Yesu nga Rii gu dungurati nga ga aKristano. (AEfeso 5:23) Areme, rogo ga Yesu bangiriba ngbangbaturũ yo, ko nangbembatayo fu apefuoko auru kpotosende vurube ‘gu kangara moyambu du na tatamana.’ (Mo gedi Matayo 24:45.) Wa duhe nga Yesu nitiko du nasia gu “moyambu” re, ko na bete pagbia—ono ko nanye ni ga Kristo moyambu na kini undo awirina Kristo. Da du nga gu moyambu re? Wai du ko angerafuo rani?

1. Da nga ‘gu kangara moyambu du na tatamana’?

Yekova aima digo nimangisunge na kumba watadu umba badona akumba tipa ka fu arugapai fu gako aboro. (Maraki 2:7; AEbere 1:1) Tifuo kpio Yesu, amokedi gbiati abaakumba Yerusarema yo atona ngbembatayo. (Amokedi 15:2) Nipeka yo fuo gu kpiapai re, areme umba badona nga ga abaakumba—nga Riigbu Bipasunge nga ga aDezire Yekova—nafu gu riahe nga ga toro gbiati arugapai tipa sunge tungusapai. Gi badona re nga ‘gu kangara moyambu du na tatamana, [Yesu] amoi yo.’ (Matayo 24:45a) Agu aboro dunduko du rogo Riigbu Bipasunge, i nga agu aKristano du ni mbedimbedi yo ni toro nga agu yo nangera kumbatayo tipa ka zogarago na Kristo rogo gu Kindo nga ga ngbangbaturũ ho gayo raka nika digo ni auru kpotosende ane.

2. Gini ariahe nga ga toro kangara amoyambu akusaha?

Yesu ape gupai nga ruru kangara moyambu nika fu ‘ga [akurayo aKristano] riahe fu yo ti ragoho.’ (Matayo 24:45b) A wakina gu riahe ani arihe si undo kpotorani si du nyanyaki zanga kaza, kina wo agu ariahe nga ga toro du nga agu arugapai du rogo Fugo Mbori yo—afu gu ome furani ani aidaha tipa ka nye ni ruru rani fu Yekova na kini mangi gu sunge Yesu afuhe furani ani mangihe. (1 Timoteo 4:6) Ani nagbia agu ariahe nga ga toro re vurube adunguratise, bakere adunguratise nga ga uru sa, gbiati bakere adunguratise nga ga arame biata, kodihe na agu abuku du mburuhe rii Baibiri, gbiati agu avidio naundo rani ani gi tirani na ga Mbori ringbisapai na kini nyakasi gaani pabakure na ko.

 MO WIRIKI KURA DUNGU APAI

3. ga Yekova aboro du wa ka i du ni mbakadimbakadi yo

Tii ga Yesu arugapai, Riigbu Bipasunge namba-kada pa gu sunge nga ga aDezire Yekova. Kina gu bangisa mbakadapai re nadu dagba agu aKristano nadumbata. Mo bi gu VIDIO re.

Mo gedi 1 AKorindo 14:33, 40, na tifuoho, mo ki sakipai tipa gi sanahe re:

• Waigu agi averesi re ayugo gupai nga Yekova naida gako aboro du ni mbakadimbakadi yo?

4. Ruru kangara moyambu nambakada gene gaani sunge tungusapai

Tungusapai nga gu nyanyakipa sunge agu aKristano nadumbata amangihe. Mo gedi Amokedi 8:14, 25, na fuoho, mo ki sakipai tipa agi asanahe re:

• Dagba agu aKristano nadumbata da nanaafu arugapai tipa sunge tungusapai?

• Waigu Petero gbiati Yoane amangipai kuti agu arugapai nga ga akurayo amokedi?

Tungusapai nga gu nyanyakipa sunge Riigbu Bipasunge ambakada gene wai ka mangaha. Mo bi gu VIDIO re.

 Yesu anyakasi wai nyakipa tungusapai. Mo gedi Marako 13:10, na tifuoho, mo ki sakipai tipa agi asanahe re:

• Tipagine du sunge tungusapai ti ni na nyanyakipaha fu Riigbu Bipasunge?

• Tipagine ani aida ‘gu kangara moyambu du na tatamana’ mbakadi gene gi sunge namanga rogo zegino dunduko re ti ni?

5. Ruru kangara moyambu nafu arugapai

Riigbu Bipasunge nafu arugapai fu aKristano rogo zegino dunduko. Wai du si adiaberã tipa gu rugapai si nika fuhe? Mo bingo wai gu riigbu bipasunge nga ga agu aKristano nadumbata amangi gipai re. Mo gedi Amokedi 15:1, 2, na tifuoho, mo ki sakipai tipa agi asanahe re:

• Ginipai nakusi tagbagapai dagba agu aKristano nadumbata?

• Da du Pauro, Barunaba gbiati kura aboro andu fuoni tipa ni mbakadi gupai re?

Mo gedi Amokedi 15:12-18, 23-29, na tifuoho, mo ki sakipai tipa gi sanahe re:

• Mbata fu manga diaberã, ginipai gu riigbu bipasunge nadumbata awisigihe ho i aagbata ga Mbori rugapai ni tipa gupai re?—Mo bi averesi 12, 15, na 28.

Mo gedi Amokedi 15:30, 31 na 16:4, 5, na tifuoho, mo ki sakipai tipa agi asanahe re:

• Waigu agu aKristano nadumbata amangipai kuti agu arugapai riigbu bipasunge afuhe?

• Waigu Yekova afu maku kurii gayo giasangba?

Mo gedi 2 Timoteo 3:16 na Yakoba 1:5, na tifuoho, mo ki sakipai tipa gi sanahe re:

• Wari du Riigbu Bipasunge angerani tipa arugapai ho i amanga adiaberã ni areme?

 GINIPAI MO NAWIRIKIHE?

Riigbu Bipasunge nga ‘gu kangara moyambu du na tatamana’ Kristo asiaha. Si nafu arugapai gbiati riahe nga ga toro fu aKristano auru kpotosende dunduko.

Fugöpai

• Da du nasia ‘gu kangara moyambu du na tatamana’?

• Waigu Riigbu Bipasunge angerafuo rani?

• Ya mo mo idi kuti gupai nga Riigbu Bipasunge nga ‘gu kangara moyambu du na tatamana’?