Yekova naida ani wirikapai tipa gu gako aborokporo du ngbangbaturũ yo. Agu aborokporo re nakoda amaraika nga agu yo i ayambayo nga “awiri Mbori.” (Eyobo 38:7) Ginipai Baibiri apehe tipa amaraika? Gini maapai du yo na ni kurii aboro? Na ya mo amaraika dunduko nga papara ga Mbori aborokporo?

1. Ada nga amaraika?

Yekova akusi amaraika mbata fu ko mbakadi kpotosende. Wakina ko, i nga agu atoro ka ani abingo yo ya naraka ngbangbaturũ yo. (AEbere 1:14) Amaraika ima du ni badungu yo gbe, na i na asinoyo ni bakiakia. (Yugoti 5:11) I ‘namanga sangba, [Yekova] ki nigi fugoko.’ (Atambuahe 103:20) Ti kura aregbo bakuru kusayo, Yekova anaakeda amaraika i peke gako apangbanga kini undo kura aboro na kini batasi yo. Areme, amaraika nanungusa aKristano i undo agu aboro naida ka wirikapai tipa Mbori.

2. Da nga Satana na gako adaimona?

Bete kura amaraika aanyenga ni ruruyo fu Yekova te. Gu bambata maraika nasamungu ‘nga gu ko i aniya ti ko, Bakitingbanga nga Satana, nga banangi aboro kpotosende yo dunduko.’ (Yugoti 12:9) Satana aaida ka zogarago kurii aboro, sidu, ko adu na maapai kurii bambata avungurani na kusa, zavura kura amaraika akoditiyo na ko rogo gi samungu re. I nayamba agu amaraika nasamungu re nga adaimona. Yekova ado yo kusayo ngbangbaturũ yo ku auru kpotosende no, na i nika gbarasayo agbarasa. Mo gedi Yugoti 12:9, 12.

3. Waigu Satana na gako adaimona aasada ka nangarani?

Satana na gako adaimona nananga dungu aboro vurube sino adaimona watadu sangba atoro, nga gu gbegberẽ mangapai nga ga asada ka fura na atoro. Ni kpiapai, kura aboro nandu fuo aboro birĩsoroka na kerekuru, agumba sangbaatoro, gbiati aboro ngua. Gu kura aboro nagbata gu gene husa nga gu du na sangbaatoro rogoyo. I nananga kura aboro a i idi kuti gupai nga i ima rengba ka fura na kpikpi aboro. Yekova na zarani nga: ‘Ka oni nindú nga fuo agumba sangbaatoro na abinza ya.’ (Pa Amotumo 19:31) Ko nafu gi zahe re fu rani tipa ka banda rani be Satana na adaimona. I nga avura Mbori, na i naida ka imisa rani.

 MO WIRIKI KURA DUNGU APAI

6. Mo du na diabese rogo gu vura mo asoho kuti Satana na gako adaimona

Satana nazoga adaimona. Ono gu bakumba maraika nga Mikaere du gu kura rimoko nga Yesu nangbe kumbatayo fu ruru amaraika. Ya mo Mikaere na bakere ome ti ko? Mo gedi Yugoti 12: 7-9, na tifuoho, mo ki sakipai tipa agi asanahe re:

• Da du na bakere ome ti ni? Mikaere na gako amaraika watadu Satana na gako adaimona?

• Ya mo mo naberãha nga si naida apefuo Yesu gunde be Satana na gako adaimona?

Mo ima rengba ka diabe gu vura mo asoho kuti Satana na gako adaimona. Mo gedi Yakoba 4:7, na tifuoho, mo ki sakipai tipa gi sanahe re:

• Waigu mo narengbe ka bandatiro be Satana na gako adaimona

 GINIPAI MO NAWIRIKIHE?

Ruru amaraika naundo rani. Satana na gako adaimona nga avura Yekova, na i namangasunge na sangbaatoro tipa ka nanga aboro.

Fugöpai

• Waigu ga Yekova amaraika aundo aboro i wirikipai tipa ko?

• Da nga Satana na gako adaimona?

• Tipagine si adanga wiri kodatise du ti ni dagbarani na gupai nga ga sangbaatoro ya?