1-2. Ginipai nika sa gupai nga Mbori idi na gaani iriso?

 GINIPAI naye ku berãro yo ho mo agia gu fugo ni nga “iriso”? Isoke, mo rengbe ka berãpa wirina nga guni kuku ngba rukusi ni ka manga kparakpee fu Yekova na ka fura na ko mbata fu ni ndu ka pi. Watadu si rengbe kadu nga mo naberãpa agu aborokporo nagbia ngbarago ti gayo wisigo Ziazia Kekeapai.

² Rogo agi apai ue re dunduko, agu aboro namangaha i namanga irisombori. Ya mo Yekova aida na gayo iriso? Ko ima rengba ka idaha ka si du nga i naˈasada ka manga gupai ko akpinyemuhe na ka i kpinyemuko na kini irisiko. Ani ima kpinyemu Yekova ni bakerehe gbe. Ani ima ino gupai nga ko ima rẽ ka dia iriso, na ani naida gaani gamahe nga ga iriso du ni bawenehe gbe.

3. Gini apai ani nika sakapai tipaha rogo gi kekeapai re?

³ Rogo gi kekeapai re, ani nika sakapai tipa ngbatunga gu iriso Yekova aidi na ni bakuru kusayo na ani nika makiapai tipa agene muambe nga gu Yekova aida ani irisiko ngbaha areme. Wa ani nikaa mangaha wo, ani ima rengba ka berãpa gu gene rengbe ani ka mbakada gaani irisombori ngbaha nitirani. Ani nika wisigo gu nduapai a ndikidi irisombori asarani ti ni ani du na ngbarago.

4. Waigu agu aboro naairiso Yekova mbata fu rago aKristano ayugu gayo irisa na nyemuse tipa Yekova?

⁴ Mbata fu rago aKristano, ngbatunga gu ruru akumba nadu wa Ebere, Noa, Abarayama, gbiati Eyobo ayugu gayo irisa na nyemuse tipa Yekova. Wai? I amangihe vurube gayo giasangba, gayo idapase, gbiati gayo amotumo. Ziazia Kekeapai apenga pa agu apai furani dunduko si aaida i mangihe te. Ono  tie, i aima yugo gupai ziazia nga i aima asada na ome yo dunduko ka iriso Yekova, na Yekova aima ida na gayo iriso. Kusa, Yekova afu aNdiko fu aYisaraere vurube Moize. Agi andiko re aakoda dungu arugute tipa wai ko aaida i naairisoko.

5. Gini ariapai namangi fuo kpio Yesu na fuo zingako be kpio?

⁵ Tingbafuo kpio Yesu na zingako be kpio, Yekova aaidanga aboro naairiso ko berewe ringbisihe kuti agu aNdiko ko afuhe fu aYisaraere te. (Rom. 10:4) Si aaida aKristano naapekafuo vovo rugute nga, “ga Kristo rugute.” (Gara. 6:2) Si aaida i naagia sangba gi “rugute” re angianga kaa tingidaha ngba riyo na kaa kakuti gu dungu andiko nadu fu aYisaraere ya, ono ni wirika yo ga Yesu kpiapai na kini pekefuo gako ayugopai. Areme a, aKristano naˈasada na ome yo dunduko tipa ka pekafuo Kristo tipa ka sa ngbarago ti Yekova na ki “bi ongoda tipa” mbisimoyo.​—Mt. 11:29.

6. Waigu rengbe ani ka gbia undo ti gi kekeapai re?

⁶ Wa ani nikaa sakapai tipa apapara gaani irisombori nibasasa, mo sana tiro nga, ‘Gini sonakumbatayo mi namangihe nibipa gipai re?’ Mo ima rengba ka sanahe a nga, ‘Ya mo mi rengbe ka mbakada gu gene mi airisombori ngbaha?’ Mo ima rengba kadu na ngbarago na gupai mo amangaha awere, ono si naida aida mo sana Yekova ko undo ro mo ini gupai rengbe mo ka mangaha berewe wenengai.

7. Waigu Yekova abi gu gaani akpee naye kina boro ngbaduraniyo?

⁷ Ani nairiso Yekova ho ani amanga kparakpee ni fuko. Ziazia Kekeapai naringbisapa gaani akparakpee kuti gu wene guzuguzu fuõngua i anaambakadaha kaa fuhe banye yo na kusa kini fuhe yekaru yo. (Tam. 141:2) Gu guzuguzu fuõngua re adu na wene fuoho ti ni nga gu nanaasa ngbarago ti Mbori. Teketeke a, gu gaani akpee naye kina boro ngbaduraniyo ima “ngba” ti ko, ka si vura du nga ani mangisunge na kina taata afugo rogo yo vurũ. (Snz. 15:8; Pa Rug. 33:10) Ani ima du na wene ndupai berani ka ida kuti gupai nga kpoto Yekova yo na ngbarago kaa gia rani ani nipe pa wai ani akpinyemuko na kini yugu tambuahe fuko. Ko naida ani pekepa gaani abakabangirise fuko, gaani amaabangirise gbiati agu apai du ani na nyemuhe. Mbata fu ani fura fu Yekova rogo kparakpee yo, si angba gbe ka ani berẽ wenengai tipa gupai ani andu ka pehe. Ka mo mangihe wo, mo nika fu gu bawene guzuguzu “fuõngua” ngba kisusi fu gu Bamo du ngbangbaturũ yo.

8. Gini wene mamu du berani tipa ka tambua Mbori?

⁸ Ani nairiso Yekova ho ani asambuo ko ni. (Tam. 34:1) Ani nasambuo Yekova nigumba ani pa wai fu kura aboro ani akpinyemuko na kini kpinyemu gako wene asino na gako asunge. Ka ani du na tambuahe fu Yekova, ani nika du na dungu weneapai tipa ka pehe tipa ko. Ho ani adia regbo ni tipa ka berãkurii ga Yekova weneringise​—agu apai dunduko ko namangihe furani​—ani nika du na dungu nduapai tipa ka sambuo ko. Sunge tungusapai nafu gu wene kparakpara mamu furani nga ga “tumo ni motumo tambuahe fu Mbori rogo ko yo dedede, gu zuzuhe nga ga ngbarani nakusa pa rimoko.” (Eb. 13:15) Kina wai si aida ani naaberã wenengai tipa gupai ani andu ka pehe fu Yekova rogo kparakpee yo mbata fu ani pehe, kina wo a si aida ani naaberã wenengai tipa gupai ani andu ka pehe fu agu aboro ani atungusapai fuyo. Ani naida gaani “motumo tambuahe” du ni bawenehe gbe. Ani nafura kina boro ngbaduraniyo ho ani afura ni na kura aboro tipa rengo.

9. Wakina agu aYisaraere nadu mbata, waigu ani agbia undo ti dunguratise kina sa? Mo funga kpiapai tipa wai adunguratise aundo ro.

 ⁹ Ani nairiso Yekova ho ani andu ni tipa adunguratise. I aya fu agu aYisaraere nadu mbata wẽ: “Gaoni akumba aniye rogo garã sa bara biata ku bara bangiri Yekova gaoni Mbori ku rogo gu ba ko ka sia ha.” (Pa Rug. 16:16) Si anaaida i mbu akpuyo gbiati gayo aati zanga boro duho kaa bandaha. Ono Yekova akido yo nga: “A nga boro sa nikakpi nyemu gaoni ringara te, ho oni ka andu ni ku bara bangiri Yekova gaoni Mbori.” (Gate 34:24) Bambiko aYisaraere aima kido kuti Yekova na ngbaduyo yo dunduko, i anaandu tipa agu apumbo i anaamangaha rogo agarã yo dunduko. Na i anaagbia undo rogo dungu agene yo. Ni kpiapai, i awiriki dungu apai tipa ga Mbori aNdiko, i anaaberãkurii pa wai du Yekova ni wene ko fuyo, na i anaagbia ngbarago ti du wa sa na akurayo nga aguyo naakpinyemu Yekova a. (Pa Rug. 16:15) Ani nagbia ngbatunga aundo wakina gure ho ani ambupa kura gaani apai ni ka ndu tipa agu adunguratise nga ga aKristano. Na mo berẽnga pa wai du Yekova na ngbarago ho ani ambakada tirani ni ka ndu tipa adunguratise na kini fu gu guru akaragapai du ni wenehe.

10. Tipagine du bibia ti ni ni papara gaani irisombori?

¹⁰ Ani nairiso Yekova ho ani abibia ni na awirinarani. (Tam. 28:7) AYisaraere anaabi pa bibia ni nyanyakipa papara gayo irisombori. Bakindo Davide asia aRevi bange yo adu nga 288 ni ababi bia yekaru yo. (1 Peka 25:1, 6-8) Areme a, ani ima rengba ka yugo gaani nyemuse fu Mbori ho ani abi abia sambuohe ni. Si aidanga ani du mbata ni kina wene ababi bia tipa ka sambuo Yekova te. Oni berẽnga pa gi ringbisapa pai re: Ho ani afura ni, “ani nakota dunduko rogo dungu apai,” ono gupai re arugusanga rani ti fura ba adunguratise yo na gene tungusapai yo te. (Yak. 3:2) Wakina gure a, ani ima rengba kaa bibia kaa sambuo Yekova na ni ka si vura du nga ani naberã gupai nga ani abinga ha wenengai te vurũ.

11. A wa duhe rogo Atambuahe 48:13, tipagine si aida ani moi regbo ti ni tipa wisigo Ziazia Kekeapai nga ga aborokporo?

¹¹ Ani nairiso Yekova ho ani awisigo Fugoko ni na kini yugupai fu awirani tipa ko. AYisaraere anaamanganga sunge Rago Sabiti te, i anaamangasunge na gu regbo re tipa ka nyakasa gayo pabakure na Yekova. (Gate 31:16, 17) Aguyo naadu niruru yo dagbayo anaayugopai fu awiriyo tipa Yekova na gako weneringise. Areme a, si naida ani di regbo ka geda Fugo Mbori na kini wisigihe. Si nga papara gaani iriso fu Yekova, na si naundo rani ani mbedi na ko. (Tam. 73:28) Na ho ani amanga wisigopai ni kina sa nga ga aborokporo, ani ima rengba ka undo awirani​—i sonosi mbembedi pabakure na gu Barani nga boro nyemuse du ngbangbaturũ yo.​—Oni gedi Atambuahe 48:13.

12. Ginipai ani awirikaha ti wai Yekova aabi gu sunge nga ga agu aboro namangi agu ahe naadu banye yo?

¹² Ani nairiso Yekova ho ani adua aba irisombori ni na kini ngerefuoho. Baibiri nagumba gupai nga gu sunge nangia ka mbakada banye na agu ahe naadu yo angia “ziazia” sunge. (Gate 36:1, 4) Areme a, Yekova nabi sunge meka aBambu Kindo gbiati kura mekemeke abambu ni papara gaani irisombori. Kura awirina nadia bakere regbo tipa kaa manga agi asunge re. Ani na tambuahe tipa gi nyanyakipa sunge nafubee sa gu sunge nga ga Kindo re. Rengo ngaha nga, i namangasunge tungusapai amanga a. Zavura agu akurayo ima rengba ka ida kadu ni abazakigene. Agu abaakumba nga ga dungurati yo ima rengba ka yugo gupai nga i nasongoda sunge mekaarago asongoda  ni zanga du yo na ndundu ka sia agi awirina namangasunge kakaka re ni abazakigene ho ka i rẽ ni. Singia ani na inohe rogo pa mekarago yo watadu ani na ni te, ani dunduko niima rengba ka banda mekemeke arago si du ni gigirihe na ni wenehe.

13. Waigu si aida ani naabi agu agamahe ani afuhe tipa si songodi sunge Kindo?

¹³ Ani nairiso Yekova ho ani asongoda sunge Kindo ni na gaani agamahe. Si anaaida aYisaraere naaye na gamahe fu Yekova ho i anaandu ni tipa apumbo. (Pa Rug. 16:16) Si aniidi i ye na gamahe ringbisihe kuti agu ahe i arengbe ka fuhe. Ngba gi gene re, i ayugu gupai nga i aima du na tambuahe tipa agu apai dunduko Yekova aamangaha tipa si undo yo rogo toro yo. Waigu rengbe ani ka yugo gaani nyemuse tipa Yekova na gaani tambuahe tipa agu ariahe nga ga toro ani agbiaha? Gene sa nga nifu ani marã tipa si naasongoda gu sunge du rogo gu dungurati du rogo gaani dagbarago na gu sunge namanga rogo zegino dunduko ka agu apai du tipa rani mbugene furani ani mangihe wo. Gu mokedi nangia Pauro amoihe ngba gi gene re: “Si ngia gu ni du zaza rogo pa fu gamahe, Mbori aida pa gamahe be boro wa du pa agu ahe du be ni, kuti agu ahe adu nga be ni ya te.” (2 Kor. 8:4, 12) Yekova na bakere ngbarago tipa ai guhe rengbe ani ka fuhe ka si avuranga ka kio vurũ ya.​—Mk. 12:42-44; 2 Kor. 9:7.

14. Ringbisihe kuti Asanza 19:17, waigu Yekova abi gu undo ani afuhe fu agu awirinarani du rogo zingo?

¹⁴ Ani nairiso Yekova ho ani aundo akuarani aKristano ni nga aguyo du rogo zingo. Yekova akidohe ka fu maku fu agu aYisaraere nanaafu ahe fu rungorungo aboro. (Pa Rug. 15:7, 10) Nirengo, ai gu regbo ani aundo wirinarani irisimbori nga guni du rogo zingo, Yekova nabihe wa gamahe Fuko. (Oni gedi Asanza 19:17.) Ni kpiapai, ho agu aKristano naadu Firipoi yo akedi gamahe ni fu Pauro ku bambukiso yo, ko aya tipaha wẽ si nga, “wene motumo nangba ti Mbori.” (Frp. 4:18) Mo berẽnga pa agu aboro du rogo gamo dungurati na ki sana tiro nga, ‘Ya mo boro ho rengbe mi ka undo ni?’ Yekova na ngbarago ho ko abi rani ni ani nimangisunge na gaani regbo, omerani, gaani inohe, gbiati agu ahe du berani tipa ka undo agu aboro du rogo zingo. Ko nabi gu mangapai re ni papara gaani irisombori.​—Yak. 1:27.

15. Ndikidi irisombori naida na regbo gbiati ome, ono tipagine adunga ha ti ni ni tindiro kurii rani ya?

¹⁵ Ndikidi irisombori naida na regbo gbiati ome. Ono si asusanga omerani te. (1 Yo. 5:3) Tipagine? Bambiko ani nairiso Yekova mbiko ani ima kpinyemu ko. Oni berẽnga pa gu gude naida ka fuhe fu bako. Ko ima rengba ka dia dungu asaa tipa ka ke sura fuko. Gu gude re abiranga tiko mbiko agu asaa ko nadihe ka ke sura te. Ko ima kpinyemu bako, na ko na ngbarago ka fu gu gamahe re fuko. Wakina gure a, ani na ngbarago ka mangasunge na gaani regbo gbiati omerani ka iriso Yekova, bambiko ani ima kpinyemuko.

16. Ringbisihe kuti AEbere 6:10, waigu Yekova abi gu ome ani nibasasa amangaha tipa ka sa ngbarago ti ko?

¹⁶ Agu avunguagude du na nyemuse aberãnga gupai nga i gbia kina ngbatunga bangisa gamahe wa gure be awiriyo dunduko te. I ima rugatiyo na gupai nga agude ni bakiakia rogo agu apai du yo na rengba ka mangaha. Wakina gure a, gu Barani du ngbangbaturũ yo ima rugatiko na gupai ani narengbe ka mangaha. Isoke mo rengbe ka manga bakereapai susi fu gu dungu aboro mo naini yo na kini kpinyemu yo. Watadu si rengbe kadu nga mo na rengba  ka manga bakereapai wa gu kura aboro amangaha te, isoke mbiko gbinza, akaza, watadu agu atindiro nga ga aborokporo du kuriro. Ka rago gberẽnga tiro ya. (Gara. 6:4) Bangiri Yekova agonga ti gamo sunge te. A wa mo nikaa manga gupai du ni bawenehe rengbe omero na ni, na kini mangihe na ruru ndupai, rago nika ngbaangba tiko. (Oni gedi AEbere 6:10.) Yekova ima ino zavura gupai mo aida ka mangaha. Ko naida mo du na ngbarago tipa agu apai du mo na rengba ka mangaha fuko.

17. (a) Ka ani bi gu kura apapara gaani irisombori ni kpakarakpakaraha, gini adiandue rengbe ani ka mangaha? (b) Waigu mo nagbia undo ti kura papara gaani irisombori a wa i nayuguhe rogo gu sanduki nga, “ Mo Gbia Kurapai Kuti Gamo Ngbarago”?

¹⁷ Ginipai rengbe ani ka mangaha ka ani bihe ni kpakarakpakaraha ka manga kura apai nga gu ani nasakipai tipaha, wa gu nga wisigo Ziazia Kekeapai watadu tungusapai? Ho ani amanga agi apai re ni dedede, si nawira wa ani nika gbia ngbarago agbia ti mangaha ni bakerehe na ki gbia aundo ni bakerehe a. Ani rengbe ka ringbisa gaani irisombori kuti kura apai wa gu nga, manga mangonvo watadu wirika mangasunge na aũ tabia. Ka ani aamanganga ha dedede ya, ani rengbenga ka manga sonakumbatayo te. Ono ginipai rengbe ka manga ka ani diberã kaa mangaha na aˈuru dũ? Ti bambataha isoke ani ima rengba kaa mangaha tipa wiri bete aminiti ti aregbo dũ, ono tifuo gure ani ima rengba ka ndu kumbatayo kaa mangaha tipa dungu asaa. Ho ani nikaa bi gu wene sangbanapai ni nga ga gu ome ani amangaha, si nawira wa ani nikaa ngera kumbatayo tipa agu aregbo ani nika mangaha na kini gbia ngbarago ti mangaha. Ya mo oni rengbe ka bi wai rengbe ani ka manga kina bangisapai wa gure tipa gaani irisombori?

18. Gini nyanyakipa pai du ho rengbe ani ka mangaha, na ginipai nika manga ka ani mangihe wo?

¹⁸ Manga ani ome tipa ka iriso Yekova nga gu nyanyakipa pai rengbe ani ka mangaha. Ka ani mangihe wo ani nika gbia ngbarago ti gu raka du na rogoyo ti ni, na ani nika du na gu maabangirise nga ka iriso Yekova nyeanye kindi. (Snz. 10:22) Ani ima du na zereda nga ga berãse yo mbiko ani ima ino gupai nga Yekova naundo airisiko aundo ho du yo ni rogo akpakarapai. (Yes. 41:9, 10) Ani nirengo na wene nduapai berani kadu na ngbarago wa ani airiso gu Barani nga boro nyemuse, nga guko niima rẽ, “na dia taarimo na irisa” be gako kusikusiahe dunduko!​—Yugo. 4:11.