Tingbafuo Soromo da ni bakindo aYisaraere, Yekova asanako nga: ‘Ginihe mo aida mi fuhe foro?’ Soromo aya: ‘Paranga boro nga mi na mi ainongo gupai mi amangaha te. Mi nazungodi ro mo fu tatamana fere tipa mi ngerefuo gamo aboro.’ Yekova aya: ‘Mbiko wa sana mo he tipa tatamana, mi nika saro ni kere tatamana tatamana kumba auru kpotosende. Mi nika saro mo du a ni irakumuko. Na ka mo agiasangba re, mo nika raka ni gbangaha.’

Soromo atona ka dua yekaru. Ko amangisunge na wene adahabu, feda, angua, na wene ambia. Akutu aboro biri-inohe nga akumba na adee namangisunge dua yekaru. Tingbafuo agarã saba, sunge yekaru anyasi na si ki rẽ tipa i kparaha fu Yekova. Si adu na bamotumo ti ni na zozo amotumo riihe. Soromo akuku barangba bamotumo ki kpari kpee fu Yekova nga: ‘Ako Yekova kiingo gi bambu re te na si angbanga wenengai tipa ro te, ono ani nazungodi ro mo idipa gaani iriso na ki degeturo kuti gaani akpee.’ Ginipai Yekova aberẽhe tipa gu yekaru re gbiati ga Soromo kparakpee? Nibasa tingbafuo Soromo nyasi gako kparakpee, we azoro ariyo ki zo gu motumo naadu rii bazo motumo. Yekova aidipa gu yekaru re. Ho aYisaraere abi gipai re ni, i kidu na ngbarago.

Aboro aima ino Bakindo Soromo tipa gako tatamana Yisaraere yo na rogo agu aringara naadu tuturũ. Aboro anaaye fuoko tipa ko ni undo yo na gayo apai. Zavura Nakindo Seba ri aye ka asada ko na nyanyakipa asanahe. Ho ri agi gako karagapai ni, ri aya: ‘Mi aaidanga kuti gupai aboro apehe fere tipa ro te, ono awere mi bihe nga mo ima du na tatamana kisusi gupai i agumbaha. Gamo Mbori nga Yekova ima fu maku foro.’ Raka aima ngba fu gu rikaaboro nangia aYisaraere, na i ki du na ngbarago. Ono apai aandu ka ariatihe.