Ka mo vura asada tiro aasada gbe ka raka na ngbarago na gamo aborokporo, apai kinaho rengbe ka manga rogo raka yo nga gu rengbe ka fuda roni gbe. (Batungusipai 9:11) Mbori naundo rani aundo ho du ani ni rogo kpakaraapai. Ka oni ndu kuti gi sangba Ziazia Kekeapai du kusende re na gamo aborokporo, oni rengbe arengba ka hi kereapai.

GUPAI ZIAZIA KEKEAPAI AGUMBAHA: “Oni bá agu apai nafuda roni ku auru ko yo; mbiko ko naberã pa roni.” (1 Petero 5:7) Oni tingidi gupai ti aregbo dũ nga anga Mbori du si aida i bira ko tipa gu kereapai naye sa rani te. (Yakoba 1:13) Ka oni mbedi na ko, ko nika undo roni aundo ngba bawene gene. (Yesaya 41:10) “Oni úka kpotoroni yo ku bara bangiriko.”​—Atambuahe 62:8.

Oni rengbe ka gbia wasa a ka oni ageda Ziazia Kekeapai kini wisigihe na aˈuru dũ. Ka oni amangaha wo, oni nika bi wai abi nzunzu Yekova ‘afu wasa furani rogo gaani agberãngbi yo dunduko.’ (2 AKorindo 1:3, 4; ARomo 15:4) Ko kidohe nga ko nika fu guhe furoni nga “gu zereda nga ga Mbori nagasi rugatinapai dunduko.”​—AFiripoio 4:6, 7, 13.

GUPAI RENGBE MO KA MANGAHA:

• Mo kpari fu Yekova ko undo ro ka mo zinginga ya na mo niberẽ wenengai

• Mo berẽkurii apai wenengai nga gu rengbe mo ka mangaha na mo ki sia gu ngba gbe

GUPAI ZIAZIA KEKEAPAI AGUMBAHA: “Berã ngangarã boro nabi inahe; tu iratatamana nagbata inahe a.” (Asanza 18:15) Mo asadi ka ino agu arengo duho tipa gupai namangi dunduko. Mo asadi ka ino gupai aborokporo ni basasa dunduko aidaha. Mo fura na yo. Mo gi yo.​—Asanza 20:5.

Na ka si du nga gamo boro kpi? Ka mo gundenga ti yugo gamo nunga ya. Mo tingidi gupai nga zavura Yesu, ko aima ‘kpara ni aume.’ (Yoane 11:35; Batungusipai 3:4) Si ni nyanyakipa pai a mo niongodi na kini ra wenengai. (Batungusipai 4:6) Si rengbe ka undo ro mo hi gu kerepai mangi ro re.

GUPAI RENGBE MO KA MANGAHA:

• Mbata fu kerepai mangi, si naida sinoro du nga kaa fura wenengai na gamo aborokporo. Ho kerepai nika manga ni, si nika du adu fuyo taata i fura na mo

• Mo fura na agu aboro ngbatungapai wa gure amangiyo

GUPAI ZIAZIA KEKEAPAI AGUMBAHA: “Badia ngbanya nakpi nyemu badiani na arago dunduko.” (Asanza 17:17) Abadiangbaro rengbe ka ida ka undo ro, ono ka i ainongo gupai ka i mangihe ya. Ka mo henga gumba gupai fuyo mo aidaha nzunzu ya. (Asanza 12:25) Na berewe, mo gbata gu undo nga ga toro be agu aboro girogo Ziazia Kekeapai yo wenengai. Gu rugute nga ga Ziazia Kekeapai i ka fuhe foro rengbe arengba ka undo ro.​—Yakoba 5:14.

Mo nika gbia undo agbia ka mo asungo dedede na agu aboro du na ndikidi idapase kuti Mbori na kini kido kuti gako akidohe. Mo nika gbia bakere wasa agbia a ka mo angarasa kura aboro. Mo gumbapa gamo idapase kuti Yekova na gako akidohe fuyo. Mo fu tiro sa undo agu aboro du rogo zingo, na ka mo kparanga tiro ti agu aboro nakpinyemu ro na kini berẽ paro ya.​—Asanza 18:1; 1 AKorindo 15:58.

GUPAI RENGBE MO KA MANGAHA:

• Mo fura na bawene bakureamo na ki mbu ní ní undo ro

• Mo gumbapa gamo azingo agumba funi ziazia