GU KEKEAPAI DU TIPA WISIGOHO 8
BIA 130 Ani Mbupai fu Akuarani
Waigu Rengbe Oni ka Mbupai wa Yekova?
“Wa Gbia avu roni, kina wo oni ka manga.”—KORO. 3:13.
GU MEMEAPAI DU ROGO GI KEKEAPAI RE
Gi kekeapai re nika sakapai tipa agu adiandue rengbe ani ka mangaha tipa ka mbupai fu gu boro imisi rani.
1-2. (a) Gini regbo rengbehe gbe kadu ni kpakarakpakaraha furani ani mbupai fu boro? (b) Waigu Denise ambupai?
YA MO mo naabihe ni mbumbuhe tipa ka mbupai fu kura aboro? Si ni mbumbuhe fu dungu rani, gu susi gbe nga ho boro ape gupai ni watadu ka manga gupai imisi rani nikerehe. Ono tie, kura apai kinaho rengbe ani ka mangaha tipa ka mbu du na bakere zinga watadu imisiri ngbaduse na ki mbupai fu kura aboro. Ni kpiapai, oni bingo gu pangbanga du tipa gu kura wirinarani ni dee sa du rimori nga Denise, a nga guri nayugu bakere mbupai. Rogo 2017, Denise na gari aborokporo andu ka bi gu vovo Rii-basunge Nga ga Zegino nga ga aDezire Yekova i azakihe. Ho i aaga ni ku kporo yo, gu kura bakama tarambiri afõ gayo tarambiri. He ama Denise mbiko gi béno namangi re. Ho ri azingi ni rogoho, ri abi gupai nga awiiri aima hõ nikerehe na kumbari nga Brian aima kpi. Ho Denise ninaaberã pa gu regbo re ni, ri naape gupai nga, “Rago aima gberã tire nikerehe na ka mi ainongo gupai ka mi mangihe ya.” Kusa, ri aye ka ino gupai nga ti regbo gu béno re, gu bakama tarambiri re aakpingo buda watadu ka dia kere angua kutii kpotoko yo te, na anga ko aangana gako terefuni watadu gu kura ahe nga gu nagbe berãko kusayo te. Sidu, ri akpari fu Yekova tipa zereda.
2 I azi gu bakama tarambiri re na ki ndu na ko ku ngbangayo bambiko ko aimi kumbari. Ka i asaringbanga ko nga ingahe adu kina tiko, ka i aima bako ku bambukiso yo. Ono tie, kura boro ngbangayo ape gupai fu Denise nga gupai ri nika pehe ti regbo gu ngbanga re nika du na maapai kurii gu bakama tarambiri re singia i ba ko ku bambukiso yo watadu ka i banga ko ya. Denise nape gupai nga: “Mi abi tire wa ka i ya boro kafu agu agire i arungu gimi aro na ni na ki uka bakere tikpo ku bangirihe yo, bambiko si aaida mi fura tipa gu kere regbo nga gu namangi rogo gimi raka yo.” Fuo bete aposo kusa, Denise asungu bambu ngbangayo tipa ka fura barabangiri gu kumba naimisi gari aborokporo nikerehe re. Ginipai ri apehe? Denise asana basapungbanga tipa ko yugu inopai fu gu kumba re. b Ho ri anyasi fugo ni, gu basapungbanga re asu na kpee. Ko ape gupai nga: “Vuru agu agarã yo 25 mi namangisunge ni basapungbanga, mi aagianga pai wa gere mbata rogo gimi bambu ngbanga ane te. Mi aabingo agu aboro pai nagbia gayo aborokporo i ni sana re mi yugu inopai fu gu boro imisi gayo aborokporo te. Mi aagianga afugo nyemuse na sanahe tipa mbupai wa gure te.”
3. Ginipai naundo Denise tipa ri mbupai?
3 Ginipai naundo Denise tipa ri naambupai? Ri aberẽ kuriipa wai Yekova ambupai. (Mika 7:18) Ho du ani ni na bakere tambuahe tipa wai Yekova nambupai furani, si naundo rani ani mbupai a fu kura aboro.
4. Ginipai Yekova aida ani mangihe? (AEfeso 4:32)
4 Yekova naida ani nimbupai fu kura aboro kina wai ko nambupai furani. (Oni gedi AEfeso 4:32.) Ko naida ani du regerege ka mbupai fu agu aboro naimisa rani. (Tam. 86:5; Rk. 17:4) Rogo gi kekeapai re, ani nika sakapai tipa apai biata nga gu rengbe ka undo rani tipa ani naambupai ni bakerehe.
KA MO ÕKO NGA GAMO BIPAI NIBIPA GUPAI GBERẼ TIRO YA
5. Ringbisihe kuti Asanza 12:18, waigu rengbe ani kadu ho boro naimisi rani ni?
5 Gupai boro apehe watadu ni amangaha ima rengba ka imisa rani nikerehe ka si du nga gu boro re nga mbembedi bakurearani watadu gaani borokporo. (Tam. 55:12-14) Ti kura aregbo, ani ima rengba kadu na bakere zinga watadu gberãrago si kidu wa ka i ya i ru rani na kina boro sape. (Oni gedi Asanza 12:18.) Ani ima rengba ka asada ka õka gaani bipai tipa gupai gberẽ tirani. Ono mangaha wo ima rengba kadu wa ka i ru rani na sape na ki mbu gu sape re kina ku rogo rani yo. Wakina gure a, ani arengbanga kadu wenengai ka si du nga ani amanganga pai kuti gaani aimisiri te te.
6. Waigu rengbe ani ka mangapai ho boro naimisi rani ni?
6 Ho boro aimisa rani ni, gu bambatapai rengbe ka ye ku rogo rani yo nga ani zingi. Baibiri nape gupai nga ani ima rengba ka zinga. Ono tie, Baibiri nazahe ti gupai nga ka ani nyenga na zinga ya. (Tam. 4:4; Ef. 4:26) Tipagine? Bambiko gaani bipai dedede ni naasa rani ani mangipai ngba kura gene. Zanga gupai nga ga zinga niipo naye na wene asangbanapai. (Yak. 1:20) Oni tingidi gupai nga aboro dunduko rengbe arengba ka zinga, ono panye na zinga nga ga boro siapai.
Aboro dunduko rengbe arengba ka zinga, ono panye na zinga nga ga boro siapai
7. Gini kura abipai rengbe ani kadu na ni ho boro naimisi rani ni?
7 Ho i namangipai ni na ani ngba gbegberẽ gene, ani ima rengba kaa berã gbegberẽ aberã. Ni kpiapai, wirina ni dee du rimori nga Ann aya: “Ho mi adu ni ni gude, buba ambu nina na ki di gu dee i aafu marã furi tipa ri naangera fuo re. Mi abi tire nga mi nisare. Ho i avungu agude ni, mi abi tire nga agu agude re ima dia ba re. Mi asono nibi tire nga i aaidanga re te.” Wirina du rimori nga Georgette asakipai tipa wai ri aabi tiri ho kumbari amangi bäri ni, ri aya: “Ani aima du ni abakurea tona kinaho ani adu ni rukutu. Ani aamangasunge abazakigene kina sa! Rago aima gberã tire nikerehe.” Ni yangara ani ambu tirani. Na wirina du rimori nga Naomi aya: “Mi aainongo ho nga kumbami rengbe ka imisa re te. Sidu, ho ko akusi gupai ni nga, ko aabi agu ahe abi nazingisa nyemu kodaba ti boro na kini õkoho tire, mi abi tire nga ko ima nanga re na ka mi akidonga berewe kutiko ya.”
8. (a) Gini kura andu apai duho si aida ani mbupai ti ni fu kura aboro? (b) Gini aundo ani agbiaha ho ani ambupai ni? (Oni bi gu sanduki nga “ Na ka si du Nga Boro Ima Sarani Ani du na Bakere Gberãrago?”)
8 Ani arengbanga kadu na maapai kurii agu apai aboro apehe tipa rani watadu i amanga rani na ni te, ono ani ima rengba ka asada kadu na maapai kurii wai ani amangapai kuti ni. Na dedede, gu wene gene duho ka mangapai kuti ni nga ka mbu gupai re. Tipagine? Bambiko ani ima kpinyemu Yekova na ko naida ani naambupai. Ka ani nye na zinga zanga ka mbupai, si nawiraha wa ani ima rengba ka mangapai ngba mumungo gene na isoke, ki imisi kina tirani nikerehe. (Snz. 14:17, 29, 30) Oni bingo gu kpiapai nga ga gu wirina du rimori nga Christine. Ri aya: “Ho mi naazinga ni watadu ngbadure ni naima ni, mi naamoma nga gbe te. Mi naari agu ariahe adunga na undo ti ni fu kpotore ya. Mi naaranga gbe te, na si ni du ni kpakarakpakaraha fere tipa mi du naamaapai kurii gimi mangaapai, nga gu rengbe kadu na maapai kurii wai mi amangapai na kumbami watadu kura aboro.”
9. Tipagine si aida ani mbu kpipai ti ni?
9 Ka si vura du nga gu boro imisi rani re aho nga mbupai berani te, ani ima rengba ka zogosa bete gaani zinga. Ngba gini gene? Georgette i nifura tipa ri kusayo ape gupai nga: “Si aima dia gbanga regbo tipa gimi zinga kuti gu kumba mi adiko mbata re zeredi. Ni sangbana gipai re, mi adu na bakere zereda nga ga berãse yo.” Ho ani akpingo pai ni ya, ani ambunga zinga si du na maapai kurii wai ani amangapai na kura aboro te. Ani namanga wenepai a fu tirani—nga ani nambu berãkurii gupai re na ki tona ka gbia ngbarago rogo raka yo berewe kina wai ani aagbia ha mbata. (Snz. 11:17) Ono ginipai si aida mo mangihe ka si du nga mo aidanga kindi ka mbupai te?
WAI KA MBU DU NA ZINGA WATADU GBERÃRAGO
10. Tipagine si aida regbo aida ti ni tipa ani mbu du na zinga watadu imisiri ngbaduse? (Oni bi asura a.)
10 Waigu rengbe mo ka mbu du na zinga watadu imisiri ngbaduse? Gene sa rengbe mo ka mangaha ngbaha nga nimbu mo regbo si susi. Si naadia regbo adia tipa gu boro hõ nikerehe hu tingbafuo fuyo adawa fu ni. Wakina gure a, si ima rengba ka dia regbo tipa ani du wenengai mbata fu ani mbupai funi kpotorani yo.—Batu. 3:3; 1 Pet. 1:22.
Kina wai si adia regbo tipa aro wi wenengai, kina wo a si adia regbo tipa ani du wenengai ho pai naimisi rani ni (Oni bi genewaraga 10)
11. Waigu rengbe kparakpee ka undo rani tipa ani naambupai?
11 Mo sana Yekova rogo kparakpee yo tipa ko undo ro mo naambupai. c Ann i ni fura tipa ri kusayo asakipai tipa kparakpee. Ri aya: “Mi asana Yekova tipa ko mbupai furani ni basasa rogo gaani ngbadimokporo tipa agu apai ani apehe watadu amangihe ni gbegberẽhe. Fuoho, mi ake waraga fu buba na vovo diako na ki pe gupai nga mi ima mbupai fuyo.” Ann ape gupai nga pamangaha wo aadunga taata te. Ono ri aya: “Mi na gu maabangirise nga pa asada mi ka wirika ga Yekova mbupai, si nika sa buba na diako tipa i wiriki dungu apai tipa Yekova.”
12. Tipagine si aida ani kido ti ni kuti Yekova kuba ka kido kuti pa wai du ani na gberãrago? (Asanza 3:5, 6)
12 Mo kido kuti Yekova angianga kuti gamo bipai ya. (Oni gedi Asanza 3:5, 6.) Yekova ima ino gupai ngba tipa rani ti aregbo dunduko. (Yes. 55:8, 9) Na ko asananga rani ani mangi gupai rengbe ka imisa rani te. Sidu, ho ko angarasa rani ni tipa ani naambupai, ani ima rengba kadu na gu kidonga, pa manga ani he wo nika undo rani aundo. (Tam. 40:4; Yes. 48:17, 18) Ngba kura gene, ka ani aakido kina kuti pa wai du ani na gberãrago, ani adu nga na rengba ka mbupai te. (Snz. 14:12; Yere. 17:9) Naomi i ni fura tipa ri mbata kusayo ape gupai nga: “Ti tonatonaha, mi abihe nga si aidanga mi mbupai fu kumbami tipa bi agu ahe nazingisa nyemu kodaba te. Mi aagunde nga ko ima rengba ka imisa re berewe watadu bangiriko ima rengba ka go ti gu imisiri ko aye na ni kuti re. Na mi aabihe nga Yekova ima rugatiko na gimi biapai. Ono mi atona ka rugatire na gupai nga, mbiko gupai nga Yekova ima rugatiko na gimi abipai ayugongo gupai nga ko ima ida na ni te. Ko ima ino wai du mi na ko ima ino gupai nga si nadia regbo adia tipa mi mbu du na zinga, ono ko naida aida a mi naambupai.” d
MO SONOSI WENE BIPAI
13. Ringbisihe kuti ARomo 12:18-21, ginipai si aida ani mangihe?
13 Ho ani ambupai ni fu gu boro imisi rani nikerehe, anga gupai gbua si aida ani mangihe nga ka diaberã ka zanga fura tipa gupai na mangi re te te. Ka si du nga gu boro imisi rani re nga kina wirinarani Kristano, gaani sasa nga ka manga zereda. (Mt. 5:23, 24) Ani nasia ka yugo inopai kuba zinga na ki mbupai kuba kpipai. (Oni gedi ARomo 12:18-21; 1 Pet. 3:9) Ginipai rengbe ka undo rani tipa ani mangi gupai re?
14. Ginipai si aida ani asadi ka mangaha, na tipagine?
14 Si naida ani asadi kaa bi gu boro imisi rani re kina wai Yekova abi ni. Yekova nasia kaa ngera tipa gu wene asino du rogo aboro yo. (2 Peka 16:9; Tam. 130:3) Si naida ani asadi ka wirika Yekova na kini ngere tipa gu wene asino du rogo gu boro yo imisi rani. Ho ani angera ni tipa gu wene asino du ti kura aboro, si nika du furani taata ani mbupai fuyo. Ni kpiapai, wirina du rimoko nga Jarrod aya, “Si ni du fere taata tipa mi mbupai fu wirina ho mi naabi bakio wai ni ni naimisi re kuti gu badungu wene apai ngba tire tipa ni.”
15. Tipagine rengbehe kadu ti ni ni wenepai ka pe gupai fu boro nga mo ima mbupai fu ni?
15 Kura nyanyakipa apai si aida ani mangihe nga, ka pehe fu gu boro re nga ani ima mbupai funi. Tipagine? Oni bingo gupai Naomi ini fura tipa ri kusayo apehe, ri aya: “Kumbami asana re nga, ‘Mo ima mbupai fere?’ Ho mi aaza ngbare ni ka ya fuko ‘Mi ima mbupai foro,’ mi aadunga na rengba ka pe gu fugo re te. Mi abi gupai nga mi aambunga pai nzunzu fuko kpotoreyo te. Wa regbo aasusa, mi aima du na rengba ka pe gupai fuko nga, ‘Mi ima mbupai foro.’ Ho mi ambupai ni fu kumbami, kina aume nakuru bangiriko yo. Kina ngbare nazere ka bi wai ko agbia zereda na wai mi agbia zereda a. Natona ti gu regbo re, mi ima du na kido berewe kutiko na ani ima da berewe kuba rani ni bawene abakure.”
16. Ginipai mo nawirikihe tipa mbupai?
16 Yekova naida ani naambupai fu akuarani. (Koro. 3:13) Wa vura duhe wo, si ima rengba kadu ni kpakarakpakaraha furani tipa ani mbupai fu kura aboro. Ono tie, ani ima rengba ka mangaha wo ka si dunga ani aonganga aonga na pa gaani bipai te, na ani ki mangi ome ka mbu du na zinga. Fuoho, ani ima rengba ka sonosa wene bipai.—Oni bi gu sanduki nga “ Adiandue Biata Tipa ka Mbupai.”
MO GBE BERÃRO KUTI AGU AUNDO MO AGBIAHA HO MO AMBUPAI NI
17. Waigu pa mbu ani pai fu kura aboro aundo rani?
17 Ani na badungu andu apai berani tipa kaa mbupai. Ani bingo betehe. Ni bambataha, ani nawirika gu Barani nainopai fu aboro nga Yekova na kini sa ngbarago tiko. (Rk. 6:36) Uepai nga, ani nayugoho nga ani na ndikidi tambuahe fu Yekova tipa wai ko nambupai furani. (Mt. 6:12) Na biatapai nga, kpotorani nadu wenengai na ani ki banda gaani pagume ni nyanyakihe.
18-19. Ginipai rengbe ka manga ka ani mbupai?
18 Ho ani ambupai ni fu kura aboro, wene apai ima rengba ka manga nga gu ani aaberãnga paha ya. Ni kpiapai, oni bingo gupai namangi tipa Denise i nifura tipa ri mbata kusayo. Wa vura duhe nga ri aainongo gupai gu kumba namangi béno re aaberãha te, ri aye ka ino gupai kusa nga ko aaida ka imo tiko tifuo i saringbanga ko. Ono tie, rago aima ngba tiko ni bakerehe ho Denise ambupai ni fuko na ko ki tona wisigo Baibiri na aDezire Yekova.
19 Ani ima rengba ka bihe nga pa mbupai fu boro nga gu kpakarakpakarapai ani nika mangaha rogo gaani raka yo, ono si ima rengba kadu ni pa maku a. (Mt. 5:7) Sidu tie, ani mangingo ome amanga dunduko tipa ka wirika ga Yekova mbupai.
BIA 125 Aboro Ngbarago Nga Aboro Inapai!
a I ima aria agu arimo keyo ho re.
b Rogo ngbatunga pai wa gure, ai Kristano si aida ni mangi diaberã ni tini nibipa gupai ni aida ka mangaha.
c Oni bi gu bia nga namba 125 “Aboro Ngbarago Nga Aboro Inapai!” na bia nga namba 130 “Ani Mbupai fu Akuarani.”
d Wa vura duhe vurũ nga bi agu ahe nazingisa nyemu kodaba ti boro nga ingapai na ni gupai naimisa boro, si ambunga gene fu gu kura badiarogatise adunga na pai ti ni ya i mbutiyo ringbisihe kuti Ziazia Kekeapai te.
