1, 2. Ya mo padu rogatise na akpakarapai nayugo gupai nga rogatise ima gberã? Mo sakinga rogoyo.

ROGATISE nga gamahe be Yekova. Si rengbe ka sa ga boro raka si du na ngbarago. Wa vura duhe wo, arogatise dunduko nika duadu na akpakarapai rogoho. Si ima rengba ka du wa agu akpakarapai re adigongo te, na kumba gbiati dee ima rengba kaa bihe nga i berewe mbembedi wagu i adu mbata te.

² Ka ngbarani zerenga ya ka si du nga gaani rogatise na akpakarapai rogoho ti kura aregbo. Ono wa vura duhe wo, akpakarapai ayugongo gupai nga gaani rogatise ima gberã te. Zavura agu arogotise naadu na kere akpakarapai ima gbia gene ka mbakada gayo pagume na ki sa gayo rogatise si du ni nyanyakihe. Ngba gini gene?

3, 4. Ginipai rengbe ka manga rogo rogatise ti kura regbo?

³ Rogatise naye na aboro ue ku rogo ba sa du apai tipa yo ni bakiakia, i ni basasa na agu apai i akpinyemu na kini sogoho, aberãpai ni bakiakia, gbiati agene mangaapai a. Berewe a, kumba gbiati dee ima rengba ka ye rogo gu ngbadimo kporo du na gayo asino mangaapai kia. Si nadia regbo gbiati bakere asadatise tipa gupai nga arogotise inidi tiyo na kini gi tiyo wenengai.

⁴ Wa i nikaa dia regbo, kumba na dee ima rengba ka  gbeberã yo kina kuti agu apai nabipa tiyo ni basasa si ki sa yo i du tuturũ ti gayo badiarogatise. Si ima rengba kaa ngera wa ka i ya i naraka gu raka nga ga kparaka. Ginipai rengbe ka undo yo i du mbembedi?

5. (a) Ginipai rengbe ka undo Kristano ni mbedi na gani badiarogatise? (b) Ringbisihe kuti AEbere 13:4, wai du si aida ani bi rogatise?

⁵ Yekova nafu wene arugute nga gu rengbe ka undoro na gamo badiarogatise oni mbedi na ko na ki mbedi na gamo badiarogatise a. (Atambuahe 25:4; Yesaya 48:17, 18) Ko nape gupai furani nga: “Rogatise du ni irisiirisi pai dagba roni dunduko.” (AEbere 13:4) Gu he mo abihe ni irisiirisihe si nga guhe du na nyanyakipaha foro. Mo nabandaha na mo abingo ho na paha taata te. Wo du Yekova aida ani naabi rogatise.

6. Ginipai Matayo 19:4-6 agumbaha furani tipa ga Yekova bipai tipa rogatise?

⁶ Yekova nasigira bambata rogatise. Wiriko nga Yesu aya: “Oni ageda nga ha te? ya gu ko namangi yo ho rago aenge ni ko amangi yo ni kumba na de, ki ya, ‘Bambiko si du boro nihe bani ti ni na nani, ki ka kuti diani; i ue i ki du wa boro sa’? Si du i nadu nga ti ni ue berewe ya, i ki du adu sa. Were gu Mbori akpamia re ka boro kpara nga ha ya.” (Matayo 19:4-6) Kina ti tonatonaha, Yekova aaida gupai nga rogatise du ni gupai na nyeanye kindi. Ko aaida gupai nga aborokporo du mbembedi dagba tiyo na kini gbia ngbarago ti raka kina sa.

7. Wai gu rengbe kumbakuadee na dereakumba ka nyakasa gayo rogatise?

⁷ Ono tie, arogotise areme nagbiatiyo na dungu fudifudiapai berãse yo gbiati mbugo susi gu nidu mbata. Ti kura aregbo gu kparakaapai re nada ni bakerehe si ki sayo i berẽ gupai nga ka gayo rogatise ngbanga te, ni yangaraha i nambutiyo. Ono rugatise na wai Yekova abi rogatise ima rengba ka undo rani.​—1 Yoane 5:3.

8, 9. (a) Gini regbo si aida ani pekefuo gu ga Yekova rugute du tipa rogatise? (b) Wai gu rengbe ani ka yugoho nga gaani rogatise na nyanyakipaha?

⁸ Ga Yekova arugute ti aregbo dũ tipa kina gaani wenepai. A wa ani naima bihe, ko naruga rani nga: “Rogatise du ni irisiirisi pai.” (AEbere 13:4; Batungusipai 5:4) Ka ani pekefuo ga Yekova rugapai zavura ho kpakaraha ni, ani nika gbia undo agbia nirengo.​—1 ATesaroniko 1:3; AEbere 6:10.

⁹ Mbiko wa du gaani rogatise na nyanyakipaha furani, si naida ani ne manga gupai rengbe ka gbarasapaha.  Kuba gure, si naida ani sa gaani pagume na gaani badiarogatise si du ni nyanyakihe. Wai gu rengbe ani ka manga gu pai re?

10, 11. (a) Gini ngbatunga kere kpakarapai du rogo kura aramukporo? (b) Tipagine du gu gene ani afura ngbaha fu gaani badiarogatise ti ni na nyanyakipaha?

¹⁰ Dungu agene du ho rengbe boro ka ye na aimisiri ngbaha fu gani badiarogatise. Ani ima ino gupai nga si aidanga aKristano yawa gayo badiarogatise watadu ka manga ai pai ka imisa kpotoyo te. Wa vura duhe wo, ani ima rengba ka imisa akuarani na gaani afugo. Afugo ima rengba ka da ni aũvura. Dee sa ape gupai nga: “Kumbami ni naarupo re na afugoko. Aserõho arengbanga kadu ti kpotore gbaiga te, ono agu agbegberẽ afugo ko apekaha ti aregbo dunduko nga ‘Mo nga tindiro kurire!’ na ‘Sunge tiro te!’ ima maa aserõ ngbadureyo.” Kumbakudee sa agumba gupai nga, diako naaba pako ti aregbo dunduko na afugori na kini yambu arimo kuriko. Ko aya: “Ka mi gumbanga kina agu apai furi ri naagumbaha fere te. Si nga ndu gupai mi aidanga ka fura nari ti ni ya na si a nga ndu gupai mi asungo ti ni basunge yo da ku giiregbo yo. Yo du rago ni zezeredi ti ye ku kporo yo.” Peka gbegberẽ afugo gbiati agu afugo naba gberãrago ti boro ima maapai areme.

¹¹ Ho kumba gbiati dee agumba gbegberẽ afugo ni dagbatiyo, si nakusa agu aoro kpotoseyo nga gu nadia ngbanga regbo tipa ka hu. Si tie ziazia nga, anga wo Yekova aida kumbakudee gbiati diakumba na mangapai dagbatiyo te. Ono si ima rengba kadu taata mo imisi gamo badiarogatise zanga mo ini aino. Mo ima rengba kaa bihe nga  mo namanga kina wenepai fu gamo badiarogatise, ono wai du gamo badiarogatise abihe? Ka si du nga mo pe gupai imisi gamo badiarogatise, ya mo mo adu na nyemu ka manga ariapai?​—AGaratio 5:15; mo gedi AEfeso 4:31.

12. Ginipai rengbe ka gbarasapa ga gu boro mangi rogatise pabakure na Yekova?

¹² Gu gene mo afura ngbaha fu gamo badiarogatise dagba aboro watadu gu regbo du oni ni saroni, nabi Yekova abi. (Mo gedi 1 Petero 3:7.) Yakoba 1:26 natingida rani na gupai nga: “Ka boro yá dagba roni tigani wẽ, boro idapambori nga ni, ono ni aruga nga mirãni te ni ki ingisi ngbaduni, ga gi boro idapambori re, si ki du gbua.”

13. Gini kura gene rengbe boro ka imisa gani badiarogatise ngbaha?

¹³ Gu kura agene kinaho si aida arogotise niberẽpa  akurayo ngbaha. Ni kpiapai, ginipai rengbe gamo badiarogatise ka berãha ka si du nga mo nadia bakere regbo na kina kura boro kia? Wa vura duhe nga si ima rengba kadu wo tipa kina wene ndupai, wa gu nga nduge gene tungusapai yo watadu ka undo ho du kpakarapai ni, ya mo rago agberã ti gamo badiarogatise? Kura Kristano sa ni diakumba aya: “Si na imisa re aimisa ka bi gupai nga kumbami nadia bakere regbo na kini gbe berãko fuo kura wirina ni dee rogo dungurati. Si nasa re mi naabi tire nga pare anyakanga te.”

14. (a) Gini bangua rengo ani awirikapai tipaha rogo Bambata Pai 2:24? (b) Ginipai si aida ani sana tirani na ni?

¹⁴ Wangia ani aKristano, ani na agu atindiro rirani nga ga avungurani gbiati awirinarani rogo dungurati. Wa vura duhe wo, ho ani amanga rogatise ni, gaani nyanyakipa tindiro nga gaani badiarogatise. Yekova agumba gupai nga kumba “ka kuti diani.” (Bambata Pai 2:24) Si naida padu gaani badiarogatise na ngbarago du na nyanyakipaha furani. Mo sananga tiro nga: ‘Ya mo mi naberãpa gimi badiarogatise na kini fu gimi regbo gbiati gu nyemuse ni aidaha?’

15. Tipagine si aidanga agu aKristano nga arogotise du mbembedi ti ni na gu boro angianga gayo badiarogatise ya?

¹⁵ Ka ani tona kadu mbembedi na gu boro angianga gaani badiarogatise ya, si nika ye na gberãrago ku rogo gaani rogatise. Ani ima rengba ka tona ka berãpa ni nyanyaki na ki sonosi nyemuse koyo du gu boro re ni. (Matayo 5:28) Gu nyemuse re rengbe ka sona na ki saro mo mangi gupai nika ye na wasiro ku rogo gamo rogatise.

16. Gini zinahe Ziazia Kekeapai afuhe tipa rogatise?

¹⁶ Tingbafuo Ziazia Kekeapai ya: “Rogatise du ni irisiirisi  pai,” si gumba gupai nga: Ka ‘barame du nga na birikobiriko pai ti ni ya, bambiko airameteka na airabari Mbori asapa ngbanga yo asapa.’ (AEbere 13:4) Herẽ, “barame” nafura tipa gu kodaba du dagba arogotise. (Asanza 5:18) Wai gu rengbe ani ka yugo irisa tipa gi pagume re zanga birikosihe?

17. (a) Wai gu dungu aboro abi bäri areme? (b) Wai gu si aida aKristano naabi bäri?

¹⁷ Areme, kura aboro nabihe nga gbegberẽpai ho ti zanga du ni ruruse fu gayo badiarogatise te. Si aidanga ani mbu tirani gi sino re du namaapai kurirani te. Yekova ima gumbaha gbaiga nga, ko ima soga wasiwasi kodaba na bäri. (Mo gedi ARomo 12:9; AEbere 10:31; 12:29) Ka ani mangi kodaba na gu boro angianga gaani badiarogatise ya, gure nga ani nika birikosi gaani rogatise. Na ani nika yugoho nga ani airisanga ga Yekova arugute te, na ani nika gbarasapa gaani pagume na ko. Sidu, ani duwa ka ani ne gu bambata diandue nga gu rengbe ka ndu kuti bäri. Gere nakoda ne bibiriko aberã tipa kura boro.​—Eyobo 31:1.

18. (a) Tipagine du bäri ti ni wakina iriso kungbo ambori? (b) Wai gu Yekova abi bäri?

¹⁸ Rogo gu ringara aYisaraere naadu mbata tii ga Moize Rugute, bäri angia kere ingapai wakina iriso kungbo ambori. Gu mbusa naanidu tipaha dunduko angia kpio. (Pa Amotumo 20:2, 10) Wai gu bäri adu wakina iriso kungba ambori? Ka si du nga boro Yisaraere aniirisi kungbo ambori, ni anaakuo gani mozunga kadu niruru ni fu Yekova. Ka si du nga ni animangi bäri, ni anaakuo gani mozunga kadu niruru ni fu gani badiarogatise. (Gate 19:5, 6; Pa Fu Rugute ni Ue he 5:9; mo gedi Maraki 2:14.) Si tie  ziazia nga, bakuru kusayo, Yekova anaabi bäri ni kere ingapai.

19. Ginipai rengbe ka undo rani ani diberã ka zanga manga bäri?

¹⁹ Na ginipai du tipa rani areme? Wa vura duhe nga ani tii ga Moize Rugute te, ga Yekova bipai tipa bäri aˈarianga tihe te. Kina wai ani arengbanga ka iriso kungbo mbori ya, si aidanga ani zanga du niruru rani fu gaani badiarogatise te. (Atambuahe 51:1, 4; AKorosaio 3:5) Ka ani mangi bäri, ani nika ye na wasiro kuti gaani rogatise na kuti gaani Mbori nga Yekova.​—Mo bi gu 26 Rukutu Kekeapai du ti digido gi buku re.

20. Wai gu rengbe tatamana ka undo rogatise?

²⁰ Wai gu rengbe mo ka sa gamo rogatise si du ni nyanyakihe? Fugo Mbori nagumba gupai nga: “Boro nidua bambu be tatamana, ni ki nyakasi he be rugatinapai.” (Asanza 24:3) Bambu ima rengba ka du ni zezerehe na ni kungboho, watadu ni fofoihe, ni wenehe, na ni bandabandaha. Kina gu bangisapai re du tipa rogatise. Boro tatamana namaaberã ni tipa gupai nga gani rogatise du ni bandabandaha, ni wenehe na ni guhe naye na ngbarago.

21. Wai gu rengbe inohe ka sa rogatise si du ni nyanyakihe?

²¹ Ziazia Kekeapai ndu ku mbatayo ka fura tipa gu bambu re nga: “Be inahe ni nihisi avuru bambu yo ti ni, na kikiipa wene ahe dunduko ngba angba nga ga aũkumuko.” (Asanza 24:4) Gupai mo awirikaha rogo Fugo Mbori yo ima rengba ka aria gamo rogatise si du ni wenehe. (ARomo 12:2; AFiripoio 1:9) Ho oni ageda Baibiri ni gbiati na awaraga kina sa wangia oni arogotise, oni sakipai  tipa wai rengbe oni ka mangapai kuti gupai oni awirikaha. Oni ngere tipa agu agene rengbe oni ngbaha ka yugo nyemuse na irisa dagba tironi, gbiati agu agene rengbe oni kadu na weneringise na kini berẽpa akuaroni ngbaha. Mo sana Yekova ko undo ro mo sonosi agu asino nga gu nika nyakasa gamo rogatise na ki sa ro gamo badiarogatise ni kpinyemuro akpi.​—Asanza 15:16, 17; 1 Petero 1:7.

22. Tipagine si aida ani yugu nyemuse na irisa ti ni fu gaani badiarogatise?

²² Si naida ani mangi ai gupai rengbe ani ka mangaha tipa ka mangapai fu gaani badiarogatise na nyemuse gbiati irisa. Fuoho gaani rogatise nika du ni fofoihe na ni nyanyakihe. Na gu nyakipaha anyaka gbe nga, ani nika sa ngbarago ti Yekova.​—Atambuahe 147:11; ARomo 12:10.