WIRIKAPAI 53
Mo Sia Agu Aũngbarago Nasa Ngbarago ti Yekova
Yekova nga “betedi Mbori” watadu Mbori ngbarago. (1 Timoteo 1:11) Ko naida ani du na ngbarago na kini gbia ngbarago rogo gaani raka yo. Ko na ngbarago ho ani adia regbo ni ti sunge ka ongoda. Rogo gi wirikapai re, ani nika bi wai rengbe ani ka mangasunge na gaani regbo ongoda rogo agu agene rengbe ani ka gbia ngbarago na rengbabepai rogoho—na si a nga gupai nafu ngbarago afu fu Yekova.
1. Ginipai si aida ani tingidihe ho ani asia aũngbarago ni?
Ginipai mo akpinyemu ka mangaha ti regbo gamo ongoda? Kura aboro naida ka sungo zezeredi kporo ti gu regbo re—kini gedi buku, kini gi manzigo, kini bi terevizioni, watadu kaa biko agu ahe du rogo Internet. Agu akurayo naadia gayo regbo ka sungo na abakureayo—kini dakpa mbia, kini guzo, watadu kini ngi ambaro. Ka si vura du nga kina gini gu ngba tirani, si naida ani ini gupai nga gu ũngbarago ani nasiaha ngba ‘angba ti Gbia.’ (AEfeso 5:10) Si ni nyanyakipa pai tipa ani rugutirani na gipai re, bambiko badungu aũngbarago du na agu apai rogoho Yekova naima sogaha, wa gu nga zuu, wasiwasi kodaba, watadu sangbaatoro. (Mo gedi Atambuahe 11:5.) Ginipai nika undo rani ani sia gaani aũngbarago na tatamana?
Ka ani sia agu abakure naima kpinyemu Yekova, i ima rengba kadu na wene maapai kurirani gbiati gaani siapai nga ga aũngbarago. A wa ani awirikihe rogo gu wirikapai nasusi, “gu boro nata na boro tatamana ni adú ni iratatamana a.” Ono tie, ka ani akoda tirani dedede na agu aboro akpingo nyemu ga Mbori arugute ya, “ima azía [rani] wa sa.”—Asanza 13:20
2. Tipagine duhe ti ni ni nyanyakipa pai ani banda bakio gu regbo ani adiaha kuti aũngbarago?
Ka si vura du nga agu aũngbarago ani nasiaha ni kina wenehe, si naida ani du na rubangirise ka zanga dia bakere regbo kuti ni. Ka si adunga wo ya, ani dunga na regbo berani ka manga agu apai du na nyanyakipaha te. Baibiri nangarasa rani nga, ani ‘banda gaani saa tipa manga apai.’—Mo gedi AEfeso 5:15, 16.
MO WIRIKI KURA DUNGU APAI
Mo wiriki wai ka manga wene adiaberã tipa gamo aũngbarago.
3. Ani ne gbegberẽ aũngbarago
Tipagine si aida ani sia gaani aũngbarago ti ni na rubangirise? Mo bi gu VIDIO re, na tifuoho, mo ki sakipai tipa agu asanahe ngbefuo ho.
-
Waigu agu ambaro naadu rogo gu ringara aRomo nadu mbata wakina gu du ti gaani regbo areme?
-
Rogo gu vidio re, ginipai Danny ni wirikihe tipa aũngbarago?
Mo gedi ARomo 12:9, na tifuoho, mo ki sakipai tipa gi sanahe re:
-
Waigu si aida gi veresi re du na maapai kurii gamo siapai nga ga aũngbarago?
Gini bete apai Yekova asogaha? Mo gedi Asanza 6:16, 17 na AGaratio 5:19-21. Tifuo geda mo averesi nibasasa, mo sakipai tipa gi sanahe re:
-
Gini apai i nagumbaha rogo agu averesi re nga gu ngeange gbe rogo agu aũngbarago du areme?
Wai ka sia gamo aũngbarago na tatamana
Mo sananga tiro nga:
-
Ginipai si aida mi mangihe? Ya mo si nakoda agu apai Yekova asogaha?
-
Gini regbo si aida mi mangihe ti ni? Ya mo si nagbarasa pa gu regbo nga ga agu apai du na nyanyakipaha?
-
Ada si aida mi mangihe na yo? Ya mo si nasa re mi du mbembedi ti aregbo dũ na agu aboro akpingo nyemu Yekova ya?
Si nipa bandahe kadu tuturũ ti akpakarapai a wa rengbe omerani na ni. Si nga gu ndupai si aida ani du ti ni tuturũ ti ai agu aũngbarago ani bi gupai nga si arengbanga kadu ni wenehe tipa rani te.
4. Mo mangisunge na gamo regbo ni tatamana
Mo bi gu VIDIO re, na tifuoho, mo ki sakipai tipa gu sanahe ngbefuo ho.
-
Wa vura duhe nga gu wirina nidu rogo gu vidio re naabingo gbegberẽ aũngbarago te, waigu pa mangako sunge na gako regbo ongoda nidu na maapai kuriko?
Mo gedi AFiripoio 1:10, na tifuoho, mo ki sakipai tipa gi sanahe re:
-
Waigu rengbe gi veresi re ka undo rani ani diberã ka ino bakio regbo wai si aida ani dihe kuti aũzambuasitise?
5Mo sia agu aũngbarago du ni wenehe
Wa vura duhe nga bete aũngbarago kinaho nasa gberãrago ti Yekova, badungu weneapai kinaho asanga gberãrago tiko ya. Mo gedi Batungusipai 8:15 na AFiripoio 4:8, na tifuoho, mo ki sakipai tipa gi sanahe re:
-
Gini wene aũngbarago ngba tiro?
Mo ima rengba ka gbia ngbarago ti wene aũngbarago gbiati aũzambuasitise
GU KURA ABORO NAPE GUPAI NGA: “Pai ho gbere ti agu aũngbarago nayugopa zuu, wasiwasi kodaba, watadu sangbaatoro te, ka si du nga mi nabihe ono ka mi amanganga agu apai du rogoho ya.”
-
Ginipai rengbe mo ka pehe?
GINIPAI MO NAWIRIKIHE?
Yekova naida ani sia wene aũngbarago na ki gbia ngbarago ti ni.
Fugöpai
-
Gini aũngbarago si aida aKristano nehe?
-
Tipagine si aida ti ni ani du na rubangirise tipa bakio gu regbo ani adiaha pati aũngbarago?
-
Tipagine mo aida ka sia agu aũngbarago ti ni nasa ngbarago ti Yekova?
MO WETEKE GU KURA APAI
Mo makianga da du si aida ni naasia gaani aũngbarago.
Mo bingo wai rengbe mo ka manga wene adiaberã nibipa aũzambuasitise na agu apai mo amangaha ti regbo ongoda.
“Ya Mo Gaoni Zambuasitise Naundo Roni?” (Ngbaõbambu Sinziri, Tanvuo 1, 2011)
Rogo gu pangbanga yo nga “Mi Ambu Soga Pusi Aboro,” mo bingo ndu gupai kumba amangi ariapai ti ni rogo gako siapai nga ga aũngbarago.
“Ziazia Kekeapai Rengbe Arengba ka Aria Gaoni Raka” (Ngbaõbambu Sinziri, Marungu 1, 2010)
Mo bingo wai nagude amanga diaberã rogo tatamana yo nibipa aũngbarago nga gu du na agu apangbanga rogoho nayugo pa gu toro nga ga zegino.
