1, 2. Gini bakere sunge Yesu afura tipaha kumbatayo, na gini nyanyakipa sanahe nakura?

AGU abazogo nga ga poritiki yo nakidohe dedede zanga mangaha. Zavura kina aguyo du na wene bipai, i arengbanga ka manga agu apai dunduko i nakidohe tipaha te. Si nafu ngbarago nga, gu Bakindo nga Masiya nga Yesu Kristo tigako kia mbiko ko namanga agu apai ko agumbaha.

² Fuo Yesu da ni Bakindo rogo 1914, ko adu regerege tipa ka digiso gu sangbanebi ko apehe agarã wa 1,900 kusayo. Ngbutuko mbata fu Yesu kpi, ko aya: “Gi wene pangbanga nga ga ngbi re i atungusa ha rogo zegino dunduko.” (Mt. 24:14) Si adu nga pa digiso agu afugo re nika ngia gu kpiapai nayugo padu ko ho na ome Kindo beko. Ono tie, nyanyakipa sanahe nakura nga: Wai du Bakindo nika rengba ka gbia agu abanzengere du na nyemu tungusapai tiyo rogo yangara areme nga gu regbo aboro nika du rogoho ni airagbangbati, azanga nyemuse, na ni abasamungu? (Mt. 24:12; 2 Tim. 3:1-5) Ani na nyemu ka ino gu karagapai du tipa gi sanahe re mbiko si nabi ndikidi aKristano naabayo dunduko.

3. Gini ngbatunga kido Yesu adu na ni, na wari du ko agbia gu kido re ni?

³ Ani wisigingo ga Yesu sangbanebi berewe. Ya mo agu afugo nga ‘i atungusa ha’ nafu kido furani? Nirengo, si nafuhe afu! Yesu adu na kido nga ko nika duadu na agu aboro nika kpinyemu ka songoda ko ti yangara arame. Wari du ko agbia gu ngbatunga kido re ni? Ko awirikihe be Bako. (Yo. 12:45; 14:9) Ho Yesu adu ni ngbangbaturũ yo, ko aima bi wai Yekova adu na kido kuti agu aboro naadu na nyemu ka irisoko. Ani bingo wai Yekova ayugu gu kido re.

4. Gini sunge Yekova asana aYisaraere i songodihe, na ginipai i amangihe tipaha?

⁴ Oni tingidi gupai namangi ho Yekova aya ni fu Moize ko dua banye, watadu bamburoko, nga gu si adu nga si nika ngia gu ba gu rikaaboro nangia aYisaraere nikaa irisombori rogoho. Vurube Moize, Yekova ayambu aboro dunduko i songodi gu sunge re. Moize aya fuyo: “Gu ni kpotoni yo akpi nyemu he, ni yé na ni ni  ga Yekova tumbatumba gamahe.” Sangbanaha angia gine? Aboro “ki niye na awiso na kura agamahe . . . kindi.” I aye na ahe ni bakerehe daho si ada ni nga ‘ka kumba na de yengo na tumbatumba agamahe berewe’ ya! (Gate 35:5; 36:3, 6) AYisaraere ayuguhe nga Yekova adu na kina rengo beko tipa ka kido kutiyo.

5, 6. Ringbisihe kuti Atambuahe 110:1-3, gini sino Yekova na Yesu aaberãpa gbiaha dagba ndikidi airisimbori rogo yangara arame?

⁵ Ya mo Yekova amaabangiriko nga ko nika gbia agu aboro nafutiyo zaaza dagba airisiko rogo yangara arame? Ii! Agarã susi 1,000 mbata fu i batika Yesu auru kpotosende, ga Yekova toro adu kugii Davide ko kepa gu regbo si adu nga Masiya nika tona zogarago ti ni. (Oni gedi Atambuahe 110:1-3.) Si adu nga Yesu, nga gu vovo Bakindo i namoiko, ko nika duadu na avurako nika sovura kuti ko. Wa vura duhe wo, ko nika duadu a na abanzengere nika songoda ko. I aziongo yo azio ngbaome i mangisunge fu Bakindo te. Zavura gu paranga aboro du dagbayo i afutiyo na nyemuhe, na ki da wakina gu bakere rimbasa niima kio gbe, i narengbe ka ringbisapa yo kuti gu ndomo ni naadada kpotosende uru wiso. *

⁶ Yesu aima inoho nga gu sangbanebi du rogo Atambuahe 110 nafura tipa ko. (Mt. 22:42-45) Sidu, ko aima du na kido nga ko nika duadu na ruru asongodi ko nika futiyo zaaza tipa ka tungusa wene pangbanga auru kpotosende. Gini rengo apangbanga nayuguhe? Ya mo Bakindo mbakadi agu abanzengere du na nyemu ka tungusapai rogo gi yangara arame re?

7. Fuo i moi Yesu ni Bakindo, gini adiandue ko amangihe tipa ka mbakada agu aboro nasongoda ko tipa gu sunge naadu kumbatayo?

⁷ Ngbutuko fuo i moi Yesu ni Bakindo, ko amangi ome ka mbakada apefuoko tipa gu bakere sunge si aida i mangihe. A wa ani abihe rogo Kapita 2, ko aye ka wisigo yo na ka girisa yo naatona rogo 1914 kuti tonatona 1919. (Mara. 3:1-4) Fuani,  rogo 1919, ko asia ruru kangara moyambu i ngbembatayo fu apefuoko. (Mt. 24:45) Gbe naatona ti gu regbo re ka ndu kumbatayo, gu moyambu re atona ka kparaka gu riahe nga ga toro vurube agu agumbapai nga ga kikindigi adunguratise na agu awaraga naangarasa aKristano dedede na pa gu sunge du beyo nga si naida boro na boro ni tungusipai.

8-10. Wai du bakere dunguratise angarasi aboro tipa sunge tungusapai? Oni funga kpiapai. (Oni bi gu sanduki a nga “ Gu Bakere Adunguratise Nangarasi Aboro Kuti Tungusapai.”)

⁸ Agumbapai nga ga kikindigi adunguratise. Wa Abawiriki Ziazia Kekeapai adu na nyemu ka gbia rugapai, i adunguratiyo ku rogo gu gbata nga Cedar Point, Ohio, Amerika yo, rogo Mbirinvuo 1 kuti 8, 1919, gure nangia gayo bambata bakere dunguratise fuo gu Bambata Vura Nga ga Zegino. Rogo ue uru, Wiriba Rutherford amangi gumbapai nga gu ko afura rogoho fu agu aboro naadu pati dunguratise nga: “Ga Kristano sunge auru kpotosende ane . . . nga ka tungusa gu pangbanga nga ga ga Gbia kindo.”

⁹ Fuo arame biata, bakerepai amangi pati gu dunguratise re ho Wiriba Rutherford amangi gu gumbapai ni riihe angia “Gumbapai fu Abamangisunge,” nga gu i akusihe rogo Ngbaõbambu Sinziri na gu riihe nga “Oni Takipande Kindo.” Ko aya: “Ho adu nga Kristano ni rogo akpakarapai ya, ni sana tiní nga, Tipagine du mi tiní auru kpotosende? Na si naida gani karagapai du nga, Gbia moi re ni gako mokedi tipa mi takipandepa gako pangbanga nga ga mbakadapai dagbako na zegino, na momu du ngaha fere na ni sunge tipa ka takapande gu pangbanga re.”

¹⁰ Rogo gu gumbapai re, Wiriba Rutherford aya fu aboro wẽ, vovo magazini nga The Golden Age (du awere nga Awake!), i nika kusaha tipa ka gbeberã aboro kuti Kindo nga si nga gu yangara maabangirise du fu aboro. Fuani, ko asana agu aboro naadu pati bakere dunguratise nga ada naida ka kparakaha. Gu tingidapai naadu tipa gu bakere dunguratise re aya: “Gu karagapai naadu tipaha aima iriwo. Aboro sita kutu aru kuari nga i naida ka kparakaha.” * Nirengo, Bakindo aima du na agu aboro naadu zaaza na nyemu ka songoda sunge tungusapa Kindo!

11, 12. Ginipai Ngbaõbambu Sinziri agumbaha rogo 1920 tipa gu regbo si adu nga gu sunge Yesu afura tipaha nika manga?

¹¹ Awaraga. Ngbaõbambu Sinziri atona ka nyakasapai gbaiga tipa gu sunge Yesu afura tipaha kumbatayo nga ga tungusa gu wene pangbanga nga ga Kindo. Oni bingo bete agu akpiapai namangi bara ti tonatona gu garã nangia 1920.

¹² Gini pangbanga si adu nga i nika tungusaha ringbisihe kuti Matayo 24:14? Gini regbo du si adu nga i nika manga gu sunge re ti ni? Gu Ngbaõbambu Sinziri nangia ga Bamburu 1, 1920, adu na kekeapai riihe angia “Kitabu Wene Pangbanga Nga ga Kindo,” si asakipai tipa gu pangbanga re nga: “Gu wene pangbanga du ane nga pa digo gi kuru sino raka re na pa sigira ga Masiya Kindo.” Gu kekeapai re ayugu gu regbo nzunzu si adu nga i nika tungusa gu pangbanga re ti ni nga: “I du wa ka i  tungusi gi pangbanga re bangbanda gu regbo nga ga bakere vura [Bambata Vura Nga ga Zegino] na gu regbo nga ga ‘bakere gberãngbi.’” Sidu, gu kekeapai re aya: “A were nga regbo . . . ka tungusa gu pangbanga re tuturũ rogo agu apambori naya si nga ga aKristano.”

13. Wai du Ngbaõbambu Sinziri azungodi mbedimbedi aKristano rogo 1921?

¹³ Ya mo si adu nga i nika zio ga Mbori aboro azio i mangi gu sunge Yesu afura tipaha kumbatayo re? Oó. Gu kekeapai riihe angia “Mo du na Wingbaduse,” rogo gu Ngbaõbambu Sinziri nangia ga Marungu 15, 1921, azungodi mbedimbedi aKristano dunduko. Si angarasi yo ni basasa i sana tiyo nga: “Ya mo anga gimi bakere momu du ngaha, na ni gimi sunge nga ka mangasunge tungusapai te?” Gu kekeapai re ape gu kurapai berewe nga: “Ani na kido nga, ho mo abihe ni [ni momu ka tungusapai] mo nika du wakina Yeremaya fugo Gbia adu kpotokoyo ‘wa we kisi yo ho ku rogo ameme ko yo,’ nga gu naangarasa ko ka ko mbunga fura tipaha ya.” (Yere. 20:9) Gu wene ngarasaro re ayugu gu kido Yekova na Yesu adu na ni kuti ruru asongodi sunge Kindo.

14, 15. Rogo 1922, Ngbaõbambu Sinziri angarasi mbedimbedi aKristano i ndu fuo aboro na ginihe?

¹⁴ Wai du si aida ndikidi aKristano tungusi gu pangbanga nga ga Kindo fu aboro? Wiri guru kekeapai adu rogo gu Ngbaõbambu Sinziri nangia ga Buza 15, 1922, riihe angia “Tungusapai na Nyanyakipaha,” si angarasi mbedimbedi aKristano “i di gu pangbanga du rogo awaraga yo ki ndu ka fura na aboro ngbadimo akpuyo, ka manga dezirepai fuyo nga, gu kindo nga ga ngbangbaturũ ima mbeda.”

¹⁵ Si tie ziazia nga, naatona rogo 1919, Kristo ima mangasunge na ruru kangara moyambu i nyakasi gupai dedede nga, ga Kristano momu na sunge auru kpotosende ane nga ka takapande gu pangbanga nga ga Kindo. Ono wai du agu Abawiriki Ziazia Kekeapai naadu mbata re akaragapai kuti gu ngarasaro naadu tipa tungusa gu pangbanga nga ga Kindo re?

16. Ginipai gu kura abaakumba amangihe tipa gu berãpai nangia aboro dunduko ndu ka tungusapai?

¹⁶ Rogo agu agarã nangia 1920 na 1930, gu kura aboro aaidanga na gu berãpai nga si naida mbedimbedi aKristano dunduko tungusipai te. Gu Ngbaõbambu Sinziri nangia ga Ngbangba 1, 1927, ape gupai naamanga nga: “Aboro kinaho areme rogo kanisa [dungurati] nga abaakumba . . . aidanga ka ngarasa awirinayo i tungusipai ya, na i aidanga ka tungusapai a te. . . . I nabisirapa tungusa ga Mbori pangbanga na tungusapa Bakindo na gako kindo fu aboro kporo na kporo.” Gu kekeapai re aya: “Regbo ima da fu ruru aboro i kparia agu aboro re na ki ne tiyo, na ki ya fuyo ani afunga gu sunge nga ga ngerakurii apai berewe fu ngbatunga agi aboro re te.” *

17, 18. Ginipai dungu aboro rogo dungurati amangihe tipa gu rugapai naaye be ruru kangara moyambu, na ginipai amirioni aboro namangihe vuru agu agarã susi 100 re?

¹⁷ Si nipa ngbarago tie nga, dungu aboro rogo dungurati amangipai kuti gu rugapai nangia ga kangara moyambu re zaaza.  I abihe ni momu ka tungusa gu pangbanga nga ga Kindo. Gu Ngbaõbambu Sinziri nangia ga Marungu 15, 1926, afura tipa gipai re ki ya: “Ruru aboro nika ngia abaundosunge . . . ka pe gi pangbanga re fu aboro.” Gu ngbatunga ruru aboro re amangipai ringbisihe kuti gu sangbanebi du rogo Atambuahe 110:3 na ki yuguhe nga i nga agu aboro naida ka songoda gu Bakindo nga Masiya.

¹⁸ Vuru agu agarã 100 susi, amirioni aboro ima futiyo na nyemuhe tipa gu sunge nga ga takapandepa Kindo. Rogo gu bete akapita du kumbatayo, ani nika sakapai tipa wai i natungusipai, agu abirĩ sunge gbiati agu aũsunge i namangisunge na ni, na wai surungbaha nakuru. Ni bambataha tie, ani wisigingo gu ndupai amirioni aboro atungusa gu pangbanga nga ga Kindo ti ni, i ki vura kaa raka rogo gu zegino aboro aperesa kina patiyo mbatayo. Wa ani kaa wisigo gu ndupai re, ani sana tirani nga, ‘Tipagine mi atungusa wene pangbanga ti ni fu aboro?’

19. Tipagine ani adegaturani ti ni kuti ga Yesu rugute nga “oni gbáta” Kindo mbata?

¹⁹ Yesu arugu apefuoko nga i “gbáta” Kindo mbata. (Mt. 6:33) Tipagine ani adegaturani ti ni kuti gu rugute re? Si wo mbiko gupai nga ani ima inopa nyakapa Kindo, nga si na nyanyakipaha rogo ga Mbori ringbisapai yo. A wa ani abihe rogo agu akapita naye mbata fu gere, ziazia toro ima yugo badungu wene arengo tipa Kindo yeeye. Ho gu rengo nga ga Kindo azio ngbaduraniyo ni, ani nabi tirani nga si naida ani gbata Kindo mbata.

20. Wai du gu ga Yesu kpiapai nga ga okõokõ mosoro ayugo gupai si adu nga apefuoko nika mangaha kuti gu rugute nga oni gbata ga Mbori Kindo mbata?

²⁰ Yesu aima ino wai apefuoko nika karagapai kuti gako rugute nga ga gbata ga Mbori Kindo mbata. Oni bingo gu gako kpiapai nga ga okõokõ mosoro. (Oni gedi Matayo 13:44.) Rogo kura uru sa gu bamangisunge du rogo gako kpiapai re aamanga gani sunge na ni ki bi okõokõ mosoro na nibasa, ni ki inipa nyakapaha. Ginipai ni amangihe? “Mbiko ngbarago ni ki ta ndu nibagi gani ahe dunduko, ki ningbe gu ati re.” Ginipai ani awirikaha ti ni? Ho ani agbia gu rengo ni nga ga Kindo na ki inipa nyakaha, ani nambupa kura gaani apai tipa ka maa agu apai nga ga Kindo kina rogo gaha ba nga ni bambatapai rogo gaani raka yo. *

21, 22. Wai du ruru asongodi Kindo ayugo na ni nga i nagbata Kindo mbata? Oni funga kpiapai.

²¹ Ruru asongodi Kindo nayugoho rogo mangapai yo nga i nagbata ga Mbori Kindo mbata angianga kina rogo fugo yo gbua ya. I nafu gayo raka, ome, na agu ahe du beyo tipa sunge tungusapa Kindo. Dungu aboro kinaho niima mbupa kura gayo apai tipa ka mangasunge tungusapai ti aregbo dũ. Agu abatungusipa Kindo re dunduko ima bihe nga Yekova nafu maku afu kurii agu aboro naperesapa Kindo mbatayo. Ani bingo kpiapai sa dagba agu namangi bakuru kusayo.

 ²² Avery na Lovenia Bristow amangisunge ni colporteurs (abazakigene) rogo gu papara Amerika du sudiyo bara ti digido gu garã nangia 1920. Fuo agarã kusa, Lovenia aya: “Mi gbiati Avery ima dia dungu agarã na ngbarago kuti ngba sunge abazakigene. Aregbo anidu kinaho ani aainongo wari ani ka gbia marã ni tipa ime-we watadu riahe ya. Ono Yekova anaangera angera fuo rani rogo dungu agene. Ani aambunga sunge abazakigene te. Dedede, ani anaakpanga ti agu ahe ani adu na zingoho te.” Lovenia natingidapa gu kura regbo i aamangasunge Pensacola, Florida yo, ka marã adu nga beyo gbiati riahe ya. Ho i ayego ni ku kporo, i abi kindigi amangu ue na ariahe rogoho na kekepai pati ni nga, “Gere nga nyemuse be gu dungurati nga ga Pensacola.” * Lovenia aberẽkurii gu dungu agarã ri nadihe kutingba sunge tungusapai ti aregbo dũ na ki ya: “Yekova aambunga rani te. Ko aasanga giiko na ani te mbiko gu kido ani adu na ni kutiko.”

23. Gini bipai du mo na ni tipa gu rengo nga ga Kindo mo nagbiaha, na gini diaberã mo nada kutini?

²³ Ani dunduko arengbanga ka tungusapai kina kubani sa te. Agu apai du tipa rani ni bakiakia. Ono tie, ani dunduko si aida ani bihe ni momu ka tungusapai na ngbaduraniyo dunduko. (Koro. 3:23) Bambiko ani nabi gu rengo nga ga Kindo ani nagbiaha na nyanyakipaha, ani na nyemu ka mbupa kura gaani apai dũ tipa ka tungusapa Kindo kina wai rengbe omerani na ni. Anga gure nga gupai mo aida ka mangaha te?

24. Gini nyanyakipa pai Kindo namangihe rogo gi yangara arame re?

²⁴ Vuru gu kama agarã susi, Bakindo aima digo ni digisi agu afugoko nga ga sangbanebi du rogo Matayo 24:14. Na boro ho ko nazi ni ngbaome tipa ni mangihe te. Fuo apefuoko kuru rogo gi zegino nga ga gbangbati re, i na nyemu ka futiyo zaaza tipa ka tungusapai. Gu gayo sunge tungusapai du rogo zegino dunduko re nga gu kpiapai nayugopa du Kristo ho na ome Kindo beko na si nga gu baiiriwopai Kindo namangihe rogo gi yangara arame re.