WIRIKAPAI 4
Da Nga Mbori?
Natona kina mbembedi ti gu regbo i akusi aboro ti ni, aboro aima digo ni irisi dungu ambori gbiati ade-mbori. Ono tie, Baibiri fura tipa Mbori sa “nga gu ko du ni bahe ti ambori dũ.” (2 Pekapai 2:5) Da nga gu Mbori re? Na ginipai nasako ko du kia ti gu kura ambori dunduko aboro airiso yo? Rogo gi wirikapai re, mo nika wirika gupai gu Mbori re aida mo inihe tipa ko.
1. Rimo Mbori nga da, na ginipai nayugoho nga ko naida ani ini rimoko?
Rogo Baibiri, Mbori nayugo tiko furani. Ko naya: ‘Mi nga Yekova, gere nga rimore.’ (Mo gedi Yesaya 42:5, 8.) Gu rimo nga “Yekova,” i asaha rogo gu Pa-Ebere si awira wa rogo yo nga, “Ko Nasa Tiko ka Du ni gu Boro Ko Aida ka Du Nga Ni.” Yekova naida ani ini rimoko. (Gate 3:15) Wai gu ani aino gipai re? Rogo Baibiri, rimoko yo naima susa 7,000! a Gu rimo nga Yekova, si sa fu kina ndikidi Mbori “ko nga Mbori ngbangbaturũ ari yo na auru kpotosende no.”—Pa Fu Rugute ni Ue he 4:39.
2. Ginipai Baibiri apehe furani tipa Yekova?
Baibiri nagumba gupai furani nga, dagba agu ambori dunduko aboro airiso yo, kina Yekova sa nga ndikidi Mbori. Tipagine duhe ti ni wo? Dungu nduapai gu du ho. Kina Yekova sa du na pagbia beko, na kinako sa ‘nga Bahe ki susi auru kpotosende dunduko.’ (Mo gedi Atambuahe 83:18.) Ko du “na tandu apai dũ,” du rogoyo nga ko na ome tiko ka manga ai gupai ko asia ka mangaha. Ko “nafu ahe dunduko”—haurago gbiati gu unga ahe dunduko du auru kpotosende. (Yugoti 4:8, 11) Na kina Yekova sa, naima duho bakuruyo, na ko nika du nyeanye kindi.—Atambuahe 90:2.
MO WIRIKI KURA DUNGU APAI
Mo wiriki dungu apai tipa gu kparakparapai du bangbanda agu arimo nga ga sunge du kurii Mbori gbiati kparakpara rimoko. Na tifuoho, mo wiriki wai Mbori nayugu rimoko foro na tipagine.
3. Mbori na dungu arimo nga ga sunge riko, ono ndikidi rimoko gbua sa
Tipa ka bi gu kparakparapai du bangbanda agu arimo nga ga sunge na ndikidi rimo, Mo bi gu VIDIO re, na tifuoho, mo ki sakipai tipa gu sanahe ngbe fuoho.
-
Gini kparakparapai du bangbanda agu arimo nga ga sunge wa gu nga “Gbia,” na ndikidi rimo boro?
Baibiri nagumba gupai nga aboro nairiso dungu ambori na dungu agbia. Mo gedi Atambuahe 136:1-3, na tifuoho, mo ki sakipai tipa gi sanahe re:
-
Da nga gu “Mbori du kuri ambori” dũ na “Gbia kuri agbia dũ”?
4. Yekova naida mo ini rimoko na kini mangisunge na ni
Ginipai nayugo gupai nga Yekova naida mo ini rimoko? Mo bi gu VIDIO re, na tifuoho, mo ki sakipai tipa agu asanahe ngbe fuoho.
-
Ya mo mo nabihe nga Yekova naida ani ini rimoko? Tipagine mo abihe ti ni wo?
Yekova naida aboro mangisunge na rimoko. Mo gedi ARomo 10:13, na tifuoho, mo ki sakipai tipa agi asanahe du re:
-
Tipagine du he ti ni ni nyanyakipa pai ka mangasunge na rimo Mbori nga Yekova?
-
Mo ni du wai ho boro atingida rimoro ni na kini mangisunge na ni?
-
Mo nabihe nga wai gu du Yekova ho mo amangasunge ni na rimoko?
5. Yekova naida mo du mbembedi na ko
De du rimori nga Soten rogo gu gbata nga Cambodia aya, ino rimo Mbori asari ri gbia “bakere ngbarago rogo gari raka yo ki susi.” Mo bi gi VIDIO re, na tifuoho, mo ki sakipai tipa gu sanahe ngbe fuoho.
-
Rogo gu vidio re, waigu wirikapai tipa rimo Mbori aundo Soten?
Mbata fu mo da ni bakurea boro, dedede, mo naasada ka ino rimo ni. Mo gedi Yakoba 4:8a, na tifuoho, mo ki sakipai tipa agi asanahe re:
-
Ginipai Yekova aida mo mangihe?
-
Waigu rengbe ino rimo Mbori gbiati mangasunge na ni ka undo ro mo mbedi na ko?
GU KURA ABORO NAPE GUPAI NGA: “Mbori ho gbua kina sa, gbegberẽpai ho du ti yamba ko na ai rimo te.”
-
Ya mo mo idi kuti gupai nga rimo Mbori nga Yekova?
-
Waigu rengbe mo ka saka rogo gupai yo nga Mbori naida ani mangisunge na rimoko?
GINIPAI MO NAWIRIKIHE?
Yekova nga rimo bangisa ndikidi Mbori. Ko naida ani inihe na kini mangisunge na gu rimo re tipa ka mbeda na ko.
Fugöpai
-
Waigu du Yekova kia ti agu ambori dunduko aboro airiso yo?
-
Tipagine si aida ti ni ani mangisunge na rimo Mbori?
-
Ginipai nayugo gupai nga Yekova naida mo mbedi na ko?
MO WETEKE GU KURA APAI
Mo wisigi nduapai bisue nga gu nasarani ani du na gu kido nga Mbori kina ti ni.
“Ya Mo Mbori Ti Ni?” (Gu kekeapai du rogo gaani bangiriba nga ga Internet)
Mo bingo gupai rẽhe arẽ ti ni ani idi kuti gupai nga Mbori aima du ho ti aregbo dũ.
“Da Nambakadi Mbori?” (Ngbaõbambu Sinziri, Buza 1, 2014)
Mo wiriki gu nduapai si aida ani mangisunge ti ni na rimo Mbori ka si vura du vurũ nga ani ainongo wai nzunzu i anaayambaha mbata kusayo te.
“Da Nga Yekova?” (Gu kekeapai du rogo gaani bangiriba nga ga Internet)
Ya mo wai ani ayamba Mbori na nyanyakipaha? Mo bingo ndu gupai rengbe ani ka ya ti ni ndikidi rimoko gbua kina sa.
“Bange Arimo Wai du Kurii Mbori?” (Gu kekeapai du rogo gaani bangiriba nga ga Internet)
a Ka mo aida ka ino kura apai tipa rogo rimo Mbori yo na ndu gupai gu kura sasa afugo Baibiri nadihe ti ni kusayo, mo bi gu Appendix nga A4 du rogo gu sasa fugo Ziazia Kekeapai nga New World Translation of the Holy Scriptures.
