni wene boro, agu aboro nairiso ko du wa ka i duni wene aboro. A wa wene ngua oronzi naazuka wene oronzi, ndikidi pambori nakusa wene aboro a.​—Matayo 7:15-20.

Abakurea Yekova na bakere irisa tipa Baibiri. I ini gupai nga Baibiri aye be Mbori. I nambugene fu gupai si agumbaha tipa si rugu gayo raka, si nyasi na gayo fudifudiapai, na si undo yo i wirikipai tipa Mbori. (2 Timoteo 3:16) I naˈasada kaa manga gupai i atungusaha.

Abakurea Yekova nayugo nyemuse dagba tiyo. Yesu ayugu nyemuse tipa aboro ni yugo ko pai fuyo tipa Mbori,  ni husa ko aboro kaza. Agu aboro namanga ndikidi pambori nayugo nyemuse a tipa akurayo. Wa kina Yesu, i abisiranga pa agu aboro nga airarungo watadu du ngbatunga yo kia te. Yesu aya aboro aino gako abawiriki ti gu nyemuse i kaa yugoho dagba tiyo.​—Yoane 13:35.

Abakurea Mbori nairisa rimo Mbori, nga Yekova. Ka boro aidanga ka yamba rimoro ya, ni rengbe ka duni mbembedi bakureamo? Oó! Ho du ani ni na bakurearani ti ni, ani nayamba rimoni na kini gumba weneapai tipa gu bakurea rani re fu kura aboro. Sidu, agu aboro naida ka duni abakurea Mbori, si naida i niyambu rimo ko na kini fura fu kura aboro tipa ko. Yekova naida ani mangi gure.​—Matayo 6:9; ARomo 10:​13, 14.

Wa Kina Yesu, abakurea Mbori nayugopai fu aboro tipa ga Mbori Kindo. Ga Mbori Kindo nga gu zogarago nga ga ngbangbaturũ nga gu nika sa kpotosende ni paradizo. Abakurea Mbori nagumba gi wene pangbanga du tipa ga Mbori Kindo re fu kura aboro.​—Matayo 24:14.

ADezire Yekova naˈasada tiyo ka duni abakurea Mbori. I nayugo iriso tipa Baibiri na ki du na nyemuse dagbatiyo. I nayamba rimo Mbori a na ki du na iriso tipaha na kini yugupai fu kura aboro tipa ga Mbori Kindo. ADezire Yekova namanga ndikidi pambori auru kpotosende areme.