Ho Yekova akusi gu mbakadapai ni nga ga ramukporo, ko amoi avunguagude kurii awiriyo. (AKorosaio 3:20) Gumo nga vungugude, gamo sunge du nga ka sonosa wiro u nikpinyemu Yekova na u sono ni wene boro. (2 Timoteo 1:5; 3:15) Si naida mo ini gupai aino a du kpoto wiro yo. Gu wene kpiapai mo amaaha furu rengbe ka undo ru gbe. Mo rengbe ka yugo Fugo Yekova fu wiro wenengai kinagu ka mo rimisihe ku kpotoroyo mbata.​—Atambuahe 40:8.

GUPAI ZIAZIA KEKEAPAI AGUMBAHA: “Aboro dunduko i ipisi tiyo ka gia pai, ki rõasi tiyo tipa gumba pai.” (Yakoba 1:19) Si naida mo sa awiro ka i nagundenga ti fura na mo ya. Na i ini gupai nga mo na nyemu i fura na mo ho i aida ka fura ni. Mo sa apai si du taata fuyo i nigumba gayo apai foro. (Yakoba 3:18) Ka i abi gupai nga mo nafura fuyo arakaya watadu mo nika zinga azinga ka i gumba kurapai foro, i gumbanga gayo apai foro nzunzu te. Mo nimangi awiro ni zerangbaduse, na mo nipe gupai fuyo kindi nga mo nakpinyemuyo akpi.​—Matayo 3:17; 1 AKorindo 8:1.

GUPAI RENGBE MO KA MANGAHA:

• Mo di regbo tipa awiro ho i aida ka fura ni na mo

• Mo nifura na awiro dedede, angianga kinaho pai akura ni ya

GUPAI ZIAZIA KEKEAPAI AGUMBAHA: “Gu ni nagia pai ni abi wenepai.” (Asanza 16:20) Ti kura aregbo, si naida mo wisigi gupai awisigo wenengai awiro nagumbaha tipa ka rugatiro wenengai na gupai namanga. Dungu paranga aboro ini abiapai watadu ka gumbapai kia ti gu du kpotoyo yo. “Ka boro karaga pai mbata fu gia pai, si nga pa mungo na zee fu ni.” (Asanza 18:13) Ka mo zinginga ni ipo ya.​—Asanza 19:11.

GUPAI RENGBE MO KA MANGAHA:

• Mo za tiro ti gupai nga ka defugo ngba wiro watadu ka zinga, ka wiro vura kaa gumba kina ginipai vurũ

• Mo asadi ka ino wai mo adu ho garãro adu ni wa ga wiro na wai mo anaabi apai

GUPAI ZIAZIA KEKEAPAI AGUMBAHA: “Ako wire, mo gí ga bamo rugapai, ka mo mbú nga ga namo yugopai ya.” (Asanza 1:8) Yekova fu gu sunge nga ga raba agude fu bagude na nagude a. Oni raba awironi i niirisi roni na kini gisangbaroni. (AEfeso 6:1-3) Ka avunguagude adunga “na berã sa” ya, agude nainoho aino. (1 AKorindo 1:10) Ka oni du na kango dagbaroni, ka oni furanga barabangiri agude ya, bambiko mangaha wo rengbe arengba ka zogosa gu irisa du yo na ni tipa roni.

GUPAI RENGBE MO KA MANGAHA:

• Oni sakipa wai oni kaa ruga awironi na oni ki dakuti pai

• Ka mo du na berã kia ti gu nga ga gamo badiarogatise nibipa raba agude, mo asadi ka rugatiro na gani bipai

GUPAI ZIAZIA KEKEAPAI AGUMBAHA: “Oni sónosi gude rogo gu pai ka ni ndu ngba ha.” (Asanza 22:6) Wene yugopai fu agude ayengo nisaha te. Si naida oni mangi mbakadapai amanga tipa raba awironi, na kini ruguyo. (Atambuahe 127:4; Asanza 29:17) Anga rugute nga kina kpata te, ono si naida oni undo awironi i rugutiyo na ndu gupai oni azayo ti ni ti kura apai. (Asanza 28:7) Oni raba yo a i kpinyemu Fugo Yekova na kini mangisunge na gaha arugute. (Atambuahe 1:2) Gipai re nika undo yo i du na wene sangbakpotoseyo.​—AEbere 5:14.

GUPAI RENGBE MO KA MANGAHA:

• Mo sa awiro i nibi Mbori ni gu boro rengbe yo arengba ka kido kutini

• Mo undo yo i ini gu kereapai si aida i nehe na i ki bandatiyo ti ni, wa agu du rogo Internet. Mo undo yo i ini wai ka bandatiyo be agu akumba nagberesapa agude