YA MO mo bingo gupai nga badungu aboro areme naida i naamangapai na yo ngba kparakpara gene? Ka i vura mangapai na yo ngba kparakpara gene, i naberã gupai kindi nga si naida i fu kura dungu amomu kindi fuyo. Agu aboro naberã ngba gi gene re nga airagbangbati na i na tambuahe tipa guhe du beyo te. Gi re du nga gupai Baibiri apehe nga wo du aboro nika du ti yangara areme.—2 Tim. 3:2.

Rengo ngaha nga, aboro aima digo nidu na gbangbati tiyo. Ni kpiapai, aAdamu na Eva aaida ka du na gu rengo beyo nga ka sia gupai i aidaha na gu i asogaha, na ani dunduko narungo mbiko gayo diaberã. Gu kura kpiapai nga ga gu bakindo aYudo nangia Uziya. Ko aberẽ gupai nga ko ima rengba ka zo guzuguzu fuõngua yekaru yo, ono ko aadunga na rengo beko ka mangaha wo te. (2 Peka 26:18, 19) Wakina gure a, aFarusi na aSadoke aaida gupai nga Mbori ni mangipai na yo ngba kparakpara gene bambiko i aenge ti Abarayama.—Mt. 3:9.

Ani naraka dagba agu aboro nakpi kina nyemu tiyo, na gayo mangapai ima rengba ka du na maapai kurirani. (Gara. 5:26) Ani ima rengba ka tona kaa berã nga ani naida na kura kparakpara amomu, watadu i naamangapai na ani ngba kparakpara gene. Ginipai rengbe ka undo rani tipa ka ani dunga wa yo ya? Si naida ani rugutirani na gupai Yekova aidaha tipa gipai re. Bangua arengo ue nga ga Baibiri nika undo rani.

Yekova du nadiaberã tipa guhe rẽ tipa ani gbiaha. Ani bingo akpiapai.

• Yekova naida diakumba ni irisi kumbari airisa na kumba kini kpinyemu diako. (Ef. 5:33) Yekova nape gupai nga, si nadia arogotise naayugo gu nyemuse du dagba kumba na dee sa fu kina  gani badiarogatise. (1 Kor. 7:3) Berewe a, si naida agude naagiasangba avunguyo, na avunguagude kini ngere angerafuo awiriyo na kini yuguhe ayugo fuyo nga i ima kpinyemuyo.—2 Kor. 12:14; Ef. 6:2.

• Yekova nape gupai nga, ani niirisi gaani abaakumba airisa rogo dunguratise tipa gu nyanyaki sunge i amangaha. (1 Tesa. 5:12) Ono tie, rengo ho du beyo tipa ka du na maapai kurii awirina te.—1 Pet. 5:2, 3.

• Mbori ima fu gu pagbia fu abazogo nga i naadia marã ngbeti adia be aboro na aboro kini irisiyo airisa.—Rom. 13:1, 6, 7.

Yekova afu ahe furani ni bakerehe susi gu ani rẽ na ni. Bambiko gupai nga ani nga aboro ingapai, ani ima rẽ ka kpi. (Rom. 6:23) Ono wa vura duhe wo, Yekova ima fu badungu amaku furani mbiko gako bangabanga nyemuse koyo du ani ni. (Tam. 103:10, 11) Ko nafu agi amaku re dunduko furani na agu kuraha mbiko gupai nga ko ima kpinyemu rani ni bakerehe na ko na bakere weneringise, angianga mbiko gupai nga ani ima rẽ tipaha ya.—Rom. 12:6-8; Ef. 2:8.

Ani du na rubangirise ka zanga kaa berã wa agu aboro du rogo gi ga Satana zegino re ya. Ani ima rengba ka tona kaa berã gupai nga parani ima nyaka kisusi kura aboro zanga ani inihe. Yesu aima yugo wai rengbe gu berã re ka tona ngba taata gene ni manga ko sunge na gu kpiapai nga ga agu abamangisunge i atumo yo na adenario. Kura abamangisunge atona sunge kina boro wiso na ki mangihe rogo fofoi uru da ku nyemu; aguyo ki mangisunge tipa saa gbua sa. Gu bambata badona yo aberẽ gupai nga i narẽ tipa i fu marã fuyo ni kikiihe mbiko gu sunge i aamangaha. (Mt. 20:1-16) Na gi kpiapai re, Yesu ayugu gupai nga, si naida apefuoko rengbe kina be guhe Mbori afuhe fuyo.

Ani du ni afu tambuahe na ka ani naabingo ho nga si naida aida aboro naafu ahe furani ya. (1 Tesa. 5:18) Ani wiriki gu kpiapai nangia ga gu mokedi nangia Pauro nga guko naasananga agu awirina nadu Korinda yo tipa ahe ya wa si avura du vurũ nga ko adu na kina rengo beko tipa ka mangaha wo. (1 Kor. 9:11-14) Si naida ani du na  tambuahe tipa agu amaku ani agbiaha na ani ki zanga kaa bihe nga si naida kura aboro naafu ahe furani.

Mo du na umbasitise. Ho boro aberã kina pa tini ni gbe, ni ninaatona kaa berã gupai nga si naida ni gbia dungu ahe kisusi gu du beni. Ka ani du na umbasitise, si nika undo rani tipa ka ani berẽnga ngba gu iraira gene re ya.

Gu nebi nangia Daniere nga wene kpiapai nga ga gu boro nadu na umbasitise. Ko aye rogo nyanyakipa ngbadimo kporo, ko ki du ni bawene ko, kidu na bakere inohe, na kidu na dungu abirĩ tiko. Ko aima rengba ka bi tiko nga ko ima rẽ tipa kparakpara mamu. (Dan. 1:3, 4, 19, 20) Wa si avura duwo, Daniere anye na umbasitise, na gi sino re asa gupai nga Yekova kpinyemuko.—Dan. 2:30; 10:11, 12.

Si naida ani ká gu toro nga ga gbangbati niima hi rogo gi zegino re. Kuba gure, ani nindu nga andu kindi kumbatayo kaa gbia ngbarago ti ai gu maku Yekova nika fuhe furani mbiko gu gako weneringise arẽnga aboro tipaha.