FU PARANGA ABORO
10: Padu ni Irarengo
GUPAI SI AYUGOHO
Agu aboro nga airarengo nasa gupai nga avungu yo kido kuti yo, abakureayo, gbiati gayo abangere kuriisunge. I naraka ringbisihe kuti arugute, kini banda gayo akidohe, na kini pe rengo ti aregbo dũ.
NDU GUPAI DUHE TINI NA NYANYAKIPAHA
Rogo dungu apai yo, bakio gu ranirii mo ni kaa gbiaha nika bipa wai aboro nikaa kido kuti ro wa regbo nikaa susa.
“Gu wene gene rengbe mo ka sa gupai ngbaha nga avunguro du na kido kuti ro nga ni yugo mo gupai nga mo ima ngarã na mo namangapai amanga, angianga kina ho sa du mo ni na yo ya, ono ho adunga yo ni a ya.”—Sarahi.
BANGUA RENGO NGA GA BAIBIRI: “Oni ásadi tironi.”—2 AKorindo 13:5.
GUPAI RENGBE MO KA MANGAHA
Singia mo naida i du na bakere kido kuti ro watadu ka gbia gu kido i adu na ni mbata kuti ro, agi aberãpai du re ima rengba ka undo.
Mo naape rengo. Ho mo ape ziree ni, si nasa gupai nga ka aboro kidonga kutiro berewe ya. Ho mo ape rengo ni na kidu gbaiga—gbe, tipa agu aingahe mo namangihe, si nasa gupai nga aboro du na kido kutiro.
“Si taata boro pe rengo ho apai andu ni wenengai. Ono ho mo ape rengo ni tipa agu apai rengbe ka sa ro mo naangera wa gbegberẽ boro ima rengba ka sa gupai nga aboro kido kutiro gbe.”—Caiman.
BANGUA RENGO NGA GA BAIBIRI: Nakpi “nyemu ka sunga na rurupai rogo apai dunduko.”—AEbere 13:18.
Mo du ni gu boro aboro akido akido kutini. Rogo gu kura wisigopai sa i amangihe Amerika yo 78 rii kama nga ga agu aboro wirikipai gbe tipa sunge na aboro, ape gupai nga du gu boro aboro akido kutini nga “birĩ sa dagba gu nyanyaki pa abirĩ yo du biata si aida boro du na ni ho ni atona vovo sunge.” Wirika wai ka du ni gu boro aboro akido kutini awere, nika undo ro ho mo nika sona ni.
“Avungure naaino ho aino ho mi amanga gimi asunge ni nitire zanga i naatingida re atingida nga mi mangihe. Ho kina mi atona mangapai ni nitire zanga i ya mi mangihe, i nadu na bakere kido kuti re.”—Sarah.
BANGUA RENGO NGA GA BAIBIRI: “Mi . . . zaza mbiko ga giasangba, niini he ya mo amanga ha susi gu mi agumba ha.”—Firemona 21.
Mo du na zerangbaduse. Anga zerangbaduse wa wai boro naasona aboro dunduko kini bi ni te, si nadia regbo adia aboro ini gani sonakumbatayo rogo mangapai na rogo berãpai yo.
“Anga bangisa mangapai du gbua sa rengbe ka sa avunguro gbiati kura aboro i du na kido kuti ro te. Ono mo ima rengba ka sonosaha yeeye ka mo amanga gu pai tipa gbanga regbo nga gu nika sa gupai nga aboro du na kido kutiro.”—Brandon.
BANGUA RENGO NGA GA BAIBIRI: “Oni úkadi . . . gbanga hipai.”—AKorosaio 3:12.
